故張金由長老

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

  黃秋財撰 《台灣教會公報》992期 1966年10月15日 p.13-14


最近(1966年 9月16日下午2點 30分),佇屏東中會的溪洲教會(今南州教會)有失落一位教界重要可敬的長老,就是張金由長老。伊佇台灣青果界也是一位聞名的人物,也是一位剛毅、廉正、篤信、愛人的人。伊的去世 \不但是伊的遺族受著真大的打擊,對佇教會是真大的損失。

佇chia我來寫伊的略歷佮伊的做人來追念伊。

  1. 略歷。伊出世佇1915年1月13日,佇1934年結婚;有4男,3女。伊佇1934年畢業屏東農業學校,前後有任公學校教員2年,鄉公所記事3年,青果同業組合13年,屏東檢驗站站 3年,然後自營農場,後來當農業關係的公職到死。
    伊佇主後1948年6月27日領洗進教,前後當長執16年久。

  2. 伊是勤學,刻苦的人,伊雖然是出世佇貧困的農家,總是對學業真認真,對子女的教育也是非常的關心,大部分的子女攏有畢業大專 á是現在在學中。

  3. 伊是守信, 廉正佮盡職的人。伊一旦若答應人的事,無論有甚麼困難也的確做到成。佇伊的職位上,伊時常有濟濟機會thang得著額外的金錢á是物件,總是一絲都無beh 貪。閣再伊是一位盡忠守職,所以十分得著上司的寵愛佮信任。

  4. 有公益心。伊對 hiah-的直接teh生產芎蕉的蕉農的收益,非常出力kā 怹爭取,若是對 hiah的貪官污吏,伊就不怕自身不利的後果,嚴正,依法對抗,免得hiah-的農民受剝削。所以不止受蕉農大家的敬仰佮愛護。

  5. Gâu疼上帝佮疼人。伊前後佇溪洲教會任職約有16年,其中也bat當T. K. C.會長。對佇主日學的工作非常關心。佇中會也有擔當過財務部員。
    本身做人虔誠,熱心閣篤信,佇最後beh 別世的一禮拜,雖然病重艱苦,猶原phe命忍苦來參加禮拜。閣再伊雖然知家己的病是絕症,猶原親像約伯,攏無發出怨言,吞忍,順服上帝到臨終,佇社會上是一個出名的 "鐵面無私"的領導人物。閣一面,伊是gâu敬重牧師的人,而且無論會內,á是會外,伊無分貧賤富貴,地位的 koân-kē,年歲的濟少,歡喜佮怹親近,問長,問短,關心佇怹的生活, 佇暗中真gâu幫贊弱小的艱苦人。對待工人,工作上真嚴正,總是內心是滿有疼情。Gâu體貼, 恩待怹。
    對教會的奉獻koh-khah是甘心,出力。結婚的當初,家境貧困,有濟濟負債,iáu-kú出力奉獻。對支會坎頂的建堂,雖然家己iáu有負債,10 幾萬圓的預算,伊就獻3 萬。 建堂中伊有幫忙監工。 雖然破病漸漸傷重, iáu-kú phe命m̄肯歇睏,每日跑真遠的路站去監工。因為伊常講:當我iáu有活命,氣力,我著盡力來做,我iáu活teh 會 thang獻的時,我beh盡力來獻,恁m̄-thang kā我阻止。

  6. 伊有平安踮佇主臨終。
    佇伊臨終的時有寧靜,安祥的面容,入墓前的遺容是充滿光明,笑容,平安的容貌,對按呢, hōu伊的遺族,親人佮眾信徒大家流了真深刻好的印象佮安慰。告別禮拜,有一千左右名的會眾,但是這個是溪洲空前未曾有的。

 

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述