張安貴，別名道三。
明治7年(1874年)8月7日出世ti7萬巒四溝水。
老父陳坤元，連生5个後生，安貴是第5囝。
外公(張阿金)無查埔孫，ti7伊度晬e5時，老父歡喜將伊送外公。
彼時外公toa3
ti7竹田庄二崙，每聖日去杜君英禮拜。
彼霎巴牧師致意愛設教會ti7二崙，外公歡喜將伊e5厝獻做拜堂。
巴牧師chiah去設教會。
庄民真怨恨道理，毋准設教會ti7
hia，致到起大攪擾，擔屎來潑，巴牧師險失落性命。
In一家受庄民大怨恨，厝予in
佔，傢私物件予
in搶；soa3擊出庄，全家姑不將走去bih杜君英禮拜堂暫toa3。
為著in叔錦郎(Kím-lông)
hiah熱心ti7教會，庄民同心欲掠in叔來刣，in就暗靜逃走避難來台南新樓。
無拍算到位就染著流行病soa3別世來葬ti7東門埔，彼時33
歲。
Ti7 13歲的時，恩師巴牧師來巡教會，得著伊e5疼惜，有kap公媽打合欲
chhoa7伊去台南讀冊。
彼時伊ti7街仔看人掠魚，in媽將伊e5衫褲kap的，包好勢，就去街仔chhoa7伊，路裡共伊講今仔日巴牧師欲chhoa7你去台南讀冊。
阿媽共你講道理毋通放sak，著立志toe3恁叔錦郎
e5腳步，將來就有出頭e5日。
到厝kap公相辭，公77歲衰弱ti7床中，看伊欲去，目箍紅，話講be7出。
巴牧師就chhoa7
in祈禱離別來台南讀冊。
彼時7月歇熱倒去，媽看著伊開聲哭，因為公抵埋葬3日，情境真哀傷，干單媽家己一人teh
toa3，到開學就閣來台南讀冊。
讀5年了，巴牧師常來找伊，問明年e5意見按怎？
入醫館做醫生？
抑是入神學做傳道？
照我想做傳道第一好。
總是著祈禱，向望上帝指示。
後來決定就入神學，做學生所領雖是小可，總是對伊勤儉粒積有寄予媽用。
讀到第4年，日本來台，地方擾亂，學校停，學生倒去聽候太平，8月中媽病，伊盡力照顧，合主的意思，ti7
9月就召伊離開世間。
享壽69
歲。
伊33歲年尾卒業，正月toa3竹仔腳教會。
Tui3恩師劉俊臣e5介紹，年尾ti7里港佮黃氏來好完婚。
隔年轉任內埔，抵著土匪來舂乓，衣裳物件真搶。
閣轉任去加吶埔e5第5年，土匪擾亂地方，害庄民，失落厝宅kap性命e5真濟(多)，總是對伊得著憲兵e5信用，會友kap庄民受伊致蔭e5
be7少。
然後有去toa3
馬公，大社，大肚，山豹，屏東，左鎮；其中予左鎮，山豹兩堂會請做牧師12年久。
為著左鎮拜堂受白蟻損害真危險，會友較濟是散鄉，總是對伊盡力鼓舞，會友就同心出力，得著主幫贊，拜堂新築就完成。
Ti7伊56歲e5時，就辭職來屏東徛起，toa3拜堂做工共33年久。
雖然無在職，猶久伊傳教e5工無煞，常去隔客庄佈道，閣受女宣道會託伊去萬巒幫贊女傳道黃水妹做工。
Ti7 8月23號起病，雖然經過真濟醫生盡力醫治，無奈主e5意思已經成，愛伊煞世間e5著磨，ti7
9月17號頂晡4點安然受召入主靈宮，享壽60
歲。
做通安慰伊e5遺族，就是病中家己致意祈禱，也愛人替伊祈禱，常吟詩愛聽道理，閣致意家庭禮拜。
閣ti7臨終e5時有講：我真歡喜毋免閣toa3世間受苦，我將恁交代耶和華，願耶和華祝福恁。
恬恬有hiah久家己講："真好聽，真好聽。"
最後閣講："我欲來去啦，欲服事耶和華。"
Ti7 18號下晡3點ti7家己e5家做告別式，會葬者400外人。
伊的遺族有留牧師娘，4个後生，5个查某囝，三個娶了，也三个出嫁，內外孫15个。
大囝純恩toe3伊e5腳步做牧師，二囝純敏齒科醫學士，三囝純璋助理家庭事務，四囝純穎在校中；也大囝婿許崑牧師，二囝婿黃達德訓導，三囝婿謝基全訓導。
論伊做人是勤儉樸素，忠厚，老實，閣溫柔和平。
做工盡力閣勇敢phoe命，說道有得著主幫贊gau5感激人。
幾若个宣教師捌呵咾伊gau5講道理，soa3號伊做第二個金嘴牧師。
閣有會友講：若張牧師teh講道理，雖是著去便所，也吞忍愛聽到煞。
今伊e5工明白啦，通講伊真福氣。
我簡略寫伊遮e5履歷予大家知，來相數念。
願主安慰祝福伊e5遺族。
阿們。
