受李主筆e5要求，將頂面e5題目，寫這篇，暴露我e5人生中重要e5一段，thang做我本人e5感謝，若會做看報e5兄姊e5參考就真感謝。當我讀中學e5時e5窗友，聽見我讀神學校，閣做「牧師，」逐个就講，「真奇怪。」因為當20歲前後e5我，是血氣到極風光，不時愛出風頭，趁做「牧師囝」優越e5條件，(當時讀淡中，牧師囝確實有較便利)
老爸做牧師e5致蔭，感覺加真有勢頭，所以無人敢想我會做「牧師，」也會堪做「牧師。」就我家己對信仰上e5問題，也是奉行故事，只有親像食飯，吸空氣，無啥物感激，閣較無啥物「感激」thang講，雖罔老爸是牧師，我是大囝(長子)，應該著續接老爸e5「衣缽」總是連想就無。根本予人公認是一个「歹囡仔，」予學校真為難e5注意人物。
不過上帝e5聖旨意，是極其「奇妙e5。」我會thang徛在ti7信仰，閣會thang對1932年起做傳教者到今仔日，無lang3-cham7，實在是上帝「奧妙」e5作為。「信仰e5師友」是真oh
chhiau-chhe7，事實也是真少。我20歲卒業(畢業)淡水中學了後，有ti7自動車會社(Bus公司)kap
ti7tai7代書e5所在食頭路(就職)，是因為我是大囝，老爸愛我共伊鬥分phin3家庭e5重擔。Ti7這3，4年e5中間，雖罔有趁一寡錢thang予老爸相添疊，總是我e5心攏無滿足。毋是我毋願做，事實是因為我e5內心未安靜。我猶ti7公學校(小學)e5時，有老爸e5好朋友，鼓勵我去考
8年制e5醫專，有欲ka7我出學費，總是老母是愛我讀神學。伊不時就獎勵我，著準備thang予主用。結果我無考醫專，是考淡中，ti7淡水讀5年e5冊，卒業了，in為著鬥負擔小妹，小弟e5學費，所以無去讀神學校。(雖罔老母不時咧念)，家己也無想欲讀。總是ti7這3，4年久，實在是非常e5空虛，心神攏boe7安定，ti7心內親像有風湧咧起落！老母勉勵e5聲音，自然抑ti7
hit中間咧溢來溢去。一心想，著來去讀神學，總是閣一心想著老爸擔重擔，未做得看伊予家庭咧
kah un2-ku落去。Ti7兩難e5中間，有聲共我講，「你若死了欲去陀位」我就kap老母參詳(老爸出差無ti7咧)，閣得著陳清義牧師叫我提出願書，(彼時拄好是招生期)，我就ti7
1928年e5
4月得著允准，入ti7淡水e5台北神學校讀冊。
讀一學期到歇熱(暑假)，受派ti7中壢教會幫贊兩月日，問題ti7這个以後發生！就是第二學期開學e5以前，我接著明有德校長e5批，叫我慢才去上課。青天霆大雷！！聽見e5人逐人攏戆愕，即時調查，結果，講是舍監先生報告教授會講，張某某無傳教e5精神。校長也就採納伊e5意見，命令我毋通去赴開學。到底是為著怎樣才會受著hit款e5報告kap處分？就是為著炊事e5問題。逐禮拜日，阮學生因為出去做工，有e5暗時會較晏轉來，總鋪(廚師)嫌費氣，就對舍監先生叫苦，致到舍監先生共總鋪講，若過時間攏共伊捧拚落賁(phun)。拄拄彼時，阮幾仔人ti7
hia聽見，我就好膽應舍監先生講，hia
e5人較晏轉來，是為著去做工晏轉來，人就真sian2，閣無通食太會用得。設使若未用得食，嘛毋通拚落賁，真扑sng2，隔早起嘛會thang
hoah lin-long (阮有這款習慣)。為著按呢，講是無順服舍監，將來無精神thang傳教。
啊！聽見e5人，逐个就講真奇怪。我e5同學逐个就講想未chhun，特別我e5知友(吳)清鎰kap(詹)德建有去請問校長，對伊疏通意見講，「有傳教e5精神抑無，thai有人會知。當然也有將事情報告校長，所以有得著校長答應欲閣開教授會來設法。德建kap
清鎰
in兩人，一面向學校當局交涉，疏通；一面寫批勉勵我毋通失志，聽候教授會e5決定，in講的確有通繼續讀，甚至德建親身來kap家父講起一件事，也鼓勵我著奮發，聽候好消息。開學了，果然得著教授會有條件e5允准，就是試讀，也停止支給每月e5獎學金7月日久。教授會議決了，猶未共我通知e5以前，我就收著一張電報對淡水來e5，發報人是詹德建，報我好消息，叫我緊準備去上課。我所受e5感激，是未講得！！雖罔了後收著學校嚴厲e5公文，我有顯出人的情，想毋愛去讀，總是因為我e5摯友清鎰，德建e5鼓勵，屈而受-chi3，(至少ti7
hit時我有按呢想)閣倒轉去繼續讀冊。雖罔有閣聽見舍監先生共阮e5同學講，「張某某讀boe7卒業，若讀會卒業，做傳道也做無半年。」這款讖語e5話予我真傷心，猶閣為著chia
e5摯友安慰kap鼓勵，才會通讀到卒業。對1932年到今仔日，無間斷咧服務ti7教會，若毋是有chia
e5摯友，穩當會照舍監先生所讖語e5
「讀boe7卒業。」
Ti7 chia閣一个予我數念e5人，就是吳天命牧師。當我試讀e5期間中，我著做苦工，(別e5同學攏毋免做)，才有通得著淡薄做費用。吳先生可憐我，一面每月兩箍銀，(hit時150斤e5蓬萊米是6箍thong2，一斤赤砂糖是角二)，幫贊我e5經濟，到學校閣予我領為止，閣一面做我e5先生，教我神學，也ti7光，ti7暗幫贊我e5信仰，予我免chih8-
cham7。
得著李主筆嘉嵩牧師愛我寫「我所尊敬e5信仰上e5師友」e5時，我寫chia
e5來數念我e5摯友德建兄，我e5先生吳天命牧師，kap我e5老母，以及忍苦
ke taN我e5擔，予我去讀神學e5我e5老爸，in攏轉去天堂啦！也感謝我e5校長kap舍監先生，in
嚴厲處分，有加強我e5不屈e5精神。也感謝上帝，予吳清鎰牧師猶佇咧，thang繼續做我e5信仰e5幫贊者，我也繼續感謝kap拜託伊e5支持。真可惜！！足足31年久我e5傳道者生活中，無thang
che7著對我出信仰e5果子。總是我迫切懇求上主憐憫赦免我，予我ti7晚年會較有成就。
