聖人的過世 謝經長老 (1914-1963)

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

謝天祿撰 《台灣教會公報》904號 1963年2月 p.13 [白話字原文,改為漢羅台文]

故謝經長老,佇民國3年(1914年)出世佇南投。老父謝斌醫師,老母吳上忍女士,攏是南投教會的長老,佇一个篤信,主所歡喜的家庭長大。佇40外年前,吳天賜牧師來南投做傳道的時,伊拄好是9歲,teh讀小學1年級,6年久到畢業攏是優等,品行方正,頭名的成績也是優等,攏是teh爭取1,2名;在學中有一个別名「聖人」,對按呢咱通知伊的人格佮做人的風度,是人尊敬。畢業後繼紲考入總督府的醫專(現台大醫學院),4年久的成績也是優等,拍算現時全省濟濟有名的醫生貢獻佇社會的,是伊的同學。親像二林的林庚申醫師,á是台大醫學院生化系主任董大成博士,攏是伊的同學。特別愛提起的,就是董大成博士是對謝經長老的人格感化來信主,成做基督徒,通講伊是董博士信仰的恩人。 醫專時代,對學校到雙連教會不止遠,所以若拄著考試,真濟基督徒學生無愛去做禮拜,彼个時陣,謝經長老攏恬恬,聖經提leh就出發去做禮拜,對按呢 予其他的學生見笑,紲受感動,一个一个綴後面也去做禮拜。伊不止有天才,是pianist (gâu彈鋼琴),也是violinist (gâu彈手提琴),對音階非常正確。醫專畢業後,有倒來彰化醫館閣臨床研究兩年久,然後倒轉來南投幫贊協助令尊所開設的大同醫院,正式懸壺行醫。伊的醫術高明,對患者親切,對貧困的患者做免費的施療。

伊佇年輕就當本會(南投教會) 的執事,做代誌有條有理,真周至,毋捌疏忽,誤事。也是南投教會青年會的發起人,也當頭一任的會長,也當過主日學校長,相佮協助傳教者去培養第二代的信徒。無偌久就當選長老,連任到倒佇病床。伊的做人實在是全教會的模範,真溫柔,攏袂得失人,有包容性。伊攏是teh想別人的事,贏過 家己的事,伊雖然破病,久久佇床裡,關心伊所捌的會友的破病,袂通過年貧困的會友的生活,失落平安佮拄著逆境的兄姐。 伊真gâu疼傳教者,每年的聖誕節攏有送禮物佮金錢一封予有關的傳教者。 伊也關心傳教者的生活,歡喜將家己的園送予退休的老僕人做安居的所在,過晚年的生涯。伊所做的好事,實在記袂了,因為伊所teh做的好事,是用正手所做無 予倒手知影的精神。伊的生涯雖是平凡,猶過是大的偉人。無拍算享壽50歲,佇舊曆正月初2早起時3點半,安然受主揀召歸天家。伊的告別式,有欲甲成千人參加,用嚴肅悲哀的氣氛,聖歌隊穿白色的禮服,一路領先唱「天是我兜」的聖歌,會友也唱故人常常愛吟的聖詩,行列約有3,4百米的遠,予全南投的住民感動,所行過的街面,逐人攏用真劍嚴肅的態度來送這位「聖人」,佇悲哀嚴肅的中間送所敬疼的故謝經長老到永遠安歇的所在。  

 

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述