謝隆輝撰 《台灣教會公報》 922號 1963年11月15 日 p.8-9

按：謝隆輝牧師是謝慶裕牧師（1906-1077）與蕭秀之長男。謝隆輝有姊謝淑貞，弟謝隆昌、謝隆傑，妹謝淑圓，謝淑玉。

感謝主，得著公報社好意，愛我寫這个題目，雖然不配，猶過會喚起我濟濟的感謝佮回想，所以照我做囡仔時的印象，感覺，坦白來大膽草筆就是。這个題目，因為逐人所受的環境佮遭遇無siāng（同），自然彼个苦，樂也無相siāng。所以用我做例來講：也濟濟快樂是建立佇苦境的頂面，所以欲合 teh講。

1. 心靈上的苦痛佮快樂。

A.因為是傳教者的囝。

傳教者的囝著比一般的囡仔較乖，gâu，有禮數，好規矩；是一般教會內外的固定思想。所以我5歲的時，逐日至少著讀三二个羅馬字，若袂認字佮熟餾， 就無通食飯，抑是罰徛，罰跪。也逐日著聽好規矩，有禮數，乖的方法，所以常常怨慼，袂通親像一般的囡仔，通自由自在thit迌活動。所以有時予人發見著所稱「歹」的時，若有人問講：「你甚物人的囝」我就會真不滿應講，「顧禮拜堂的囝！」總是6歲，我佇台南大灣教會聖誕節的時，佇台頂，手提聖經，予台跤的會眾指定所在來讀，聽著台跤拍手喝采佮領著如山的獎品的快樂，是生涯中袂通袂記得的事。

佇禮拜日，主日學講一句話，發一句較奇巧的質問，抑是佇街路，學校受著詈罵，侮辱；我若反擊一句，抑是引起冤家，不管原因，結果攏是牧師囝的毋著。所以常常受枉屈，咬牙切齒的苦痛，毋愛承認是傳教者的囝。阮是親像一塊白布，袂通沐著黑，閣著出類拔萃，超出囡仔群的特殊囡仔。

B.禮拜過濟的苦樂。

傳教者的家庭有早，暗的家庭禮拜，閣教會所舉行的聚會攏著乖乖出席。 若禮拜日閣較受罪，早暗禮拜，主日學，上下午禮拜。閣佇暗時的禮拜，著報告今仔日所聽著的道理，假使若上下午的道理顛倒講：抑是主日學的道理共伊馬耳東 風，抑是上下午禮拜臨陣脫逃，抑是金蟬脫殼，著佇欲睏的時領受枴，箠的賞品。所以坐teh欲等「A-men」的艱苦是袂講得的，總是有時佇閣活節，聖誕節 teh猜迷的時，因為聽濟，猜著謎，佮大人競爭來得著賞品的快樂也是大。

C.對靈界的煩悶。

耳聽，目染，「地獄，」「天堂，」「上帝，」「魔鬼」有抑是無？看著爸母的傳教生活，替人祈禱，予人的病會好，予歹人悔改，予教會興起。看怹對所傳的確信，親像佇爆擊的時代，看著濟濟的神蹟，就想講有上帝，有天堂......一方面看著怹欲唚-人，予人掠做欲咬人，受教會內的法利賽人欺負，侮 辱。 閣遮的人「做惡做毒，騎馬lo̍k-kho̍k，」反轉有好運，趁大錢......就想講上帝若有影，thái予遐的人按呢？這款靈界的煩悶是佇7歲的時就有，這款的煩悶苦痛到我19歲的時才得著解決，也阮遐的囡仔伴攏毋捌有這款事，這也是一苦。

D.無久長朋友的艱苦。

傳教者的一生有時親像走馬燈，常常搬岫，會通講走東走西。所以毋但搬厝的艱苦，也予阮無青梅竹馬的朋友。我佇澎湖瓦硐有一位好朋友，是生死的交陪，因為伊是學校先生的囝，學生囡仔若予伊的老爸拍，就對伊報復。所以阮兩人佮全村14个，逐日相拍白刀戰，逐日是3，4場，兩个對14 个，我的阿姊捌看阮teh相拍看到哭，這款的知己只有一年外的做堆佮交陪，也因為阮的調動就報銷。 到逐所在無甚物久長的朋友。

II.肉體上的艱苦。

A.肉體的艱苦。

傳教者的經濟困難是公定的事，所以為著欲過日，「掘菜股種菜，種蕃薯，割豬菜，飼羊，飼鵝，薅鵝仔菜，汗流滿面。」手內生白粒豆的艱苦，對7，8歲 就啖著，閣若叫著清禮拜堂，就會蹔跤著蹄。

B.經濟上的艱苦。

我佮我的小弟去飼羊仔，看著濟濟朋友teh釘干樂，心真愛，無錢通買干樂，就用紙纏規丸做干樂，佮我的小弟teh釘袂轉的干樂，予我的老爸看見，伊就剉一支榕樹枝，刣兩粒的干樂予阮。有一擺佇一間教會，厝邊是執事的厝，閣伊是教會會計teh發薪水的，伊知家父的厝有錢，就欲叫我的老爸轉去提錢來借伊，我的老爸有咬牙齒根答應伊。不幸這个事予我的老母知影，就阻擋無借伊，伊就將月給凍結起來，3月日無領錢。我對學校佮我的阿姊欲轉來提錢交學校，老母攏無錢，我就哭，吵，無錢毋去，予我的老母忍受袂牢，走入去跪佇房間流目屎祈禱上帝，最後我也沿路流目屎行去學校。半路拄著一个會友，佇外面食頭路的轉來 拄著阮，看阮攏teh哭，就提一箍銀予阮，阮真歡喜閣感謝上帝。走轉去，將一箍換做一角銀的去學校，也有賰8角。

阮的衫褲，學用品，攏著真儉，袂通親像一般的囡仔有通照心所欲，這是阮做傳教者的囝兒所拄著的苦樂。.

結尾來講：傳教者的囝兒佮伊的序大人所拄著的境遇，來啖著甘，苦，酸......等等的艱苦。總是遮的艱苦會常常予你得著意外的快樂佮感謝。也對遮的遭遇鍛鍊阮會通得

1. 應付各種的境遇。

2. 看著上帝的神蹟。

3. 體驗著主對祈禱的應答。

4. 明白狡譎的人的社會。

5. 意志會真強壯。

6. 對家己所領受著的信仰會確信無搖泏。

閣再予我有一个感覺（現在）傳教者的囝兒成長，若毋是大好，就是大歹的人。也若行佇大歹路的傳教者的囝兒，是比一般的大歹人閣較著同情的。這實在著有做傳教者的囝兒過的才會通體會的。