宜朝清小傳 (1893-1929)

卓偉臣撰 「宜朝清小傳」《台灣教會報》531卷，1929年6月  

傳道師宜朝清，伊e5本所在ti7高雄州旗山郡杉林庄新厝仔，伊e5父母早早就過身，細漢e5時攏是倚靠伊e5公牽教。Hit-tiap8 新厝仔有教會ti7 hia,伊e5公宜生不止熱心拜上帝，就hou7伊來讀中學。後來tu2我來ti7溝坪(柑仔林教會遷建於菲菜崙後，改稱溝坪教會，今永興教會的前身)做傳道，我有設1間教會e5小學，hit時我就請伊來教小學，所經過e5成積不止好。後來阮看伊不止關心ai3做教會e5工，所以有舉荐伊來讀神學。伊卒業(畢業)就去toa3 ti7溝坪、頭社、關仔嶺、東後寮e5教會。

Ti7今年(1929年)傳道局有派伊beh去toa3 ti7岡仔林e5教會，伊ti7 4月14 e5禮拜有轉任去岡仔林。Koh過禮拜倒出來beh設法伊e5行李入去，無扑算到新化街，伊就起急性e5肺炎，食藥無效。到(4月) 21日就離開世間，今年37歲。

論伊toa3 教會不止盡忠做工，也是真活動，無論toa3甚mih教會，m7 bat-聽見kap人衝突，ti7社會不止平和，這也是真thang可取。

上可惜thang替伊掛慮e5就是伊現時有5個半子，就是1個iau2 boe7-出世，伊e5子攏iau2真細漢，聽見伊過身，身軀邊攏無遺產。

今宜先生娘beh維持hiah-e5細子過日，實在有長長e5掛慮。大向望列位相疼e5好朋友為著伊e5家眷來鬥同情，來伊祈禱上帝，這是心所大向望e5--。