《台灣教會公報》 790號 1954年10月 p.4-5 原文是白話字。
今年的南部大會有決議欲開始一个大運動，叫做「設教百週年記念教會倍加運動，」簡稱 P.K.U。佇此去11年內，來完成這个運動。到1965年，就是南部教會設教一百週年，彼年向望有比今仔日重倍的教會數，就是300 間，來獻予主，做怹設教100週年記念的禮品。
1. 這是空前的大運動。
看南部教會史的中間，最第一精彩的一段，就是1896-1906 止10年間，中部 地區漢人3間的教會進步到20 間；信徒數對(從) 500進到3000。也平埔的教會本6 間，加1間；信徒對800進到1200 (看萬牧師的教會史 137面)。按呢佇這10年久，只有佇中部地區加設18 間教會，算是過去最大成功的一站。
但是此去只有10年久，這个運動按算欲加設150 間。實在是空前的大運動。大會欲決議這項的時，用真嚴肅，敬虔的心情，眾議員用真大的決心佮熱情來採決這个世紀的大運動。相信這个決議雖然是空前，猶久毋是空想的運動。因為有稠密的準備，具體的佮合理的的計畫。大會有派一个委員會，推戴大會議長許有才牧師做委員長，閣任命黃武東總幹事兼幹事，積極落去推行。
委員會為著欲期成伊的效果，有將這个運動分做 7 部的工；各部有坦橫的連絡，分工協作，通落去活動。今逐部已經逐逐 teh準備，向望對後月日起，會通看見怹 的成果。
2. 這是真合時宜的運動。
初代的使徒(教會的領袖)按呢講，「阮將上帝的道理放下teh，來辨理食食，毋合宜」(行傳 6：2)。
但是咱今仔日自稱教會的領袖的，將上帝的道理放下teh，來辨理這項，彼項的事做合宜的款。事實teh證明，每回大、中會的聚集，是辨理教會的政治問題較濟，論傳道，設教的事較少。看逐回的記錄就知，傳道設教的事，無全記錄的百分一？有人講「傳道局」著改名做「人事局」。是按怎？莫怪！因為辦人事問題是有，若是傳道設教的事就無垃la (有也真少)。
這陣毋是坐teh辦代誌的時垃！是把起來，腰縖皮帶，kia̍h柺仔出去的時垃！
自稱做領袖的啊！你若猶掠坐teh辨理代誌做合宜，欲將上帝的道理放hē-teh！就毋但上帝欲將你放hē-teh，連前到今綴你的人也欲將你放hē-teh，做怹去行怹家己的路！
況兼時猶是日時，應該著做差咱的的工。又閣按呢才是慶祝百週年的禮物。所以講這是合時宜的運動。
3. 這是phoe命的運動。
毋是一人的 phoe命，是全大會的 phoe命，教會的 phoe命的運動。這个運動一旦開始，號令一旦出，是會用得成功，袂用得失敗得的。換話來講，若成功就好；若失敗，就做以後萬世的笑柄。以後的人欲講，抑是歷史欲笑講，「南部大會啊！你會做啥物？早前kiám無遐熱切決議彼个空前的大運動。愛啊！今佇佗落？kiám有成功嗎？竟然親像泰山鳴動，但是走無一隻老鼠仔囝？」
所以南部教會啊！既然按呢開車去，就著phoe命垃 l！今毋是一人，抑是一教會，抑是一中會的問題垃！就是全大會，全南部的性命垃！著成功，毋通失敗！
本報也不忍做一个旁觀者，袖手旁觀，甘願做你一个運動的家私，參加你這个世紀的大運動，應你的號召來邁進。到佇1965年你成功的日。
|
