傳道楊福春小傳

楊福春e5小傳 編輯室（是梅鑒務執筆）《台灣教會報》第360卷，1915年3月 由白話字改寫為漢羅台語下。 欲讀漢文者，可參見楊士養著《台灣信仰偉人略傳》第1集，其林信堅修訂的《信仰偉人列傳》1989年 p.175-180. 楊福春（1874-1914），二林人，任傳道，梅鑒務的書裡的Joyful Spring.  

楊君福春本chiaN5是二林人。主降生1874 年就出世。伊e5老父做糊紙e5工藝，子亦學這號e5頭路。Hit��糊紙e5工算是好趁，楊先生bat ka7我講，20年前1月日會趁13箍。tu2著hit時二林1個兄弟，就是扑銀e5江兄講道理hou7伊聽，楊福春就知影糊紙是逆天，就m7 ai3做。伊e5老父ka7伊扑到真thiam2,就克苦koh來做，m7 ku2暗靜寫ti7伊所糊e5燈1句就是：「獲罪於天無所禱也。」 主顧koaN7轉來，看較詳細就gong5 ngiah8走來問：「寫an2 ni beh代？」老父問子，子著認，煞hou7伊扑到烏青。

Hit時阮toa3 ti7彰化，有tauh8 tauh8聽見伊e5消息。黃茂盛先生(傳道)有回覆講，福春兄真艱苦，常常hou7 in老父扑，koh拘束真an5,亦m7 thang來禮拜，亦m7 thang出門。二林e5江兄kap足姊以及新結庄e5兄弟有teh商量，看有甚mih步thang救伊，想攏無，目屎流目屎滴。路尾手就kap黃先生參詳看hit個少年人會偷走到彰化。

Hit時真慘。Bat 1 擺hou7伊e5老父扑真傷重；伊1本聖詩放火燒。伊就講：「M7免扑，這枝柴刀hou7你，你ka7我thai3死較好，我若李哪吒，刻骨還父，刻肉還母，靈魂上帝e5,我beh倒來chhoe7伊。」In老父代先笑，後來哭，才koh講：「poah8 kiau2、食鴉片、歹子路，三項出在你揀，入教我m7,是活絕。」

Tu2著這擺楊福春去寶斗ka7林老師糊大厝，in老父1日1百錢teh倩人顧。這人ka7伊講：「牧師對街路過去。」福春e5心就清醒，趁hit時ka7 in老父提1百錢，beh去hou7日本醫生看症頭。對an2 ni做路費，就走到彰化。

主後1897年，寒天時楊福春到彰化。伊e5老父食鴉片，較畏寒，所以無liam5 piN走來jiok。M7 ku2阮想伊toa3彰化無甚mih妥當，若會toa3較遠較m7免驚。我就招伊相kap去牛罵頭(清水) 。當時海墘hit片地方對大甲溪到烏日庄街(烏日)攏無半人拜上帝，只有稅牛罵頭1細間仔厝thang暫toa3佈道。阮2個toa3牛罵頭1禮拜久佈道，到禮六e昏有2個少年人來講in 想beh來拜上帝。禮拜日in有來赴禮拜；hit日koh加添1個就是古叔，往時teh chhoe7萬項物e5源頭，聽hit句：「上帝創造天kap地」就信上帝。

過一月日na7 tiaN7就已經有30外人大細來信耶穌。是福春兄逐日真mi5 noa7,對早起到暗teh佈道；到暗也無停工，有10人ti7福音堂為著teh讀字母讀詩，福春兄teh教，若欠1 個學生無來，先生就走去jiok。

福春兄6月日久toa3牛罵頭，後來koh6月日久toa3 茄投(龍井，茄投e5福音堂較慢就徙去大肚)。Tiam3 ti7茄投,猶原真出力，真gau5鼓舞；an2 ni-siN hit地方逐庄頭，差不多會thang講逐人攏有聽見耶穌e5消息。

福春兄做主e5工1年久就落去台南e5大學(神學校)讀冊。大學e5學生看伊gau5鼓舞、gau5 kou chiaN5就ka7號做「雞母春」。出學了後楊先生猶原真歡喜出力做主e5工，若無佈道就是探兄弟，若無探兄弟就是看聖經，亦攏無嫌費氣、亦攏無嫌著磨；oh tit chhoe7 1人會較贏伊e5盡心，kap伊e5仁愛。伊亦koh toa3牛罵頭e5教會2 年久，亦toa3台南醫館。Toa3牛罵頭e5時陣就娶先生娘，先生娘kap先生同心一意。

主後1909 年入去埔里社，tiam3 ti7城內，是teh向望會引chhoa7 ti7 hia e5漢人，因為in攏是寶斗人徙來較濟。可惜hiah e5人真oh tit引chhoa7,又koh先生e5身命那lam2,到舊年就是1914年，著出來彰化調養身軀。Hit時，iau2 boe7煞工，照伊e5力量，猶原有講道理hou7醫館內e5病人聽。到11 月伊e5病那傷重，真正是艱苦。有人來探伊，續流目屎。先生講：「M7是哭我，是哭人e5 ngi7心。」足姊問：「今你beh離開某子，亦in beh an3怎樣？」就應講：「我已經交代耶穌。」Koh問：「亦你e5父母beh怎樣？」應講：「主講，是誰仔是我 e5老母，我e5兄弟？」

楊先生將某子交代主。請看報e5列位也替in祈禱上帝，向望細子會toe3老父e5腳步。先生娘(洪不)是番挖人，亦是洪(卯)茂春先生e5小妹。In逐家有去新結庄暫toa3。