吳萬生撰 《台灣教會報》557期 1931年8月 p.9 [原文是白話字]

按：莊發長老的父親莊文作，由福建泉州單身渡海來到旗津，在渡船場旁開「莊松榮藥房」，經營中藥及藥材生意。莊發繼了父業。他信了主，一直在旗後長老教會，1929年任長老，1931年5月10日去世。有3男4女。撰者吳萬生是旗後長老教會長老。  

(莊)發長老，對我捌伊到今，知影以前伊來聽道理已徛30年啦。 前teh聽道理是奉行故事，雙腳踏雙船，上帝也好，王爺，媽祖也是好，巴力好，基督嘛好；有時來禮拜，有時出去燒香，身軀為著致病，艱難過日，所以有食鴨片來減輕艱苦，有時受苦勸就減食淡薄。 到這成十年來就嶄然解換，續一時就按呢決心毋食，這敢毋是基督的大氣力，大權能麼？ 我信是基督的疼teh催逼伊的心，若無是bē hiah緊解，因為伊的病症是愈久愈傷重，猶久外身予伊艱苦，刻己來toè基督的腳步。 雖然身軀真衰腩（弱），若予伊小可較看活，毋捌無去禮拜，有時無法得通坐，chiah姑不將欠席。 對（從）致病以來，佇各項事都是用祈禱。

(a) 論伊的治家嚴正，家庭的囝仔大細不止有禮數，閣有大有大，照風評，通講是模範家庭，大大大家真感服伊的道德，是以德服人，毋是以力服人，真正是人德的人啦！

(b) 論伊teh做商業，公平，以道德知，可稱是君子的人， 愛財取之有道，一視同仁。 閣gâu憐憫人，同情人的苦痛，憂同憂，喜同喜。 聖經講：憐憫人的人欲得著憐憫。 伊做保正20外年，予社會的人真歡迎，所以濟濟（很多）人為著伊傷悲眼淚伊的做人！ 實在人格者！

(c) 今論伊對教會不止熱心敬虔疼主。 出錢真甘心，祈禱真敬虔，較常著歸teh，兩年前升格做長老，凡事好商量，閣是真有經驗有為的人物，常常毋著教會佮家庭的後繼者teh考慮？ 我深信伊有信，有向望，有仁愛，的確有得著出頭的生平，少年是勞碌，中年到當今是勞心。 佳哉終局對主得著安慰，通講是不幸中的幸福，暫時的艱苦佮風波今過了，通入清靜的天國，享受袂衰退，袂廢無的安樂家，佮聖徒上國，佮天使上家，世上安樂無通相比！

(d) 伊的做人有疼骨肉，到欲過往事先猶久teh記念伊的兄哥，體貼伊的艱苦，將性命保險金仟二閣欲三分一予伊生活，就是400箍（圓）。 閣400箍欲予教會做基本金，400 箍欲做伊的喪會，逐項寫清楚，也頓印頓好勢，有齊守律法：一，疼上帝；二，有疼人，佮上帝有清楚，佮人有明白。

佇5月初10日，下午7點10分予主召伊倒去，享壽60歲，善終過往。 彼時抵抵傳道先生teh替伊祈禱，祈禱煞chiah過世！

伊有3个後生，4个查某囝，攏有讀冊相當的學問，內外孫共20 外个，通講是好命。 紹祈求，子承父業，詼仙事，子振家升，寶號示開（松榮），龍出龍囝，虎出豹兒。 雖然教會減一个柔物，天國加一个良將。 到6月15出葬，會葬者雖然落大雨，猶久有倚4百左右，大雨中罕有的鬧熱。 簡單寫按呢上報來煩同道兄姊的慧眼，也望列位soà替怹的家族、後裔祈禱，是敝人的大向望。