|
吳天命報 「九份教會」《台灣教會公報》672期 1941年3月 p.25。 原文是白話字。（該會於1939年8月19日為首任牧師，一直連任十年久） 活動的九份教會，佇舊年熱天聖堂予風颱拍歹，對彼霎無真好勢的所在通聚會。趕緊著手計畫起新的拜堂。 總是佇這个時陣濟濟袂照所愛，所以有計畫大部分用木造的。卻也有得著一寡西洋土。佇舊年10月興工到現時已經teh欲完工垃l。按算佇4月中欲落成。總共工事費是9千箍，攏無對別位提，是家己的會友獻的。怹對佇疼主，佮疼伊的教會，有熱心捐獻怹的物資，實在無見笑怹的活動教會的名。怹的疼主，怹的疼教會，實在是咱所著學--ê。現時卓輝隆牧師，佇遐真gâu指導。向望主愈祝福怹，榮耀伊的名佇金山的所在。是金的教會！ 吳天命報 「九分教會堂獻堂式」《台灣教會公報》675期 .1941年6月 p.23-24 照頂般所捌報佇紙上的九分教會堂的建築的事，已經竣工，佇4月28號下午3點鐘，有舉行獻堂式。彼日卻有落雨，總是猶原真盛況。台北中會議長葉金木牧師來主式；也有吳永華，駱先春，卓恒利，吳天命諸位的參加佇獻堂式的工作。北部大會議長陳溪圳也有拍工來慶祝新聖堂的落成。 聽本堂的詹添木長老的報告，受真大的感激。因為工事費倚欲成萬箍，除去佇外位的緣故者所獻的小部分以外，攏是本堂的會友佮本所在會外的好心人來獻的 ，大家和氣協力來成這个聖工。詹長老有強調這點，就是講，今仔日聖堂會得通竣工，完全毋是一个人抑是兩个人，抑是一部分的人的氣力，就是九分全教會的氣力所協作來成的。伊講九分教會約有80名的會友，是kah 若一條索有80 kó͘，伊猶未發見chí 80 的中間有臭爛去的，所以是真勇的索仔；若有一股臭爛--去，也是真oh成這个聖工。伊真滿足教會的一致協力和氣，相佮做工的現狀，實在我聽了真感謝的所在。九分教會會得hiah活氣，是無奇怪的所在。詹長老萬事歸榮光上帝，歸榮光伊的教會，無一絲仔的歸榮光家己的所在。九分教會真幸福，有這款柱石 teh指導，我確信這號教會的確欲得著主大大的祝福，主猶欲用這个教會，佇九分，佇北部，佇全台灣來榮耀伊的名，來替伊傳道，祈禱，做完者來指導社會，來做世間人得救的所在。教會堂起佇山頂，雖是大部分木造的，猶久是是真媠，佮地理的的環境不止有四配的所在。大會議長祝詞中講，是kah-若起佇郇城，實在是合宜的表現。 為著欲慶賀這个聖堂的落成，九分教會的青年佮囡仔有備辦學藝會開幾若暗，這也是這間活氣的教會的特色。順機會傳福音，介紹基督攏無lak kau的所在。向望一間教會益發得著主的能力佇新的聖堂有新的活氣，通來做地方的鹽佮光燈。 |