禮物 小 說 讀了ê感想

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

Chng Hūi-phêng(莊惠平)撰 《台灣教會公報》3586 期 2020 年11 月 16-24日 p.25 台文世界。題目:David Lu.《アルトーロの贈り物:80こして初めて会う我が子との心の旅》 禮物小 說 讀了ê感想 。

Arturo 原本 beh hông 打胎。hit 當時 in 老母 Andrea 是一个 有身 ê 未婚 cha-bó͘ gín-á,去法國 chhōe 阿姨參詳,tī-hia 收著 New York 來 ê phoe, 是 gín-á ê 老父 ê 回覆。「Siōng 好是打胎。」靜靜考慮 打胎問題,tī 聖母院得 tio̍h ê 啟示是講我 mā ē-tàng 成做 老母;胎兒是我 ê,若無上帝賞賜性命,胎兒 bē 存在。 「打胎」kah「thâi 人」是仝款,就無去「打胎」。因為 疼,無顧 ka-kī 本身利益,hō͘ 伊悔改,決定 kā 生落來, 家己晟養大漢,這个 gín-á,後--來 soah 成做原本決定打 胎 ê 親生老父武彥 ê 禮物。 主角武田武彥(たけだ たけひこ=Takeda Takehiko)是 出世 tī 台灣 ê 日本人(日本語:湾生),經歷太平洋戰 爭,本身 mā 是基督徒,是出名 ê 英國 kah 美國文學學 者,對伊 ê 性命過程有幾方面 ê 感觸。
戰爭 ê 無情
1945 年 5 月 31 是一生難忘 ê 日子。台北受 tio̍h 地毯式 ê 轟炸,總督府 kah 軍司令部遭遇破壞,真 chē 厝宅受燒 毀。死亡成做日常食食 ê tāi-chì。對台灣人來講戰爭 siōng 無情,就是換朝代,頭家換人,換語言,對西班牙、荷 蘭、鄭成功、清國、日本和國民黨政府直直換,lóng 是 外來殖民政權;對外 ê 戰爭 soah,新頭家對內又是另 外殘酷 ê 大屠殺,死 ê 人攏是千千萬萬,像二二八、白 色恐怖,影響偌濟人、偌濟冬。台灣獨立才有法度解決 hông 殖民 ê 運命;語言每換一 pài,知識 ê 累積,koh 重 新開始,知識份子至少一代人 koh 變 é-káu,像作者 1928 年出世,自細漢受日語 ê 教育,戰後轉學到中華民國政 府下 ê 台灣大學,受強迫改用北京語來受教育。
異族鬥陣 ê 問題
日本偷襲珍珠灣了後,Andrea ê 厝邊 Take-chiàng ,mā 是伊 ê 青梅竹馬,日本美國人,hông 強制收留,Takechiàng 為 tio̍h siám 強制收留 ê 束縛,koh 表現出對美國 ê 忠誠,就志願進入美國陸軍,tī 1944 年 10 月 30 日戰死。 Kah 九一一恐怖攻擊事件了,穆斯林族群 tī 美國 ê 處境 相 siāng;日本時代庄司總一所寫 ê 小說《陳夫人》男女 主角:劉青雲 kah 安子 ê 愛情故事(台日聯姻)koh 有無 仝 ê 處境,日本台灣人,台灣日本人,角色 ê tak-tîⁿ;尤 其是血統、傳統 kah 條件無仝 ê 人之間,beh 如何、到啥 物程度,來達成疼、理解 kah 融合。
藝術教育方面
冊中顯出古典音樂應用 tī 日常生活是真四常 ê 代誌, 會當講是藝術生活化,毋知是日本教育 ê 樸實,抑是教 會生活 ê 養成。像講隨處境變化配合 Beethoven〈莊嚴彌 撒曲〉裡面 ê“Kyrie Eleison”(主 ah,求祢憐憫我)、 Vivaldi ê〈四季〉、Rossini ê 絃樂帶出第三號奏鳴曲、 Saint Saens 用管風琴伴奏 ê 第三交響曲第一樂章進入 Poco Adagio、Mahler ê 第五交響曲、Mozart ê 降 E 大調 小提琴奏鳴曲第二樂章 tùi G 小調轉做降 E 大調、Sain Saëns ê“Le Cygne”(天鵝)等等。
宗教信仰方面
武彥苦惱無法度消除 Andrea ê 束縛 kah thâi 死胎兒 ê 罪惡感。求道當中,比較佛教 kah 基督教;若是佛教徒,in 某 幸子有積功德,tang 時 to̍h ē koh 輪 迴,tī 極樂淨土生做人,tio̍h 算她是完 美 ê,mā 一定 tio̍h hāⁿ 過幾个輪迴 ê 障壁;伊是一个無 完美 ê人,tī 世間 lóng 無積任何功德,若是輪迴出世做 乞食 to̍h bē bái,kiám-chhái ē 出世做畜牲,無法度保證 ē-tàng kah 幸子死後 koh 再見面,ē 一直繼續 tī 陰間 ê 路 途徘徊。無法度想像一个無幸子 ê 世界,i 管是活 leh á 是死去,若是無法度 koh 再看 tio̍h 她,to̍h ē 討厭生死相 關 ê 一切。Tī chit 方面,基督教真清楚。若是告白 ka-kī ê 罪,而且 óa 靠耶穌來贖罪,tio̍h 算像我 chit 種 ê 罪人 mā ē-tàng 入去天堂。經典方面:《歎異抄》(Tannishō)欠罪人 ê 懺悔 kah 告別,he 是認罪來歸依耶穌。用佛法 ê 話 tī《歎異抄》chhōe bē-tio̍h ê 概念,tī《路加福音》中 chhōe ē-tio̍h。
美國文學方面
對美國偉大作家 Edgar Allan Poe ê 名作〈烏鴉〉(The Raven)、kah Hawthorn ê《紅字》(Scarlet Letter),有 精闢 ê 分析評論。《紅字》內底 ê 男女主角 Hester kah Dimmesdale tō 若像伊 kah Andrea 角色相 siāng。
疼 ê 見證方面
Andrea ê 疼無 kā Arturo 打胎,這是一種無顧 kakī 本身利益 ê 行為,真偉大,若無她 ê 自我否定,to̍h 無 Arturo ê 存在。Arturo ê 養父 Alfonso 無私 ê 疼,hō͘ Andrea 用《哥林多前書》13 章 4~7 節:「仁愛就是寬 容、親切,仁愛就是無嫉妒、無自誇、無驕傲、無做無 禮貌 ê 代誌、無自私自利、無歹性地、無抾恨。仁愛無 歡迎不義、熱愛真理、忍受一切、對萬事有信心、對萬 事有向望、對萬事有忍耐。」來形容 in ang;幸子用女性 自我否定 ê 疼支持武彥,tī 伊性命 ê ta̍k 種十字路口,放 下 ka-kī ê 利益來幫贊伊。上帝 ê 疼,派祂 ê kiáⁿ 耶穌基 督,ka-kī 並無罪卻接受十字架 ê 極端處罰,來 tháu 放人類 ê 罪惡。亞當違背上帝食「禁果」ê 罪真大;ē-tàng 為 chit-ê 罪來贖罪,一定是無罪 ê 人 chiah 有法度,i-koh tī chit-ê 世界上並無 chit 種完美 ê 人,所以,上帝 hō͘祂 ê kiáⁿ 成做人類 ê kiáⁿ 來出世,用無罪 ê 身來贖罪。 21 世紀 ê 台灣社會,宗教寺廟充滿著師父、榮董、 光明燈、安太歲等等, kah 16 世紀路德馬丁 ê 宗教改 革「關於贖罪券 ê 意義佮效果 ê 見解」ê 社會氣氛有啥 無仝?寺廟愈起愈大間,師父出入是進口名車,偌濟錢 才有 ê 榮董,光明燈 ê 位置若 teh 賣演唱會 ê 門票;koh khah 害 ê 是廟寺 hông 利用做選舉 ê 工具,siōng 慘 ê 是 為著錢 hō͘ 中國共產黨利用 ê 走狗。 台灣是多族群 ê 國家,毋通為著財、權勢出賣家己 ê 靈魂,享受台灣 ê 種種利益 soah teh thún 踏台灣;咱著 釘根 tī 本地,認同所有 ê 住民,通過疼 kah 受苦,來成 做向望 ê 記號。以《哥林多前書》13 章 2~3 節:「我若 準有傳福音 ê 恩賜,又 koh 了解所有 ê 奧祕 kah 智識, 甚至有堅強 ê 信心 thang 移山倒海,若無疼心,我就 lóng 無路用。我若 kā 所有 ê 財產 the̍h 來賑濟,á 是獻身 軀 hō͘ 火燒,若無疼心,chiah-ê tāi-chì 對我就 lóng 無利益。」互相勉勵。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述