林俊育 LîmChùn-iõk    

    王成章牧師（Rev. Dr. Martin C. Wang），1935/3/1-2007/4/15

   Tu2-chiah接tioh8一位自稱是王成章牧師小妹e5電話，伊講伊tui3王牧師e5「遺物」中看tioh8我e5名片。Hit句「遺物」hou7我錯愕起gong7-giah8,「haNh！王牧師已經蒙主恩召！？真m7甘！」我對電話筒an2-ne講。

  王牧師是舊約學e5專家，我是為tioh8整理kap翻寫漢羅版《紅皮聖經》，chiah kap王牧師有進一步e5深交，伊對我e5指導kap鼓勵非常周至，hou7我e7-tang3順序ka7《紅皮聖經》e5全羅版kap漢羅版上網，突破非基督徒抱怨e5「世界各種語言聖經long2有上網，thai3會kan-ta台語聖經無上網？」e5質疑。

  王牧師也體諒我對台語聖經上網e5苦心，我有將陳清俊長老用了六年半完成e5巴克禮白話字聖經整理做電子檔案，交hou7台灣聖經公會去上網來滿足台語文界非基督徒e5渴望，但聖經公會一直無boeh將巴克禮白話字聖經上網。台語文界非基督徒就想tioh8《紅皮聖經》，王牧師講伊是hit當時e5翻譯者之一，也有tau3斟酌版權e5問題，結果講是《紅皮聖經》無正式出版，所以無版權e5問題。

《紅皮聖經》上網了後得tioh8真che7 e5鼓掌，人光出版社也有正式出版，ti7附錄「翻寫《紅皮聖經》漢羅版e5話」，我有詳細記述伊對我e5指導kap伊e5期待：「...伊soah熱phut-phut想boeh重新用現代台語來改寫chit本聖經，伊講台灣現此時非常需要一本人人讀了容易了解e5台語聖經，漢羅版kap全羅版long2對台語文運動kap傳福音有真大e5利益。Chit-e5計畫會成做王牧師e5性命第二春，ng3望伊e5異象e7-tang3早日實現。....」

頂年收tioh8伊e5 e-mail講伊boeh tng2來台灣toa3三芝雙連安養中心，我回e-mail ka7伊講我會ti7安養中心迎接伊，真歡喜ti7-hia看tioh8伊精神飽滿講伊boeh參與「聖經現代台語譯本」e5翻譯工作。王牧師深知我對台語聖經e5電腦處理有下工夫去深入研究，就推薦我去做聖經翻譯小組e5電腦顧問。我也真緊ka7用了十四年久chiah完成e5新約整理做WORD檔案，ma7 ka7伊翻寫做漢羅版，並hou7小組e7-tang3方便網路作業。王牧師tiaN7-tiaN7對我提起，伊真ng3望e7-tang3 ti7有生之年看tioh8家己參與翻譯e5聖經出版。想be7到chit-e5美夢iau2未達成，伊就蒙主恩召，非常遺憾。

會記得2002年熱天boeh去參加美東夏令會，路過New Jersy順續拜訪王牧師e5時，伊tu2心臟病入院了出院，伊對我講：「我行過死蔭e5山谷，chit條命是上主加hou7我e5,我tioh8繼續為主做工。」2003年寒天，為tioh8《紅皮聖經》我koh一pai2 ui3波士頓開車去New Jersy向王牧師請益，伊ma7 koh講仝款e5話。

王牧師一生為主e5工─翻譯台語聖經─跑走全程，真m7甘伊hiah緊蒙主恩召，ti7-chia追憶伊對我e5指導kap鼓勵。Ng3望我也e7-tang3學習伊e5精神，為「上主道成肉體講台語」e5事工，繼續phah拚，hou7伊在天之靈e7-tang3得tioh8安慰。願主接納王牧師所做e5工程，阿們！