艋舺教會的長老林添火兄，佇57年前有出世做艋舺教會的林戇長老的囝。得著伊的老父的栽培，佇細漢的時就領洗禮。到16歲的時，就是41年前，有去淡水入神學校研究神學，聖經，備辦通做傳道理的人。彼時相佮讀冊的有21名，這中間有人退學，有人煞工，有人過身，到今仔日所賰猶teh做工的只有兩個，就是蕭安居牧師佮鄙人（陳清義）。阮大家受偕牧師的教養，林長老對彼時就真gâu做人的朋友，熱心綴主。過幾若年後，偕牧師就派伊去佇板橋社後禮拜堂做傳道師，直接傳主的道理。後來因為都合上，就離開直接傳道的工，來奉這做巡查，勤務佇板橋支廳幾若年的久。後來辭巡查的工，就倒來佇艋舺，料理家事到佇過身的時。

林添火兄，對艋舺教會不止有出力幫贊傳教的人，佮其他教會的要項。伊佇1915年(大正4年)4月25日，有受揀做艋舺教會的執事，盡忠做主的管家。到佇1918年(大正7年)4月28日，就受揀做長老，按呢做長老攏總有15年的久。佇這中間gâu幫贊教會的財政，信仰，精神方面gâu做後輩的模範者。通講艋舺教會，精神方面，物質方面，受伊的幫贊不小。對會外，對會內gâu佮人和睦，熱心服事主，真有情義，gâu數念古輩的人。伊的一生，身軀卻無真勇，猶久盡伊的心力，努力，身力來援助教會，實在是感服的所在。出喙是呵咾人的好，罕得講起人的歹，真正是可敬的紳士，是可風的基督徒。

不幸佇1934年(昭和9年)2月7號有感冒，紲變做肺炎，食藥無功效，佇2月16號，午前5點50分，有受主揀召，伊的靈魂佮主永遠蹛。今伊已經煞世間的事，親近主，享受天堂的福氣。這毋是伊有功勞，就是對倚靠主基督的贖罪恩，才有通享受天堂的福氣。這是到極確實的事，因為耶穌已經完成救世的功勞，代先去替信靠伊的人備辦所在。感謝上帝，佇悲哀中予咱有這號確實的向望。今深望遺族佮伊的朋友，信友等話學伊的腳步，來信靠基督耶穌，就將來穩當通相見佇天，也通相佮享受新天新地的福祿。