潘毛里撰《台灣教會公報》 607卷，1935年10月

---

南崁教會e5吳添友長老，ti7 （1935年）8 月25日有受主揀召離開世間倒去天堂，享壽81歲。
吳長老e5做人是樸實忠厚，對教會、對國家真出力奉事，有頭、有尾，真誠實清廉、清氣，熱誠信主；
hou7人人所數念，一下聽見伊離開世間，真m7甘。
13歲e5時就無老父，得著賢母e5牽成，到9 歲e5時，有入書房讀冊。
到14 歲e5時就出ti7社會來擔當1家e5生計，tiam3 ti7南崁店仔做淡薄e5生理。
到26歲e5時，有轉業來ti7現時e5所在經營農業，直直到ti7伊過身e5日，做1e5篤農家ti7南崁。

 論吳長老對國家、對教會、對家庭e5貢獻，我ai3排列淡薄，thang hou7咱相kap榮光上帝e5名。

1. 對國家e5職務。Ti7帝國領台當時，明治29年（1986年），有擔當分結守，ti7 32年有當選做總結守。33年受命做臨時土地調查委員。34年受選做保正，（保甲制度對這年創起），直直繼續到ti7現今，攏m7 bat lang3 cham7。38年受命做南崁公學校學務委員。39年受命做土地整理委員。大正9年（1920年），有擔當區總代。Ti7大正4年（1915年），有出力鬥招呼勸勉人來加入南崁信用組合，續受揀做評訂委員。其他受10外團体e5囑託，講be7盡。對ti7伊有忠實，伊e5工有貢獻ti7社會，致到有總督e5表彰5擺。Koh再總務長官、州知事、廳長、郡守、庄長、其他各團体e5表彰數10擺。Chiah e5 thang証明吳長老e5盡忠報國。

2. 對教會e5職務。吳長老原來是熱心信偶像宗教e5人，不止有宗教心。Ti7明治23年（1890年），南崁初設基督教會e5時，對ti7伊e5宗教心e5表現，有勇敢來研究道理。到知這個宗教是真e5時，就放棄伊前所服事e5,來領受主e5福音。雖然hou7人恥笑，攏無搖choah,一發熱心；ti7明治35年（1902年）受揀做執事，盡力ti7執事e5工，出力ti7拜堂e5改築。明治38年（1905年）受揀做長老，直直到ti7臨終e5日，攏無斷cham7。常常去赴中會，也bat去赴大會，bat伊e5人攏o-lo2伊e5信德。伊近年較濟歲，耳空重，所以無去赴中會；總是伊路尾擺e5赴中會是7 年前，tu2-tu2是伊e5後生吳天命受設立做教師e5時，上帝e5攝理真奇妙。

3. 對家庭e5職務。Thang講吳長老有大興起e5家族。伊ti7 3 歲e5時老父過身，伊e5老父兩兄弟，只有見伊1人thang傳嗣。Ti7 這款e5時，得著賢母e5牽成kap上主e5致蔭，伊有長成，建置家庭。伊kap長老娘結婚已經60年久，人teh講m7 bat看見in相加話。Thang講真和睦，相kap奉養老母，養餇牽成序細。相kap信主領受主e5恩典。對in這款完滿e5家庭，上帝有賜in 50外個序細ti7 in e5身邊，60年久對in兩人有傳，若含外孫續算，有倚80 外人。對chiah e5序細，伊真gau5牽成教育，雖然伊e5家計m7是富裕，iau2 ku2 gau5 chhiaN5 ti5序細。大子（吳蘭桂）細子（吳愈信）有設法續接伊耕農。第2子（吳逢春）做醫生，第3子（吳天賜）做藥局生幫贊二兄。第4子（吳天命）獻hou7主，現時擔任台北神學校教師。查某子e5中間也1個獻hou7主，現時ti7淡水女學院做舍監，栽培女子。其他e5孫也是攏棟樑e5。大孫有擔任南崁教會e5執事。大子這擺有受揀來接伊做保正。Koh再伊真致意引chhoa7 chiah e5序細來拜上帝，不時掛慮序細e5信德。實在thang講對家庭e5職務有盡。

有幾若項thang hou7咱數念伊：

1. 熱心信主。吳長老m7 bat歇睏禮拜日頂e晡e5聚會，若有歇睏，是出外抑是身軀無爽快。常常kap傳教者去佈道，伊較常是用聖詩來傳道理。真gau5体貼傳教者，若bat去南崁擔任e5傳道者，就攏知伊e5疼心。

2. 清氣心肝。熱心信主e5結果，有hou7伊e5心肝清氣，伊攏是講出好話，我來南崁頭尾5年久，m7 bat聽見伊講粗魯e5話，無對講話來跋倒。吳長老實在有純潔kap美麗ti7社會人群中，無m7超過眾人。逐人欣羨伊e5清氣相。

3. 上帝盡忠e5奴僕。吳長老真gau5鬥幫贊教會e5工。做長老也歡喜鬥幫贊執事e5工。真克己，甘願降低來服事人，所做有利益人。看世人teh枵，teh嘴礁，常常將主e5道理hou7人lim, hou7人食。Thang講伊是主所疼e5新娘。

4. Gau5行孝伊e5老母。我有聽人講，南崁有出2e5孝子，1e5是吳長老，koh 1 e5是張執事。伊常常ti7子孫e5面前，來講明伊e5老母e5事，勸勉in來數念伊。吳長老這款e5信徒，有得tioh主大祝福伊， hou7伊長歲壽，得著紀念鑽石婚e5日子。Koh伊e5序細攏有toe3伊e5腳步服事上帝。Thang講伊是主e5新娘，內外攏sui2, ti7早早就hou7耶穌過訂，到ti7 8月25日就hou7耶穌娶去。伊beh過世e5時攏無掛慮，因為世間e5事伊攏創明白，嘴攏是講面e5事，腳phoat來phoat去，人問伊kan2 beh an2 ni，伊講耶穌kap我ti7 leh，聖神kap我ti7 leh,我teh行路beh來去天堂，全然無1屑仔e5憂愁。實在真感謝上帝e5所在。

人一下聽見伊死，真m7甘，眾議一決，就扑四塊石碑來chhai7 ti7伊e5墓nih,做久長e5紀念。庄長1塊寫講「奉公至誠」。保甲聯合會1塊寫講「克職廉正」。信用組合1塊寫講「始終一貫」。南崁教會1塊寫講「為主忠僕」。伊實在會堪tit受這 4款e5稱呼。

Ti7 9月3日有告別式，有官廳、民間、以及教會幾若百人來會葬，有濟濟人讀弔詞，也有弔電幾若十張。對台北方面有幾若個牧師來會葬。韋彼得牧師、神學校學生攏有備辦弔詞來哀弔。咱有這款先輩來造就這cham7 e5好歷史ti7教會，真正是榮光e5所在。今伊iau2有長老娘kap遺族，向望上主安慰in,頭到尾，gau5 toe3 in e5序大e5腳步來行天路。