石安慎 訪福州上海蘇州

石安慎記 「蘇，上，福的狀況」 《台灣教會報》 380號 1916 年11月 p.5-6 原文是白話字。 

頂幫我佮我的家兄石安爵對 （1916年）6月23號有去福州，上海，蘇州看教會文明的所在。到7月20號才倒來台灣。今愛將所看見的簡略來講，排列佇下底：

(1)福州的所在，教會不止活動。街市也不止鬧熱。每日往來的人親像台北共進會往來的人遐濟。約有七，八十萬人。拜堂約有20間。福州城外有一所在是叫做南台的所在，也有拜堂幾若間，有的不止大間。第一大間的會坐得2000人，內面一个風琴4000箍。做禮拜的時有歕笛仔。牧師有予會友念門徒信經，十條誡，祈禱文。來禮拜的人男女不止整齊。穿長衫佮轄裙的人較濟。教會有設學堂不止濟，也有神學校，也有男學，女學，婦學，高等的小學。有一間英華書院生徒有500左右人，早暗攏有禮拜。也有格致學校，生徒有270人。彼內面有一个先生會曉台灣話，有請我講道理佇福州城內太平街的大拜堂。格致學校的先生有共我通譯福州話，有招集不止濟人來聽。

教會有設一間青年會館，約有20萬箍起的。會員約有兩千。有分3種的會費，每年逐人，有的納8箍，有的納30箍，有的納100箍。內面有運動場，看新聞的所在，浴場，教室，講堂。講堂現今較細間，會坐得500人而已，有欲閣起一間講堂，會坐得1500人。教會抑是世俗若欲入會攏會用得。福州的教會咧興起，較濟是對學堂佮青年會來加添的，總是對別款來加添的也有。

(2)上海的所在，教會比福州是較大的教會，街市比福州加倍的鬧熱。街路較有衛生，天氣不止好。美，英，法的租界街市不止美麗。四方的好額人較濟移居來上海；上海各國的人不止濟，也有印度人6月天包頭布咧做英租界的巡查。街路有電車，往來的人不止利便。上海也有跑馬場，身邊有一間親世界有四層的大樓，各層有不止濟維新的物，佮各款的動物。若欲入去看的人著先買入場券。河墘有外國公園，也有上海人的公園。有傳教師逐日佇公園內咧佈道。來聽的人不止濟。上海的拜堂比福州閣較濟。也有查經會，就是聖經的研究會，是禮拜堂的附屬，起親像學校的款。上海也有外國人的拜堂。佇上海教會猶原有設男學，女學，各款有幾若間。也有青年會館，比福州有較大間。會員也較濟，教室佮講堂，以及等等攏比福州較大。對青年會來信主的人也袂少。上海有一間教會的冊房，伊的字號是美華書館。不止濟位的先生咧著冊，翻譯不止濟國的聖經佮道理的冊。伊的地場約有枋橋市區的大。孔學會有一位西國牧師有派一位本地先生專工chhoā阮兩人坐電車，去看各教會文明的所在，所看的有真濟，總是所寫的是簡略。福州，上海的西國先生佮本地先生幾若位有託阮共台灣的教會請安。

(3)蘇州的所在，對上海閣坐火車向北20舖。蘇州是早時乾隆君有去彼所在，所以佇遐的厝較濟攏是翹脊厝。城內橫直三舖外，街路也不止有衛生，男女不止文雅。教會有設高等的小學，不止大間，也有4間男的中學校，4間女子的中學校，大學男女各一座，也有北的長老會，南的長老會，也有浸禮會。總是若欲起學堂，大家攏有聯合來起。有一間禮拜堂樓跤是禮拜廳，樓頂有寫一个匾，寫問道所。問道所的內-論有兩間，一間予人拍球，做室內的運動，一間咧予人通看教會的小冊，佮佈道單。每日有真濟人佇彼內面咧問道理。對按呢也有得著真濟人來信主。蘇州的古蹟不止濟。有兩支出名聲的塔，一支是虎丘塔，一支是北寺塔，內面有不止濟古蹟。

蘇州有一間大間佛寺，內面有千外身的偶像，逐身比人較懸大。較大身的有三四丈懸。雖然是按呢，毋過內面生凊生凊，荒廢荒廢，偶像佮廟，有歹真濟，內面二三十个和尚穿到襤襤褸褸，看了不止可憐，對按呢來看宮廟，漸漸荒廢，教會設的學堂以及禮拜堂漸漸那發展。今向望佇咱台灣教會佇逐所在亦是會按呢生那進步。