葉金木撰「小傳：林文通」《台灣教會報》377卷，1916年8月

林君文通，出世ti7主後1885年，細漢e5時有ti7水返腳（汐止）拜堂讀小學幾若年，到主後1902年有入淡水神學校讀冊。頭尾有經過4年久。後來為著家內e5代誌，姑不將著退學，轉來幫贊伊e5父，總是無久伊e5父就死，伊著擔當家內kap發落生理e5責承。不幸ti7 2年前伊e5頷kun2有起腺癌e5病。近來伊e5病那傷重，到本（1916）年6月30號下晡6點鐘就離開世間。

論伊濟濟項e5好模樣hou7人thang學，今我大略寫幾項排列ti7下底。

1. 誠實。對伊少年到25歲才建置家後，m7 bat聽見伊有甚mih放縱e5事，也無ai3 kap hiah-e5做歹e5人交陪，若閒e5時就到拜堂講究道理、看冊。若有人託重伊甚mih代誌伊也不止致意。

2. 熱心ti7教會。對伊出學了後不論伊到某所在做事業，伊就ti7 hia鬥幫贊教會。Ti7 墩仔腳初設拜堂e5時（創設於1908年4月 iau2未有傳道thang去toa3 hit tiap8伊ti7后里庄辦工事，伊就出力鬥幫贊墩仔腳e5教會。後來伊有toa3 ti7基隆做生理，也是鬥幫贊hia e5教會。Koh伊常常甘願克己盡力題捐做教會e5路用。

3.  盡職。伊ti7主後1912年就倒轉來水返腳做生理。會友看伊出力ti7教會，1913年教會揀伊做執事，1914年教會揀伊做長老。伊所擔當e5職，無論鼓舞題捐掌數，做記事，抑是kap我做陣出外探會友佈道，伊攏歡喜擔當，無推辭。到伊病勢沉重e5時，我kap會友去探伊，伊猶原是掛慮教會e5事，講伊攏無出力ti7教會。

4. Gau5吞忍。伊所tu2著e5病我未bat看見人tu2著hiah大艱苦。總是伊iau2未tu2著hiah大艱苦e5時，我就常常替伊掛慮。總是若見著伊e5面，伊反轉真笑容，顯出攏無掛慮e5款。逐擺若來我兜，攏是kap我講教會e5事。對兩月外日前起，伊e5病勢就真傷重，全身疼痛be7講tit，be7坐、be7倒、be7睏；到後來著請先生來ka7伊chiam藥，1日有時兩擺。我有去安慰伊，伊講：「我若無信上帝，的確be7吞忍到hiah久。」

今已經離開世間，有放sak伊e5某iau2少年，兩個查某子iau2細漢， koh對幾若年前那失敗，續致到欠人e5債。An2-ni某子著tu2著真艱苦。請看報e5兄姊替in祈禱，koh替水返腳e5教會祈禱，向望上帝會koh揀人濟濟來接續伊e5工。