本月中咱教會有失落兩个有名的好人。一个就是屏東的吳可免長老，一个是南投的吳上忍女長老，兩人是阿姊佮小弟，是咱台灣最初代的傳道者 吳葛先生的囝。 （中略）

 Taⁿ這位上忍長老也佇本(6)月21號受召歸天，(享壽75歲)。上忍女士做一个初代台灣傳教者的囝，受了長榮女學的教育，就對屏東嫁到彰化做謝斌醫師的內助。

當時交通不便，對阿猴(屏東)坐輕便過下淡水溪到打狗 (高雄) 才搭火車去彰化。 謝先生一家當時無信主，上忍女士堅心守道理，到結果引chhoā in先生，ta-ke等攏來信主。聽講：ta-ke起身趁伊的招呼捌佮伊去拜堂，目的是欲探看果然佇拜堂祈禱目睭放瞌的時，有影有歹風俗，歹行為無；結果 看見無影，顛倒受感服，才來求道信主。上忍女士的疼人實在真罕得看著，所以正親像伊的囝謝緯牧師所講：真少親像伊按呢得著人的愛戴敬疼。伊teh鬥鼓舞教會真甘出工，出精神，出金錢。南投較山間的會友若來禮拜，中晝頓常常全部予伊請去招待，散赤的患者，藥仔錢逐擺若毋是施療，就是半價。求道者抑是新聽的會友，差不多每个是伊共in教白話字的。見若食in兜的頭路，無論做田佃，做倩工抑是藥局生，逐人伊都引chhoā，予in讀白話字紲得著道理。

論伊教囝非常嚴謹用心，無論查埔查某，家內來大小項工一定攏著學習到會曉，無一屑仔寵乘溺愛。所以1953年受省政府表彰做模範母親。

按呢對社會，對家庭，對教會攏有大貢獻，莫怪過世的時濟濟受伊疼痛，引chhoā栽培的，對頂到下都來參葬表毋甘。

伊有gâu培養後進，所以後生兩个醫生，一个博士，一个藥學士；閣兩个囝婿也攏醫生。咱教界唯一的醫生兼牧師，也是本社的代理董事長謝緯，就是伊的第二囝。