訪黃加盛牧師 （1968年）

杜英助撰 「更新！復興！傳全部福音！新議長黃加盛牧師訪問記」 《台灣教會公報》 1024期 1968年2月15日 p. 6-7 [白話字原文，改為漢羅台文] 。

按1968年台灣基督長老教會總會在台南東門教會召開，選黃加盛牧師為總會議長。在其就任典禮禮拜，他以腓立比書2章1-11節講「奴僕的形狀」，表示取奴僕形狀的態度來服務教會，職掌教權。

本屆議長黃加盛牧師就任以後，有接受本社的訪問，佇訪問的中間，伊有提起伊就任總會議長以後的幾項感想。

黃議長講，本年度是新宣運動第2年，就是推行山地事工的年，總是咱也毋通忽略平地的教會，有濟濟代誌猶原需要咱去關心。黃牧師講，為著推行新宣，咱需要4 項的更新，就是： 1. 神學教育的更新、 2. 宣教方法的更新、 3. 山地教會的強化佮更新、 4. 總會教務的更新。對佇這4項的更新，來達到：1.台灣教會的復興、 2.神學的復興、 3.社會的復興。通過這3項大的目標，來推行台灣基督化，並達到耶穌基督佇台灣所欲完成的救贖史的工作。為著欲完成這個工作，咱的確著做到下面這3項全部的地步： 1. 動員全部的基督徒、 2. 向全部的社會階層、 3。傳全部的福音。

有關4項更新的事，黃議長最後閣補充說明講，關係神學教育的確著配合中國文化，歷史，社會情形來培養傳道人才，毋通保守傳統tek的教育。

關係宣教方法的更新，就是講，咱的宣教毋是干焦限佇教會內的宣教，教會本身著出去外面，向社會傳福音。

關係第3項的更新，黃議長講，山地的信徒有信仰的熱情，總是怹的信仰常常因為經濟環境的演變致到搖動。所以咱這方面著提高怹的基督教教育，有系統的來共怹造就，充實怹的信仰內容；另外一方面，著想法度指導怹佇生活上，工作上來加添經濟收入，予怹整個的人，－靈魂，肉體－得著拯救。

論到總會教務的更新，黃議長講，過去咱教會對佇各方面的工作攏有teh做，總是攏忽略考績，換話來講，就是對工作「有做」總是「無考績」。最近政府機關攏teh實行3連坐，就是「設計，執行，考績。」黃議長講，咱的教會，實在也著推行這個3連坐才會進步，若無，干焦有teh做，到底做到甚物程度，有甚物結果，就攏毋知影，若是按呢，自然教會就真oh得進步啦。