數念陳仁愛長老

陳清俊撰 《台灣教會公報》3420期 2017年 9月11-17 日 p.25。

陳仁愛和夫婿李德財兩人為北投基督長老教會長老。夫婦育2男2女，即李天恩、李天參、李齋眉（適羅大裕）、李兩眉（適楊寶發）。

我所敬愛ê陳仁愛長老，是tī北投基督長老教會做長老。當阮tau tī 1950年4月搬到北投，阮ê老母chhōa阮到北投教會做禮拜，阮gín-á參加小兒主日學開始熟悉。Hit時，陳仁愛長老是做主日學ê校長。到我1967年出國，伊lóng是一直tī北投教會服事。阮lóng叫伊仁愛長老。

她ê職業是產婆，就是助產士，所以時間無定tio̍h。若是有婦女beh生產ê時，有人來chhē她，她就tio̍h趕緊tè去，來接生。Thong北投，hit時，只有兩個產婆，有時禮拜開始無jōa久，就有人來叫產婆，教會ê工作交帶好勢，就tio̍h緊緊去產婦ê家，來幫贊生產ê事。陳仁愛長老是教會ê第一琴手(風琴)，是主日學校長。另外教會種種ê tāi-chì，她常常lóng參與。

她ê家庭有丈夫，李德財是tī馬偕病院做藥劑師，有一站bat做北投教會長老。In有四個kiáⁿ，兩男兩女。In ê名叫做李天恩，李天參，李齊眉kah李兩眉。李天恩bat tī台灣神學院教書。李齊眉kah李兩眉lóng bat tī北投國民學校(現在是北投國小)教書。齊眉ê丈夫是羅大裕，也是北投國民學校ê老師。兩眉嫁hō͘ 楊寶發，伊bat做過台南縣長。可惜，兩眉khah早死，留兩個細kiáⁿ，陳仁愛長老有tàu幫忙顧。李天恩tī台灣神學院教書，伊ê bó͘ 許錦蓮，有cha-bó͘-kiáⁿ叫純真，in lóng tòa-tī厝裡。李天參師範大學畢業了後，bat koh tī台灣神學院修課。李天參ê太太郭月足（後來改名做郭悅竹)也bat tī北投國民學校教書。了後去tī再興國小教書。Thang講家庭完滿，lóng是有受教育。我是北投國民學校1954年畢業。

陳仁愛長老ê外家厝，是kah雙連教會以前ê陳溪圳牧師有親chiâⁿ關係。Tāi先，我掠做是陳牧師ê小妹，但是，林俊育長老bat tī雙連教會做長老，伊講陳牧師ê姊妹中無陳仁愛。所以可能是(á是叔伯小妹，á是親堂。Tī賴永祥長老ê資料庫，我chhē無陳仁愛長老ê資料。我知陳仁愛長老kah郭婉如（她bat做過財政部長）有親chiâⁿ關係；tī賴長老ê資料，郭婉如kah陳溪圳有親chiâⁿ關係。因為有一pái，陳仁愛長老有介紹我去郭婉如ê厝做家庭教師，來教劉毓玲。講是教，不如是陪伴，因為hit時，劉慶瑞是郭婉如ê丈夫，台大法律教授，hit時tú過身無jōa久。

陳仁愛長老，阮lóng叫她仁愛長老。我tī北投教會ê時，1950到1967，她lóng是做長老，她也tī北投教會做主日學校長做真久。Tùi北投教會貢獻真大。我是hit時生長，受她真大ê影響。阮少年人peh山，她也kah阮peh。她chhōa阮去野外佈道，到郊外ê人家厝佈道。Koh有一pái到萬里海邊人家厝夏令會。她特別教阮朱子家訓，是用台灣話讀音來教。這是我第一pái用台灣話來讀課文，印象真深。

因為陳仁愛長老是一個產婆，北投鎮內，á是附近ê山區，她lóng會去接生。所以，教會內、教會外ê人面lóng真熟。阮青年人peh山，她mā常常kah阮做伙去。她兩支腳真勇，peh山bōe輸少年人。

有一pái，她ê丈夫李德財，亦是北投教會ê長老，出來競選北投鎮ê鎮長。對手是北投出名ê高調三，是前任鎮長，廖樹所提拔 ê。高調三ê聲勢thang講是真kôan，當選ê機會真大。因為tī北投街á有十個出名ê人宣誓做兄弟，伊kah廖樹，北投國民學校校長，陳全誠，koh我ê 阿伯lóng是十人ê分子。一個鎮長ê選舉，thang講李德財是輸勢。無phah算，高調三tī選舉開始，請出關渡（Kan-tāu）媽祖佛出巡，北投教會青年發動替李德財tàu競選，北投有三間教會，koh有天主教會，lóng去通知。Koh有陳仁愛長老ê人面闊，最後李德財得tio̍h當選。Hit時是我tī高中ê時。

當我高中畢業，iáu有一個月ê時間chiah聯考。陳仁愛長老就請我去in tau，是鎮長ê公館，內面有��泉。我每日tī hia安靜讀書，溫習ta̍k科目，了後koh洗溫泉chiah tńg去。有chit-ê時間ê溫習，我順利考tiâu大學。Thang講陳仁愛長老有幫贊我ê考tiâu。她對我是真疼惜，到我出國，我ê阿嫂亦常常聽起她���起我，數念我ê事。我出國，久久無tǹg去台灣，亦失去連絡，寫chit篇來思念她���我疼惜kah關心。我永遠會記得她ê恩情，亦tī主日學tùi她ê學習基督教ê真理，她tùi��投教會ê貢獻亦是真大。