「故羅來受長老的略歷」摘自 「數念故人」 《台灣教會公報》 944號 1964年10 月15 日 p.18-19 [原文是白話字]

按：羅來受（1897-1964年），父羅炎（1871-1917年）、母買快。羅來受擔任左鎮教會長老35年 （1929-1964年），娶新化李崑清之女李銀盆，育有茂霖、茂生、茂堂、茂卿、富雄、武勇，女玉梅、福錦、玉櫻、玉桂。子女均在教會甚活躍。長男羅茂霖醫師（1926-1995年），在屏東市開羅肺科醫院，晚年是迦南教會長老。請參見《教會史話》343。

羅來受長老是南中左鎮教會的出身者，一生佇左鎮做地方的指導者，佇會內會外真正有名望，佇10月10號透早倚5點鐘忽然過世，享受68歲，予遺族佮地方的人大毋甘。

羅長老是長榮中學出身，自細漢就是可取有為的青年，到長成了佮新化故李元盛長老的令妹銀盆女士結婚，有五个後生，三个查某囝。長老娘佇4年前過世。本身雖然單身，總是因為大囝（羅茂霖）佇屏東做醫生非常好名聲，二囝，四囝佇身邊經營家業，三囝佇香港教育界，第五囝佇軍隊服役。閣大囝婿佇實業界，第二，第三囝婿佇教育界，攏是好信仰，好名聲的後進，正通享受安樂的天年，無拍算忽然受主揀召，拄親像平素伊所講：「最後盡量毋愛予囝孫麻煩費氣來過世。」到過身了，beh請伊起來食早頓，chiah知影伊已經過世。

論羅長老做人，是有才能的人，閣較是有仁慈，德行佮信仰的人。無論親晟五十至到會內會外，見若伊所捌的，若拄著患難困苦予伊知影，毋捌縮 koe̍h無伸出幫贊的手。

對教會，無論是緣項，無論款待傳教者，逐擺也是做頭前出頭奉獻。教會的大小事，或是出錢，或是出工，伊的所做都真夠額予人欽佩。

青年時，伊teh做事業攏是勤勉誠實做基礎，所以連做事業的對手，毋捌佮人競爭到予人留歹印象。

對地方的服務也是gâu辨理，gâu奉仕，所以到過世的時，一身猶過當6， 7項的委員，尤其是佇台南縣議會當3擺的議員，攏是予人真欽仰，過世的時猶是現任的議員。議會毋甘伊的過世，纔用議會做主體組織治喪委員會kā伊送葬。

台南玉井間的交通大部份已經有tám-á膠路，總是猶一chām（段）猶未舖，聽講羅議員為這項真出力爭取。今已經批准，對新化到玉井無久beh動工舖設; 可惜羅議員已經過世。後來人若經過這條路，穩當oē閣較知影伊的貢獻。

親像按呢，佇家庭有好的建立，佇教會有好的模樣，佇社會有好的貢獻，通講為咱的福音教示有做了真媠的見證，夠額予後來的人通做模樣。