佇日本的牧師娘的生活 Tī Ji̍t-pún ê Bo̍k-su-niû ê Seng-oa̍h  

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

林正子(林異雷牧師娘) 用日語談 施瓊花 譯作台文(白話字)
《台灣教會公報》 913 期 1963 年7 月1 日 p.6-8 錄台灣白話字文獻館的譯文如下.  

微細袂通算做甚麼的我,佇我的工作中無有一項值得誇口的事,不過受公報社主筆的交代,愛我寫幾句,所以佇遮我欲將我佇日本的生活寫淡薄。
我的老父擔任長野縣諏訪中學的教員30年久,老母也佇長野縣的小學做教員數年,然後轉入女子大學讀冊,後來全任經營幼稚園的工作,我的老母是對內村鑑三(1881-1930)先生得著道理的一个熱心好信仰的人。我的兄哥一个做牧師,一个中學教員,一个會社員,也有三个姊妹,攏是作保母,其中兩人嫁予牧師,我就是兩人中的一个,所以事實上我是無受過做傳教者的教育。
傳教者的婦人人通講有兩種,一種是婦人傳道型的,閣一種是家庭型的,我通講是佇家庭型的。阮有一个真熟似真欽仰的舊約專家,名叫淺野順一牧師,伊佇伊的牧師就任式的致詞按呢講:「我是做一个牧師來這間教會就任,若是我的太太是做我的太太,毋是做一个婦人傳道者,抑是做一个獻身者來佇一間教會,請恁對這點才諒解。」這个牧師娘伊無一屑仔激傳教者夫人的派頭,猶過伊真受會友的尊敬佮親愛。我遠不及著這个淺野牧師娘,猶過我有拍拚努力,向望會得對佇做一个牧師的內助者,認真顧守家庭,通過這个來奉事教會。我若講直接奉事教會,差不多通講是只有做司琴的工nā-tiāⁿ,到佇來台灣了後,才有teh出去訪問會友。
阮的結婚是1944年的4月30日,佇東京舊日基日本橋教會Goân-tiân Iú-thài牧師證婚的,金井維一郎牧師做阮的儐人。當時拄仔是敗戰前,日本真濟青年攏是去做兵,抑是去軍事關係的工場做工,所以彼時濟濟教會發生無牧者,也無會友的狀態。又閣1944年4月拄仔是美軍常常來teh空襲的時,東京的一半差不多攏是變火燒埔。 彼時我佇中野昭和通美以美教會的幼稚園做主任保母,主人(林牧師)勤務佇保險會社,暗時才來日本橋教會幫贊。因為時已經真危險,所以阮就疏開,林牧師就轉勤到佇長野縣的松本支社,暗時佇遐的美以美教會幫忙。
到佇1946年春天,林牧師的恩師金井為一郎牧師(林牧師的神學校長)介紹林牧師去甲府的山梨的教會幫贊,因為當時彼間教會受戰爭的災害後無牧者。對阮所蹛的松本到甲府愛坐4點鐘久的火車,所以暫時每禮拜日著坐往復8點鐘久的火車,去到甲府的所在來主持遐的集會,按呢佇彼的戰後交通非常混雜的時,繼續一年久。失去禮拜堂的遮的會友,就對保險會社借所在做下晡時的集會。 起先是只有律師,醫生及女學校的教員,共10外名的集會nā-tiāⁿ,後來加添到30外名,對佇按呢,就佇1947年的3月14日正式就任做in的教師,集會所就徙來佇醫師會館,對彼時起,就積極開始傳道的工作,到佇禮拜堂起好彼中間,阮有搬厝4擺,第二个後生出世的時,因為所稅的厝真阨,所以就將差不多兩疊大的倉庫稅來做我一个月的休養所。
林牧師當山梨中會的書記,傳道部長,主日學部長等的工,真正無閒。1950年9月佇箱根的所在,有一个東京中心5教區約略 600名的盛大的傳教者修養會,遐的受選做講師抑是指導者的攏是遐的出名,年老的神學者,指導者,其中一个對台灣來,最年輕無名的青年,就是林牧師也受選做講師,實在夠額光榮。
來甲府赴任的時,林牧師猶是一个補教師,到隔年受遐的先輩的鼓勵,就提出去考正教師,差不多報名欲過期限 才提出,總是佳哉一擺就及格,做正教師。對佇真努力的結果,佇1950年熱天所teh待望的會堂建築完成。林牧師的工作就那擴大,到佇各所在;親像結核療養所,刑務所以及到佇電台的廣播等,若是我只有料理家庭,佇教會當琴手,抑是有集會的時做招待的工作nā-tiāⁿ。 彼時拄仔有兩个無職業的青年teh放蕩,過著親像乞食的生活,阮有共伊善導鬥揣職業,我有設法予in食,予in蹛,這个事紲出佇報紙,對佇按呢,紲有濟濟乞食挨挨陣陣欲來揣阮。建堂完成後差不多有7,80人通做禮拜,佇這个時陣就是1951年的春天,因為太著磨閣無閒,致使林牧師紲染著肺癆的病,紲著入療養所;對按呢,繼續休養一年久。我將三个囡仔的中間,大漢兩个寄佇外家,偝著第三囝家己一个真無伴留佇教會,來鬥幫忙種種的集會。 1952年春天,因為林牧師的身體猶未回復到佇健康,所以阮就離開遐出去東京雖是已經離開in遐,in猶過繼續一年久負擔阮的生活費。 山梨教會,in這款疼惜牧者的精神,實在使這个為著建堂來破病的傳教者受真大的感激,
阮會出去東京,是為著我欲服務佇日本音樂學校的附屬幼稚園做保母的。我一方面育著三个囡仔佮顧著病弱的丈夫,一方面欲做保育的工作,所以常常感覺著過頭的著磨,身體真厭siān。總是阮猶過無失望,佳哉佇熱天林牧師的身體漸漸較勇,後來受聘做幼稚園的副園長,一禮拜只有出勤數日,主理早起時的集會,製作保育的課程,抑是指導母子會等。也受請去東京聖冊神學院教冊,後來兼遐的教務主任,直到轉來台灣。
佮阮序大人同縣有一个真熟似的醫學博士,名加藤三郎先生,伊所經營的結核病院,佇1953年有聘林牧師佇遐做牧師,我也佇遐的幼稚園做主任保母,直到轉來台灣,共服務兩年久。彼中間大囝入小學校,第二囝幼稚園,第三的寄佇外媽兜。以上親像所講按呢,我是只有做一个傳道者的內助,家庭的主婦,有時應付需要著去做保母服務,干焦佇背後佮丈夫相佮著磨到佇今仔日,實在算是過著真單純的生活nā-tiāⁿ,無有甚麼通好誇口,實在日本的教會也是真單純。
八年前受台灣聖教會的聘請,懷著思念不盡的心情離開日本,對橫濱坐了10日的水路,才到主人的故鄉,上陸佇基隆。1955年2月8日到台南,來台灣了後的事是照恁所知,所以寫到遮欲來結束。  
 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述