徐育鄰請安 毛里西亞 1963年2月1日

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

徐育鄰撰 《台灣教會公報》904號 1963年2月p.9 原文是白話字。

台灣母會各位兄姊平安:
得著大家的關心佮代禱,阮一家平安來到這个小的島嶼,經過月外日久攏得著天爸的恩典,逐項攏順序。佇遮講幾句話,愛共大家說謝佮報告淡薄消息,紲拜託繼續替阮祈禱。
毛里西亞(Mauritius)島,差不多恁佇地圖真oh得通揣著,是佇印度洋倚南非洲一个大島叫做馬拉加西(Malagasy)的東爿500海哩的所在,才有咱台灣的19份一个大而已。氣候佮咱遐差不多,這時拄搪熱天 (遮佮台灣的四季倒反) 若是感覺比咱遐有較涼,卻有時也比屏東較熱。地面予青翠的樹木,花草來蓋密,島面有4,5十條的柏油路,有兩萬多台大小型的汽車來往。人口有67萬人,中間咱中國人倚十份一,大部分是廣東來的客人。怹較濟攏做生理,有的對50外年前就來佇遮,已經有3,4代的囝孫,可惜濟濟青年佮囡仔袂曉講中國話,怹較通用本地話。
因為兩百年前是法領,(現時英領) 有留真濟法國的文化,風俗。濟濟法國的住宅真堂皇,樹木,花園青翠,環境幽雅。 法國話比英國話較通用,學校對小學就teh教法英兩國的話,甚至有的中學也teh教拉丁語。 蹛遮的人無論男女老幼,佇相見面,相時的時,攏著愛牽手請安。天主教有真大的勢力,到處,大路邊攏有怹的教堂真堂皇。中國人的信徒也袂少,有濟濟青年為著結婚來入教。基督教��遮有聖公會,長老會佮安息日會等,��公會有主教佇遮,信徒也袂少,長老會有英,法語佮咱的共5間,屬蘇格籣長老會,信徒無真濟。前日我的就任式,有本地的總督夫婦佮聖公會主教夫婦來參加。
咱的教會才成十戶而已,四散佇真遠的所在,佇牧會有感覺淡薄困難。前只有一位德國的姑娘teh做工,感謝主,近來有較濟人來禮拜,總是做困難的工作,這是對青年佮兒童的宗教教育,因為怹較通用本地話,也較慣勢來做禮拜。咱的教會有一位老長老姓卓,今年82歲,是出名的建築師,猶真勇健 teh設計監督,若是伊做咱教會的棟樑,每有聚會就用伊家己的車去載會友來參加,也真疼牧者,社會的人不止欽佩伊。
聖公會佮長老會真好交陪,每月有一擺傳教師聯誼會,前月有一位去赴普世基督教教育大會的牧師,報告咱的黃彰輝院長所講演的內容,也佇2月怹有欲請我發表咱台灣教會的消息。感謝主,雖然我蹛佇這个孤島,猶過毋免做孤兒。請各位兄姐,時常為阮祈禱,就是我的心所願。 2月1日。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述