顏永成嬸洪仙河 (1846-1925)

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

陳思聰撰 「故顏洪氏仙河」《台南府城教會報》486卷 1925.年9月 p.14-15


洪氏仙河,一名叫永嬸(永成嬸),現時人稱呼伊做顏先生媽。佇1846 年4月8 日出世佇台南市南和街,老父洪乾興,老母莊氏。父母做船頭行的職業;細漢的時父母家計較艱苦。伊有兩個兄,兩個小弟,28歲的時嫁hōu 磁仔巷街顏永成叔,後來就生1個查埔佮兩個查某子。

佇37歲的時對1個姊妹陳氏蓮(Koè姆) 得著道理。因為永叔做生理佇灣裡街(善化),永嬸著佮伊企起佇 hia。雖然蹛灣裡街離真遠,iáu-kú常常來台南禮拜。

當時頭社佮番仔田也設拜堂,總是無(傳道)先生蹛hia。Hit-tia̍p較常有牧師、傳道先生行路到番仔田、頭社做主理講道理。因為當時未有火車,路著對灣裡街經過,每拜六較常歇佇永嬸兜。永嬸也真好款待傳教的傳教的就趁機會佈道佇 hit地方。對án-ni灣裡街地方百姓佮教會內的人攏公認伊是入教、欣慕道理的。

佇40 歲的時永嬸就chhoā 伊的子(顏振聲)來台南交託高傳道師長伯kā伊教字母、道理,到隔年就 hōu 伊入長老教中學。了後也hōu伊兩個查某子接續來讀女學。 佇47歲,就是明治26年(1893年) 9月10日,甘牧師(甘為霖)佇灣裡街 kā伊行洗禮。無扑算入教了後伊的丈夫永叔生起窘逐,怨恨講:「你hōu我chiah-的子攏去入教beh連累我無祖宗、無公媽。」 對án-ni 永嬸抵著大大窘逐、濟濟悽慘,iáu-kú gâu吞忍。甚至到尾也引chhoā 伊的丈夫、姪婦、親戚、朋友,幾若人來信道理。

對這時就將伊的厝做禮拜堂。台南神學校每拜六就派學生去hia 做主理禮拜。

50 歲的時麻豆教會信徒抵著受害。Hit時匪類也chhoā來灣裡街,beh 刣(殺) in 1 家;佳哉in第先走,刣無著。

佇53歲的時不幸丈夫永叔過身,54歲就toè伊的子顏振聲先生來企起佇台南。佇-hia 真久佮文姑娘(文安,Miss Annie E. Butler)、朱姑娘(朱約安,Miss Joan Stuart)、去城內、城外佈道,盡力行,無厭倦。Koh佇安平初初設教會的時,伊也真有干涉。佇教會中伊真熱心守道理,守安歇日,出力獻錢佇教會。逐年伊的子若beh kā 伊做生日,伊就將hit 條錢提來獻做教會的路用。

Koh佇信徒中間若有m̄ 抵好的,常常相勉勵、相安慰、相幫贊,無惜伊的氣力。

Koh 若有某教會募集捐項,伊也盡數會鬥出力。親像本年善化拜堂移轉建築,伊也盡數會寄付錢、寄付椅條。到beh死hit時也數(siàu)念善化的教會。

可惜因為少年的時艱苦拖磨,到老身体較軟弱。 對痚呴(he-ku)嗽的病,bē thang照機會到拜堂禮拜。雖是án-ni,常常佇厝內聚集家庭的禮拜,親像禮拜日相像。

論伊的治家真勤儉;gâu教示子孫祈禱、讀聖經;致意守禮拜日。伊本身也真致意祈禱。若有歡喜、抑是憂悶就祈禱,beh趁主的旨意。

無扑算6 月尾染著感冒;雖然有細膩照顧醫治,總是病勢那重,身体那軟弱,就佇(1925年) 7月27日hōu主召伊倒去天堂。享壽79歲。

伊的遺族有1個後生,1個查某子,20個孫仔。

後生就是顏振聲先生,做醫師真久,也是台南有名的醫生的 1個。Koh也是台南堂會的長老。 查某子(阿鸞,又名鳳儀) 1個嫁hōu傳教的,因為丈夫(林廷貴,又名毓奇)過身就轉來蹛台南。

大查某子(顏阿鶴)嫁hōu 吳道源,無久死去,有放6個孫仔佇廈門、爪哇。1 個佇美國,學士已經提了,無久就有碩士的地位;兩個佇日本東京明治大學法科;1個佇中華北京醫專;1 個佇東京女子醫專;1 個佇東京醫專;1 個佇內地中學卒業了,現時預備入學;1 個佇台南第一高女;1 個佇台南長老教女學校;4 個佇日本森松小學校。án-ni thang 講攏是真好命。

佇8月6日午後兩點,佇太平境禮拜堂有做伊的告別式,請高金聲牧師做主理。來赴會的人有1000外名,也有弔電、弔詞、聯軸、花車、人力車、鮮花,醫生會的團体、主日學的團体,非常的濟人,thang講真鬧熱。這thang指出先生媽一生的做人佮熱心信主,所以有生出這號好的結果。實在thang hōu咱學。

 

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述