逐家歡喜來吟詩，感謝天父賜福氣； 真理來台六十秋，福音報傳全地球。

起頭馬偕博士來，報傳道理，除歹事； 親像1粒芥菜子，興旺大欉，主歡喜。

博愛慈悲牧師娘，母會派你到東洋， 愛祝北部鑽石年，贊阮信心愈加添。

母會恩情真正大，福音無到，阮袂活； 愛報母恩攏袂會，表意來開歡迎會。

願主耶穌來幫贊，加添信徒無數萬； 願父祝福這个會，那久那大，人那濟。

Tāi-ke hoaⁿ-hí lâi gîm-si, Kám-siā Thiⁿ Pē sù hok-khì; Chin-lí lâi Tâi lio̍k-si̍p-chhiu, Hok-im pò-thoân choân tē-kiû.

Khí-thâu Má-kai Phok-sū lâi, Pò-thoân tō-lí, tû pháiⁿ-tāi; Chhin-chhiūⁿ chi̍t-lia̍p koà-chhài-chí, Heng-ōng toā châng , Chú hoaⁿ-hí.

Phok-ài chû-pi Bo̍k-su-niû, Bú-hoē phài lí kàu Tang-iûⁿ, ài chiok Pak-pō͘ Soān-chio̍h nî Chān goán sìn-sim jú ke-thin.

Bú-hoē un-chêng chin-chiàⁿ toā, Hok-im bô kàu , goán boē oa̍h; ài pò bú-un lóng boē-oē, Piáu ì lâi khui Hoan-gêng-hoē.

Goān Chú Iâ-so͘ lâi pang-chān, Ke-thiⁿ sìn-tò͘ bû-sò͘-bān; Goān Pē chiok-hok chit ê hoē, Ná kú ná toā , lâng ná choē.

女宣道會歡迎文牧師娘的詩

1932.05 第566卷，芥菜子76號，p.29

(陳瓊琚 做)