梁文彬長老是主後1927年12月19日出世值（ti7）台灣彰化州清水鎮。伊丌（e5）阿媽是故梁楊寶玉傳道師，老父是故梁秀德牧師，老母是故梁林新有牧師娘。有小弟小妹七丌（e5），照排行是秋霜、秋纓、秋安（已故）、秋嫣、秋薰、秋圓，文傑（已故）。伊對小弟小妹手足情深，1994年9月11日，伊值秋安丌（bong7）前講出一層無人知丌往事：「細漢丌時，因為家境貧寒，若是阿媽与（hoo7）伊丌物，攏是暗靜透過秋安分与小弟小妹，不敢与人知。」即種情感雖然無以言喻，總是值安慰敆關心中間，流露無遺。
1950年7月，伊對（tui3）台南高工土木科畢業，以第一名丌成績，考條工務人員就業考試，進入台灣鐵路局工作，前3年攏值丌（teh4）顧倉庫。伊不八（pat4）嫌惡職位丌卑微，簡單（kan1ta1）勤勤懇懇，堅守崗位。同年9月，敆（kap4）所意愛丌人，就是台南望族陳進發先生丌第二女公子陳美秀女士結為連理。46年丌久，夫妻恩愛，情如膠漆，同甘甜，共苦痛，用真情敆智慧來撫養教育六丌囝仔（gin2-a2），与攏得著上帝大大丌祝福敆眷顧，照排行是榮輝、耀輝、炯輝、麗蓁、麗芳、光輝。
值鐵路局任職三十年（1950-1980）以來，伊有所為有所守。伊無為著升官來入黨阿私（o1-se1）人，無利用職務丌利便來貪污創治人。因為按伊，伊雖罔有工程師丌名，優越超人丌才調，續一世人屈值台灣鐵路局助理工務員丌職務，將近二十五年。這是伊丌有所守。伊無閃避工作環境丌危險，無嫌惡生活條件丌惡劣，當北迴鐵路動工丌時，用伊年老丌身軀，主動參與北迴鐵路開路丌工程。亦因為伊丌參與，有一寡也奧（o3）得解決丌問題，伊通施展無人有丌勇氣敆才調，載志（tai7ci3）纔（ciah4）通得著順序。這是伊丌有所為。
因為時逢變局，社會環境數易，人心貪婪險惡，惶惶不可終日，總是伊秉持一生對救主耶穌基督丌信仰，謹言慎行。伊無貪慕名利，無攀附權貴，續是簞食為美，瓢飲是甘。伊曲肱而眠以為適，信步而歸以為安。因為按伊，終其一生，兩袖清風，心安理得。伊無好額，總是不失伊若皇帝一般丌富有。伊無名位，總是不失伊若皇帝一般丌尊榮。伊無立言，總是不失伊若皇帝一般丌德範。故梁秀德牧師敆牧師娘在世丌時，伊丌有孝，留与伊丌序細一丌真水（sui2）丌模樣。亦伊所留与愛妻丌，是做丈夫丌人，涓涓長流，忠實不移丌愛情。伊所留与序細丌，是做老父丌人，完全無瑕疵丌疼趁（thiann3than3）。伊丌為人，真實無虛假；伊丌話語，無褒諂，無護短；伊丌處事，無騎牆，無避難。伊丌一生，在在留与伊丌序細永遠丌數念。
因為職務時常調動，著舉家逐所在遷徙，就趁公餘之暇，幫贊逐（tak8）所在丌教會做傳揚基督福音丌事工。亦為著所幫贊丌事工通達遘（kau3）完全，伊值台灣神學院夜間部進修所有丌神學課程。即中間，前後參與故梁秀德牧師開拓台北埔墘長老教會、中和長老教會、西湖長老教會丌事工，亦八幫贊基隆暖暖長老教會，宜蘭南方澳長老教會福音事工丌開展。
值1988年2月26日，伊以62歲丌高齡，敆愛妻¢娶導（chua7）麗芳、光輝移民遘值美國加利福尼亞丌聖荷西丌所在，復通得著人丌看重，繼續做工積點數，扑算做滿10年，通得著領退休金丌資格。伊即種勞動丌精神，一世人無嫌厭勯，常常是當伊轉遘次，愛妻加伊開門丌時，纔知嘜喝講：「哎唷！骹嘜軟去也啦！」按伊亦已經做有一年八個月也。值即種年紀，復通有即種勞動丌身體，敢不是因為伊盡心值福音丌事工頂面，上帝對伊所賞賜大大丌福份呢？1996年4月14日（美國在地時間）禮拜煞，嘜轉去次裡丌路上，當下晡2點48分，上帝就与伊無苦痛，來召伊丌靈魂轉去祖家，享壽70歲。
梁長老丌一生，所見證丌，是救主耶穌基督實實在在疼你丌次邊親像家己丌精神，是咱丌阿爸父上帝創造人類所嘜展現丌榮光。伊實在是一丌無汲汲值世間名位，亦無積聚世間財寶，總是伊丌心是富有丌人。雖罔即時伊因為意外來離開咱，与咱實在心真不甘，總是咱永遠數念伊，相信有一工，咱會值主耶穌基督所備辦丌次宅裡三合見面。
