首頁/  English / Japanese Entries/ 本土信徒 / 史話 / 諸家論述 / 宣教師 / 外國神父修女 / 原住民 / 日人列傳 / 賴永祥著作/  馬偕周邊 / PCT/  劉家雜錄

講起已經過往、熱心e5聖徒e5名，來追念伊thang 0-lo2 e5信德，實在是咱大家e5利益；亦是顯明上帝e5榮光。葉拔荔兄真正是咱大家所著數念e5信徒。伊ti7昭和9年(1934年)12月22日下晡7點，知上帝召伊歸天e5時已經到，就召集家內大細來做禮拜，家己揀聖詩第19首「我目kiah8去向天，上帝所tiam3所在」，kap家內e5人相kap吟。禮拜煞，講伊sian7,就倒落眠床安眠、好睏，享壽67歲。

平素kap伊相bat e5,聽著這個消息，的確beh講中壢教會有失落1個好模樣e5信者。拔荔兄真正是好e5模樣；論守禮拜，對我舊年(1933年) 4月來赴任以來，伊m7 bat歇1禮拜，m7 na7 an2-ni，伊e5厝離拜堂不止遠，iau2-ku2伊是第一早就到拜堂。論獻金伊亦不止甘，thang講伊實在是盡伊e5氣力ti7 teh獻。論對ti7上帝e5話e5態度，也是真可取。Ti7聖經會、ti7聽說教，伊無peh起peh落，是真關心aN3耳孔teh聽。雖罔所聽e5無逐句會明白， iau2-ku2伊e5心真熱。我信，伊teh聽道理e5態度，的確m7是ai3 beh聽講古來得著好笑；就是tui3枵、嘴礁、欣慕義e5心、ai3 beh聽上帝e5話。上帝e5話講100句e5時，伊若會thang得著兩句na7 tiaN7，伊亦是的確真滿足。因為伊e5做人實在謙卑，伊知影家己e5氣力，伊m7敢用家己e5氣力beh理解上帝攏總e5真理。對ti7上帝e5話，伊是謙卑，是用感謝e5心teh聽。Koh再伊ti7教會e5生活，是順趁e5生活，是感謝e5生活。Ti7教會，伊是ai3奉事，m7是ai3支配；所以攏m7 bat聽見伊對教會有囥甚mih不平抑是甚mih無歡喜。伊常常告白家己e5無夠額，m7 bat嫌別人。

親像這款，實在thang講是真實bat主e5基督徒，實在thang做咱e5好模樣。咱著數念這個聖徒來學伊e5信德。