永康吳筆長老娘，名陳牧桃，是大甲陳其祥長老之養女，1956年1月18日去世。
錄賴財華撰 刊於《台灣教會公報》810-811號，1956年6-7月的見證如下：

本年（1956年）正月20日，ti7永康禮拜堂有舉行一個真m7甘e5告別式，就是本堂e5吳筆長老娘 （劉華義牧師e5丈姆，牧師娘名吳秀惠） 為著肝癌，ti7正月18日離開世間，主有恩典伊ti7別世e5 18日前，chhoa7伊到天堂kap地獄。今將伊所看e5簡單寫做見証。

12月31日頂晡[吳筆長老娘]有ka7吳長老（按吳長老是漢醫）講：「今仔日你m7 thang去往診， kiam2 chhai2主會召我轉去。」後來10點到e晡（下午）4點半攏m7知人，目睭金金嘴硬硬，有看見一e5穿白衫，loh白嘴鬚e5主耶穌，chhoa7伊到天堂，ti7 hia聽見音樂，好聽e5聲音。也眾人攏穿白衫歡迎。Koh chhoa7到伊e5房間，內面e5佈置真sui2,有椅、桌，koh布籬chit e7開，也有金sih-sih e5眠床。長老娘對主講：「我be7堪tit坐chiah sui2 e5椅，be7堪tit睏chiah sui2 e5眠床，因為我e5衫驚人。」主講：「我看心內，我無看外皮，你有好心gau5疼人，行濟濟好事，你是真乖e5查某子，我真疼你，koh看見桌頂有一頂真sui2 e5冕旒，是世間無thang比tit e5 sui2。」主hou7伊坐，吟257首詩安慰伊，長老娘對主求講，准伊轉去thang安慰伊e5子kap家族，主准伊續講，若koh召你，你tioh koh來，主就koh chhoa7伊轉來。

Kang7（同）日暗時11點半到12點外，koh一擺m7知人，有一e5人chhoa7伊行真歹行e5路，到位聽見驚惶e5聲，因為真濟人ti7火坑teh受燒，有大石磨、有大e5油鼎、有鐵狗、有銅蛇攏teh刑罰歹人，眾人叫m7敢，啼哭，魔鬼講：「無路thang逃閃，」koh有e5喝講：「反悔無機會。」長老娘真驚m7敢看，hit人講：「m7免驚，主kap你ti7 teh，」就koh chhoa7伊去天堂ka7伊講：「你tioh tiam3 chia；伊求講，因為子兒出外，iau2 boe7 kap in saN辭，容允我轉去，就ko chhoa7伊轉來，醒起來iau2 ku2真驚。」可憐hiah e5歹人受刑罰，家內e5人ai3伊對主求，hou7伊有活命thang koh ti7世間，為伊做見証；伊講伊m7敢，生死出在主e5意思。

正月初一e5暗11點外到到12點外，伊有看見一個烏烏koh歹看e5人 chhoa7伊beh去地獄，伊m7愛去，kap伊計較相扑約20分久， hit中間看見魔鬼濟濟kiah8長長e5叉teh chhiam2歹人hiat ti7火坑，眾人啼哭叫m7敢e5聲音真可憐，hou7伊e5心真艱苦，對魔鬼講：「我beh去天堂，你怎樣chhoa7我來地獄？」家內e5人聽見kap看見這e5事，出力求主幫贊伊，後來較贏魔鬼，喝哈利路亞，扑手。主就koh來 chhoa7伊到真sui2 e5花園，果子滿滿是，主就將hit頂sui2冕旒beh ka7伊戴，伊謙卑講，我e5頭毛真驚人，be7堪tit戴。

看chiah e5事以後，主hou7伊koh tia7世間18日久，thang做見証。正月18暗，ti7真sui2 e5面貌直直叫主，來離開世間。伊病一冬久，伊e5艱苦咱be7 thang形容，若是伊m7 bat一句怨嘆，親像約伯。長老娘在生gau5疼人、疼主，虔誠信靠主，好款待破病e5散hiong人，做無倚靠e5寡婦e5幫贊，慈愛ti7孤兒，gau5有孝序大人，特別對主e5工人，雖是神學生也真好款待in，gau5幫贊教會做馬大姊，koh也親像多加30年久。

聽見伊e5死，教會內外e5人流m7甘數念e5目屎。我到永康牧會無偌久，長老娘已經身軀破病，我逐擺去探伊，伊艱苦e5中間iau2真關心我e5生活，伊掠別人比家己較要緊，用克己本身來款待人。伊ti7歸天e5一日前，特別一項事hou7我e5心受大感激e5,當我去看伊，伊極艱苦喘氣be7自然e5時， iau2 ku2叫伊e5子提柑仔hou7我食，伊e5疼心hou7我一生無be7記得。我信因為伊gau5疼人，gau5疼主，主chhoa7伊去看伊e5房間kap sui2 e5冕旒。以上我寫chiah e5來追念伊，kap逐家相kap受勉勵。

「所以我所疼e5兄弟ah，lin2 tioh堅固無搖choah，常常盡力ti7主e5工，因為知lin2 tioh磨ti7主e5 m7是空空」 （1哥 15：58）。