三年運動特記 1937年6月

明有德（Rev. Hugh MacMillan） 報 《台灣教會公報》 627號 1937 年6月 p.26-27 《芥菜子--北部事務》 137號 原文是白話字。

1. 主張。

三年運動5月的聖經。馬太15：1─20；馬可7：1─23；路加11：37─54。閣參約翰5，6，7，8章。

舊的慣例。「......無照流傳來行是怎樣」。佇西洋有一所在，有一个囡仔聽伊的爸母講，一日欲請牧師佮咱相佮食，囡仔真歡喜；總是也驚，因為無熟似。逐禮拜所看到台頂是不止遠。囡仔真愛看牧師食飯，看愛食甚物，也怎樣食。伊拍算牧師無凊彩食，閣伊的確比平常人較有禮數，伊不止驚；因為伊的爸母常常責備伊無照禮數。伊向望通對牧師學第一完全的禮數。伊逐日聽候，到彼日牧師來，大家坐桌相佮食，囡仔雖然恬恬毋敢講；總是伊金金看牧師的禮數啥款咧食，看了奇怪兩項，一項，牧師無甚物愛食特別的物，是愛食平常的食物，飯佮菜。

閣一項，牧師真自由咧食，攏無予甚物禮數把縛，伊本身感覺真無自由，予禮數把縛。伊雖罔看牧師攏無用禮數來食，伊毋敢講牧師無文雅，伊看牧師的禮數比伊本身的加真好，所以伊決意愛學牧師的款式。

對這站的聖經，有人批評耶穌的學生無照禮數。毋知有影抑無？ 伊的學生較濟是庄裡人，討魚人，怹檢采都市的禮數無熟；總是雖是按呢，怹的心肝檢采比都市的人較老實，較會信用，較無歹念頭，較無貪心，較無邪癖行淫，無奸詐，無驕傲，耶穌看怹雖罔外皮的禮數無熟，伊較歡喜怹的心。遐的人的批評誣告是掠小可空縫而已，耶穌無看做要緊。怹無嫌耶穌無照禮數。檢采耶穌的學生比別人較有禮數；因為怹不時對主學較高尚的禮數。

批評的人家己甚物款？ 怹家己想怹照禮數，照流傳；毋過較近的爸母怹無對重。怹對重獻禮物(Kok-pán)佇殿裡，也較無好款待怹的序大人。所以主愛予怹知影，怹事實是假好的人。伊引古早寶貝的教示，以賽亞「這个百姓用喙唇尊敬我，若是怹的心離開我遠遠，怹敬拜我是空空；因為怹用人所命令的做教示來教示人」(馬可 7：7)。所以主將一項好教示予怹，「恁攏著聽我來曉悟，見若對人的外面入的袂會沐垃儳人；獨獨對人的內面出的遮的就是沐垃儳人」。

這款教示差不多遐的人所想是對反的事，是脫線。照看因為想對重私慾，較無疼別人佮上帝。人若是佇心內解決佮上帝的關係，毋免驚伊無通照禮數來行，的確會做無通嫌的人物。

2. 工作

1. 5月3日，東部區總會有聚集佇瑞穗，來計畫今年的工程。本部有蕭安居牧師去赴會，說明今年的方針。決議對5月10日到6月21日，區內各教會3日久的祈禱，查考聖經佮暗時救靈講演。

2. 台北區，佇5月11日也有開區會，來決定各教會3日以上的工。

向望大家知通為著這擺的工作祈禱，予咱有力來出發，有力來完工。