佇新曆(1934年)2月22號，彼早起接著我的妹婿的批，通知我知郭朝成牧師娘過身。 忽然予我真昂愕，因為taⁿ-chiah teh想講伊佇少年的時勤儉，拖磨，到遮欲出頭天，因為查某囝佮後生較大漢啦。 忽然聽著伊過身，bē免得予我想上帝敢款待人按呢？
啊！ 真正是按呢，因為欲煞伊的著磨，轉去安歇，我細漢的教會，彼時牧師娘我就捌--伊。 伊真疼阮，無看輕，不時看著伊的嘴笑笑。 郭牧師佇神學校的時，佮先父是好交陪的朋友；今聽著伊的牧師娘過身，予我真毋甘，boē禁得照所知的，愛寫幾句：－
牧師娘姓蕭，名雁，是社頭崙仔的人。佮郭牧師結婚到今24年久，有歷過散凶的艱苦，身體的艱苦，猶久佮郭牧師同苦同甜，同心志。 照牧師的干證，毋捌5點鐘久無佮伊講話，也郭牧師毋捌拍伊一下。 也真gâu幫贊郭牧師的工；或是伊teh備辦道理，抑是巡會友，抑是教會的難關，伊真gâu安慰，體貼，幫贊伊。 真正是一個好的婦人人。 總是佇世間無通閣聽著伊的聲啦！
伊真gâu教囝。 In佇彰化的時，照我會記得，彼个4年前過身的素娥 tú-chiah 5 歲，佮現時佇厝裡彼个素貞(淑貞) 3歲，兩個相佮tit-thô，假那大人的款，毋捌看著 in冤家；人客若來，真好規矩，有禮有數，序大序細真gâu稱呼，gâu吟詩，念聖經句，也gâu祈禱，真得人疼。 這攏是牧師娘的gâu教示。 我的老母常常若講起教囝的事，攏愛引起郭牧師娘的gâu教來講。實在是一個賢的老母。總是今佇世間無通閣看著伊的面啦 ！
伊真勤儉。 雖然有郭牧師的 gâu設法，也著有牧師娘的 gâu 勤儉。 照我所知，郭牧師是散凶的牧師，總是會通予囝兒經過中頂學校，實在是有gâu 勤儉的牧師娘chiah會。 伊毋捌the̍h錢予伊的細漢囡仔，因為毋捌錢的路用愛濫摻食。 無論食，穿，攏bē較輸別人，總是gâu打算著怎樣食，怎樣穿，來予伊兩全其美。 實在是一個經濟家。 總是今無通閣看見伊佇厝裡啦 ！ 啊！ 真傷悲！ 願主安慰郭牧師佮伊的細囝。
