廖得撰 「天國的特攻隊」 《台灣教會報》810卷 1956年6月 p.25 台灣聖神 [白話字原文，改為漢羅台文]。

《廖得牧師紀念文集》1977年2月 新興長老教會出版 p.19-22 有漢譯,，不另錄。 按：謝清宜 （1902-1944），鹿港人，父謝庶、母周梅；曾善牧過 北港、新港、民雄、大社、和美、大肚（1939年3月14日在大社封牧，任內去世）等教會，也曾救急彰化醫館、埔里牧務。1947年牧師娘李好去世、留有3男1女，即謝 穎男（牧師）、謝美枝、謝惠男、謝信男。

台灣的媽祖信徒講約有兩百萬人，廟宇有三百外間；其中北港朝天宮是廟頭，逐年（每年）對全省去行香的，有三，四十萬人；開費約三 千萬khou（圓）。

也講北港媽，新港媽，彰化南門媽是三姊妹，叫做大媽，二媽，三媽。本年舊曆 3月20日彰化媽去訪問北港媽佮新港媽；作伙去（隨行）的香客講約有4萬人。 莿桐的鄉民（按文集作「寺堂方面」，誤也）刣倚 100 隻豬做牲禮佮請香客。廿一日暝 轉到西螺，鎮民講有刣百外隻豬祭獻佮請隨香的。轉到員林的時，參加的善男信女講約有10萬人，各款的車講約有8000張。 這擺的割香，講是20年來最鬧熱的；費用約開 6 百萬khou。

佇40外年前，彰化的何希仁宣教師 (Rev. Hope Moncrieff) ，順着舊曆正月到三月23日，全島去北港大割香的時， 臨時召集幾十名的傳教家，日暝輪流佇北港， 對遐的香客大佈道。到輪著一個楊傳道，伊早是teh畫媽祖 漆 teh賣的人，無客氣講："媽祖是查某（女）的，予查甫(男)teh抱， the腩 ，無貞節！" 對按呢聽眾反感，有一個刣豬的舉豬刀 beh來刣伊，拄著楊先生講soah無佇遐， 揣無嘴mauh-mauh-的，就將佈道場的布棚大索斬斷。大佈道自按呢停止。

佇41年前，到末到北港的時，問遐的同勞者講："你的卒業(畢業)論文所寫的決心佮計畫，今進行了按怎？伊講， Ā有！ 逐日食飽mā攏倒teh睏；因為所稅拜堂，bai2 閣偏僻！會友少閣無人物！ 孤種人民！再來是‘北港媽興外香！閣' 近廟欺神。早時論啥人，佇甚麼所在佈道，人攏歡喜聽。對（從）彼擺的大佈道了，草蝦蛇攏變做惡蛇。無法度。"

隔日我佮陳朝明先生去到海墘的新港賣福音傳，彼暝佇遐近附庄社佈道； 聽眾有人講：若到有這號上帝，我的確beh拜。翻轉暝到末佇北港街面，逐 khám店 賣福音單佈道；有人注意講："北港媽m-thang 講著！其餘做你講，無要緊。"後來到末佇市場內外予民眾圍三遍大攻擊；彼暝我一人予怹包圍真久辯駁，怹卻揣無縫thang 起事。過天光早，日本巡查就去拜堂，吩咐以後m-thang 閣去街面佈道；因為會社的鱸鰻真濟，真歹，危險。

幾年後有鹿港出身的謝清宜敢死軍，去攻北港； 買地起拜堂，教會興起。後來為著新港教會拄著莫須有的試煉， "病入膏肓" 的難症。伊閣 "毛遂自薦"去攻新港。 佇新港幾若年久，教會復興順事的時，隔壁教會民雄閣拄著信仰的混亂；主日頂下晡（上下午）禮拜，男女各 chhun 六七人；伊就閣對當局請 beh做決死隊去攻民雄。無偌久民雄閣復興到主日禮拜頂下晡各 80 外人。不幸伊閣聽著中部有老教會（大社），姊妹濟濟嫁世俗，教會狼狽到袂講得；伊就請去遐救援。以外怹有去和美， 彰化醫館，以及埔里等所在救急。

最後為著大肚教會的牧師辭職，教會衰退；伊就去拼「便宜牧師」。佇遐「前無救兵，後無糧草」。 工濟，食少。閣跋落「囝兒坑」。"

謝清宜牧師，牧師娘這對 「連戰連勝的特攻隊」，到遮歸天。