偕牧師娘的小傳

 

 

T. C. G.(陳清義)寫 《台灣教會報》 488號 1925年 11月 p.5-6 [原文是白話字]


偕牧師娘是姓張名叫聰明,台北五股坑庄的人,佇主後1878 年5 月27 日有嫁偕牧師(偕叡理),踮佇淡水不止久,後來有搬來台北企起。伊bat 佮偕牧師出外四界巡視教會,也bat 佮伊做陣去加拿大兩擺,1 擺是對西爿去,有經過幾若國,就是印度國、猶太國、法國、英國、美國,chiah-的國度。台灣的婦仁人行遐遠,佮世界一周,káⁿ是伊而已。

聖經所講的所在,伊也有看不止濟位。Bat 聽伊講有去看埃及的塔,佮法老王的身屍,也有去看耶路撒冷、伯利恆、約旦河、死海;閣有去看非所bat有的火山,佮龐貝亞(POMPEII)的古蹟;也有看世界出名的大城,就是羅馬、伯林、巴黎、倫敦,算真有福氣,有看hiah濟的古蹟佮名所。

論伊一生的享福,不止齊備,伊的身体也真勇健。無扑算佇舊年6月18 日忽然tú著腦出血的病,真傷重,有請戴醫生(戴仁壽)kā伊醫治,佳哉有漸漸那好,會起來行。到這擺閣再起,就入佇馬偕醫院;陸醫生佮吳醫生也真盡力teh kā伊醫治。可惜無采工,就佇 9 月15 日下晡6點40分,離開世間,享壽65 歲。

伊的後裔攏佇台灣。伊有1個後生,兩個查某子; 伊的後生偕叡廉(Rev. George W. Mackay),teh做宣教師,就是淡水中學長,伊的媳婦是加拿大Ross 牧師的查某子。伊的大查某子(長女)偕氏瑪連有嫁艋舺陳清義牧師。伊的第2查某子(次女)偕氏以利有嫁大稻埕柯維思長老。現時伊的內外孫,不止濟個,也有1 個ka-ná孫。佇伊的孫的中間,有1個已經長成,就是柯設偕,現時teh做淡水中學的先生,其餘的 iáu teh讀冊。

今論伊一生的做 人,不止可取,濟濟人teh 數念-伊。伊真有仁愛,gâu疼人,幫贊人,也gâu款待人。早時佇淡水的神學生佮女學生,逐個有得著伊的款待。四方的會友佮傳道師,若到淡水,攏有得著伊的款待,因為伊是真大量的人。

伊的款常常歡喜,罕得看伊有顯出煩惱的款,也無驕傲,無激派,無愛佮人計較,真gâu吞忍;凡若佮伊相bat(識)的人,逐家呵咾伊。

伊佇馬偕醫院過往(去世)了,伊的好朋友,吳(吳威廉)牧師娘,有對親人討愛伊的身屍hē 佇怹兜,伊就佮伊兩個查某kā伊換衫,拭身軀;將伊家己的眠床予伊倒,將伊的人客廳予伊hē,真疼痛伊,攏無驚。佇台灣iáu-bē bat 看見按呢;凡若愛做人的朋友著學這款的好模樣。閣再劉牧師真出力設法做棺木,是西洋式,用烏布來編佇外面,有創1個空,入玻璃,予人thang 看伊的面;伊的身屍有chiam藥囥6日久才埋葬,因為teh 聽候偕先生對內地轉來thang看;佇彼 6日的中間,真濟人來bāi 喪 。

葬式彼日,伊的棺木有對(從)吳(吳威廉)牧師娘的厝,扛到雙連停車場,是伊的親人佮傳教師kā伊扛。後來對火車載到淡水的式場,就是淡水禮拜堂。彼日來會葬的的人,總共有6百外人。

葬式的順序

主理 劉牧師 (劉忠堅)

1.聖詩(136) 會眾者

2.祈禱蕭牧師(蕭安居)

3.讀聖經 鍾牧師 (鍾天枝)

4.說教劉牧師

5.聖詩(38)(本人生前愛吟)

6.履歷 郭希信牧師、林清火傳道師、李明悌長老

7. 講弔詞巴牧師(巴克禮)、陳瓊瑤牧師

8.讀弔詞詹富屋長老

9.讀弔電陳溪圳傳道師

10.答謝偕先生

11.聖詩(164)會眾者

12.祝禱劉牧師

後來中學的學生有扛伊的棺木,行列到炮台埔馬偕共同墓地 ,埋葬佇 a偕牧師的身邊。今伊的身屍到遮,逐家teh 憂悶;若是伊的靈魂到天堂,大家teh歡喜。按呢予咱thang 安慰。