基督聖徒 郭丁科長老 略歷

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

劉克全撰文 附語音檔。郭丁科長老於 2011年3月17日 去世。撰者劉克全之妻郭孋娥是郭丁科長老之女。


郭丁科長老 ,1925年2月初九,出世佇台南後壁鄉新港東。迄時陣是日本大正14年。伊的阿爸是郭金枝長老,阿母是郭葉投,伊是長男,下面有七个小弟,一个小妹。1938年,伊位安溪寮公學校畢業,後來幫厝裡作穡,三冬後,受著新營郡守日本人重村文一(Sigemura)提拔,任職新營郡役所庶務課,因為辦代誌認真,隔冬收丁科做客囝。1943年,佇台南州安平市街庄,接受公職養成訓練結業,然後受派去新營郡「顯信會」擔任辦事員,兼郡役所辦事員,無偌久閣兼台灣司法保護委員會新營區辦事員,毋過薪水是領一份爾爾。

1944年10月初二,郭長老佮關子嶺南寮庄李丁來、李陳束夫婦的獨生女李秀英小姐結婚,由楊昭義牧師證婚。1945年2月1日受調加入日本軍隊,佇屏東新埤任下士補。

戰後1946年10月,夫婦倆人tshuā長男國章離開新港東搬來咱關子嶺。1948年2月開始擔任關子嶺郵政電信代辦處經理,十一冬後升做主任,一直到1996年服務48冬退休。故人佇1954年開始擔任關子嶺長老教會執事八冬,1964年開始擔任關子嶺教會長老,伊做長老35冬,到1999年為止,後來受聘作名譽長老。

郭長老佇1956年12月初一 ,予台南名醫吳秋微醫師收做客囝。郭長老做人親切老實,做事公私分明,端正堅強,毋認輸,毋過伊無愛和人爭好康的事,好康的定定攏讓予別人,歹做的事家己承擔,定定予長官呵咾;佇1954年、1986年佮1994年伊有受著交通部郵政或是電信總局頒獎表揚,去到台北領獎。另外伊教導囝兒嚴格,囝孫攏有成就。伊攏總五擺得著白河鎮模範父親或是長青楷模、或是模範家庭的表揚,最後一擺是兩冬前2009年得著白河鎮模範父親的表揚,實在是名至實歸。

郭長老認真教會事務,擔任長執攏總有43冬。伊嘛誠愛關子嶺佮in夫妻拍拼起造的「南寮山莊」,一生誠少離開關子嶺磅空,除非去白河郵電繳錢,伊講伊是真正的「山裡人」。伊殷勤敬拜基督上帝,勤讀聖經,是一位認真綴主跤步的好同工。

郭丁科長老佇舊年開始身體欠安,今年三月17日中晝11點佇囝孫圍圍身軀邊安靜離開世間,攏無艱苦,旅世87冬。今欲安葬佇南寮山頂長老娘的身邊。

郭長老有後生安安、安源,查某囝孋卿、孋娥。內外孫12位,kan-á孫五名,家庭美滿幸福,願主永遠佮伊相佮作伙。

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述