K. Y. C. (陳瓊瑤)撰 《台灣教會報》488卷1925年11月 p.6-7

偕牧師娘矣(ah)！你的 gâu 做人，堪得 hōu 阮數念的好處，實在是真濟，講 boē得了。照我 tuì 1910 年 9 月中旬佮你相 bat 起，到今年 6 月18 號最後見面止，滿 15 年久，親身經過來深知你的做人，有3款：

1. 歡喜的人。

有先生講：「入基督教的拜堂禮拜，不時親像 teh 赴結婚式的歡喜；」這句話是有影的事實，可惜出拜堂外的會友，少少有 thang 看著這 hō 的歡喜。若看佇偕牧師娘就有lah。 偕牧師娘矣！你幾10年親像1日，時常歡歡喜喜， teh 做保羅所講：「M̄-nā 向望上帝的榮光來歡歡喜喜，就佇患難也歡歡喜喜」的這號生活的福氣人。

偕牧師娘矣！你以外，我iáu-bē koh 看著第2個；雖有常常 thang 看 teh 歡喜 的人，iáu-kú 無親像你 m̄-bat 無歡喜的面。偕牧師娘矣！你不時笑笑，hōu 人真愛親近佮你交陪、佮你講話歸日 boē 厭。這是 tuì 你有得救的歡喜，hōu 佮你坐的人會續得著你的歡喜來相佮歡喜；你笑的聲 iáu 佇阮的耳內，你歡喜的 面 iáu 佇阮的目前。偕牧師娘矣！你真正是歡喜的人 lah。

2. 和平的人。

見若 bat 佮你交陪的,無分邦國、無別宗族，無論外國、內地(日本)、本島的人；或是親、無親、相熟抑是新接面的, m̄-bat 抵著有佮你 boē 合的人。偕牧師娘矣！實在 m̄-bat 聽人講你的 ka-chiah後話，也 m̄-bat 一擺聽你講別人 的長短話。我想你 m̄-bat 這2字「不和」是啥貨houNh？偕牧師娘矣！你真正是和平的人 lah。

3. 仁愛的人。

逐人就有愛情 thang 疼伊所疼的人，獨獨bē bat 看親像你的疼hiah 闊。因為佇你的疼人，無有富貴貧賤的分別，也無有男婦老幼的精差。

偕牧師娘矣！你是 gâu 疼人的人，雖然有人會親像你的疼人佇1時，boē親像你的疼人的久長，佇一世人無 làng-chām 。

偕牧師娘矣！你 m̄-nā 疼你的學生，連 hiah 的學生子、學生孫，你也攏疼 in 親像你的親子兒，goā矣 ！你的疼的闊、大、久，實在是主boē 變換 ê 疼 lah。偕牧師娘矣！你真正是仁愛的人 lah。

偕牧師娘矣！你今離開阮去救你的主兜，你有帶你的歡喜、和平、仁愛去見天父，來受伊的歡迎，迎接你入伊的快樂所。偕牧師娘矣！你的歡喜、你的和平，佮你 的仁愛，也有留佇阮的中間，beh hōu阮佇地--ni̍h,m̄-nā thang siong來數念你，敢 m̄是續 beh hōu 阮學來 tè你的腳步-mah？

偕牧師娘矣！你有結聖神的果子：仁愛、和平佮歡喜；你用你所結這3 大粒的神果，帶去獻 hōu 主，所以主的心滿足歡喜鑒納。

偕牧師娘矣！今阮 beh怎樣數念你的 gâu 疼痛矣？是 lah，只有著學你所留的行做，時到，阮就 thang 帶你所帶去的3項神靈寶，好膽去見你的面佇咱的主的快樂國。阿們。

偕牧師娘--ah！你是巾幗中ê女英雄、天國中ê女將軍、教會中信徒ê模範老母 lah。願你平安！大家平安！