秦熙傑 ê 小傳

潘水土報《台灣教會報》483卷 P.8-9，1925年6月。艋舺教會姓名簿 成人部 第122號記載：秦熙傑，1923年9月2日由陳清義牧師領洗，時22歲。 

熙傑君是艋舺ê會友，獨身ê青年。伊ê原籍tī大溪。伊細漢就讀漢文，後來koh 讀公學校到卒業，了後就來艋舺hō͘伊ê阿叔牽成，若是伊ê身體衰弱，常常破病，經過濟濟醫生ê手頭也是平常。不幸tī 舊年7月koh發病就入松山病院，攏無較好，然後koh轉入台北病院，若是伊ê病症日日那重，到2月28號就別世。享壽24歲。

Hit ē晡我chhōa會友十外人到赤十字社ê葬式場執行葬式ê禮拜，也濟濟人送到塚埔--ni̍h。

Chit 個熙傑君照我查考有thang做咱ê好模範。

1論伊ê性質。對細漢真溫純、謙卑、吞忍、仁愛、尊敬序大、疼序細，佮人和睦，無貪心，無食薰，無lim 酒，hō͘人信用，凡事謹慎，伊án-ni行有合 tī聖冊ê教示。

2、論伊ê信仰。伊對tiàm伊ê阿叔ê米店就常常佮朋友來聽演說會。禮拜日續來聽道理，無久就買聖經、聖詩，勤勤講究hit ê意思。無久明白基督教是宗教中第一高尚ê宗教；所以tī大正12年9月2號，hō͘陳（清義）牧師問道理續入聖會。伊對洗禮了除去身體不安，以外罕得歇禮拜。Koh聽見人講，伊若閒ê 時就讀聖經，祈禱，有時講道理hō͘店內ê人聽，也勉勵in阿叔3個囡仔來做主日學ê學生，又koh若beh來禮拜ê時較常有招in ê朋友來聽道理。雖然tī破病中猶原常常讀聖經佮吟詩、祈禱，也有讀濟濟ê宗教冊。伊安妮有teh 盡基督徒ê本份。

3、論伊ê遺言。伊beh死ê時苦勸伊ê阿媽、老母，著服事上帝，後日才thang相見面tī 天堂。Koh苦勸in m̄-thang 煩惱，世間是親像客館。到teh-beh過氣ê時，kā伊ê 阿媽、老母講，「我beh來去lah！」面笑笑就過氣。隔日是禮拜日，伊ê阿媽佮老母有來拜堂聽道理續kā赴葬式ê人說謝。

今ǹg 望看報ê兄弟姊妹替in祈禱，ǹg 望in會成做上帝ê百姓，是我ê心所願。