「數念故人─故 林淇漳 先生」 《台灣教會公報》946號 1964年11月15日 p.14-15

按： 林淇漳 醫師，1899年7月20日生於嘉義，是林榮仁、蘇祈安的次男， 1964年10月15日去世，享壽66歲。妻陳福治，曾於1956年為嘉義縣模範母親，育男林瑞庭、林景修、林建中、林達明，女林玉華、林祝英。

故 林淇漳 先生是嘉義東門的長老，佇1964年10月15號過世，享壽66歲。

林長老是嘉義市的出名的醫生(長春醫院)，自民國9年(1920年)畢業醫學院開業做醫生到過世，40外年久，醫術也好，醫德也好，救人的性命非常濟。

論伊的做人所貢獻予人數念的，毋若佇教會內的工真顯著，就是佇教會外社會界真顯著，予人閣較欽仰。親像佇光復的時，嘉義市受著爆擊損失真重，而且田園失收，米糧大起價，百姓人直直beh無通食的人非常濟，淇漳長老看見按呢，佇光復keh轉年春天，心內特別憂悶，招集嘉義的紳士幾若人來組織米糧的平糶會，本身予人揀著做主任委員，來設法糶俗米的事業，雖然工作真歹做，猶過任勞任怨，予嘉義市一時的糧食的難關oē通打開，到伊過世猶過予人 teh數念。

上hit年的年尾，嘉義市beh設救濟院通救濟無依倚的老人，病痛的人。救濟院成立了，紲揣無人通主持，結局著請 林 先生做院長，了後閣擔當這个救濟 院財團的管理人。到38年招嘉義參議會的議員等9 个人創設私立博愛救濟院，就受選做董事長兼院長，對按呢，予這个基礎薄弱的救濟院直直發展，內面設備到有安老所，西醫所，習藝所來救濟chiah-的無通 依倚的老人，囡仔，乞食等。

自擔當董事長兼院長了，經過10年久chiah是院長的工，閣到今年的 5月尾，因為身軀的欠安辭去董事長的工，愛beh專心養病，佇養病的中間，也是心心念念關心救濟院的事，可惜病體袂通恢復，到10月就過世。

林長老自少年的時得著道理，到民國29年就受選做嘉義東門教會的執事，到34年閣受選做長老，熱心服務教會，到4年前chiah退休，按呢前後22年久當職佇教會。

伊一家通講也是一个基督化家庭，而且囝兒攏真出擢。

先生娘(陳福治)佇幾年前捌受選做模範母親。

大囝(林瑞庭)是日本的醫學博士，現時佇日本開外科病院。

二囝(林景修)也是醫生，接紲老父遺業做長春醫院的院長。

三囝(林建中)是化學工程師，現時佇德 國讀 博士課程。

四囝(林達明)是日本的化學碩士，teh-beh閣去美國深造。

大查某囝(林玉華)是醫生娘，第二查某囝(林祝英)是工 程師的 太太。

囝孫真濟，通講是有得主祝福。

願伊的好跤步留到久久通鼓勵人。