台灣白話新約譯本序一

Chit本台灣羅馬字聖經實際完成ê khah大意義是：tī中國歷史上，新教kap天主教第一pái ē-tàng耐心koh謙卑，經過七年久來合作完成台灣話ê新約聖經。這需要新教kap天主教ê時常對話、互相分享交換意見，mā tiāⁿ-tiāⁿ發見對仝一項代誌有真濟無仝表達方式ê事實。Tī促進天主教kap新教互相了解彼此ê信仰態度ê努力上，可能無比合作翻譯新約有koh khah好ê辦法。

參與chit-ê合作事工ê每一個人，lóng獻出in ê寶貴時間kap精力。新教kap天主教兩方面tī台北kap台中兩地來回奔波，tī過去ê兩年中間，主要時間用tī審定委員會（天主教五位kap新教五位）ê觀察、建議kap校正，in分別一禮拜tòa台北一禮拜tòa台中，一直到出版草稿完成為止。

翻譯ê最後定稿交hō·由35位新教kap 15位天主教組成ê五十人諮商委員會，羅光樞區主教樂意接受做諮商委員會ê天主教團ê主席。

新教特別考慮配合阮ê要求，翻譯採用漳州腔á無用泉州腔。這是正確ê選擇，因為天主教主要是boeh hō·外國人使用chit-ê翻譯，á 新教ê讀者主要是台灣人，in khah容易來做必要ê適應。

Chit本翻譯最大ê特色是對神ê定義，天主教習慣使用「天主」，á新教使用「上帝」。經過多次冗長ê不斷討論了後，結果決定採用「上主」，這tī 天主教ê禮拜儀式文kap 新教ê祈禱文以及詩歌中時常出現。「上主」真tú好採用新教ê上帝」ê前一字kap天主教ê天主」ê後一字。Chit-ê定義mā真適合中文ê意思，「上」常常用來表示「至上」ê意思，譬如「上好」、「上大」。天主教ê彌撒榮耀頌詩有真súi ê意思：「只有你是主、只有你是至高無上ê。」

阮渴望chit-ê正確ê決定，ē-tàng對非基督教世界證明，天主教kap新教攏是仝一個天父ê囝兒。「只有一位主，一個信仰，一個洗禮；只有一位上主，就是眾人ê天父。伊管轄一切，運行一切，tī一切ê內面。」（以弗所書4：5~6）。因此阮無需要koh來hō·世界ê人講，阮故意採用無仝款ê名稱來互相對立。

台北ê新教做一個採用「上主」ê意見調查，in kā十誡中ê「上帝」改用「上主」，向全台灣寄出數千份ê調查表，結果無收tioh反對ê意見。

Chit本翻譯另外一個真大ê名詞改變是「Sèng-lêng/聖靈」，阮ê聖經學者承認過去使用ê 「Sèng-sîn/聖神」是無正確ê，尤其對hiah-ê非基督徒會引起誤會。「神」tī華人中間，尤其是tī台灣，主要是指非基督教ê神或靈； chiah-ê神tī廟寺內ê形像是地上ê人物，因為in ê偉大kap英雄事蹟，hō·學者kap受伊影響ê人尊敬做神ê地位。Kā聖靈稱呼做chiah-ê非基督徒ê神之一，kah-ná無真妥當。「Lêng/靈」chit字主要是指無實體、無形體或靈魂上ê物件，最後由華人in家己去決定chit-ê用詞，阮外國人確實無法度來做chit款 ê區別。Án-ne看起來，「Sèng-lêng/聖靈」雖然m̄是上適當ê定義，總是比「Sèng-sîn/聖神」有khah進步。Tī基督教ê禮拜中，牧師tio̍h需要考慮會友ê敏感性。

Chit本翻譯ê地名kap人名是根據新教ê寫法，理由猶是boeh盡量建立共��。「Án-ne咱就��經m̄是囡仔，bē koh受欺騙者ê教義ê影響，親像hō·風吹來吹去，tòe波浪飄流。Chiah-ê欺騙者用in考案出來ê詭計來引誘人犯錯誤。」（以弗所書4：14）

地名kap人名根據新教寫法ê第二理由是，無偏見ê學者lóng認為新教ê譯名比天主教ê khah好，khah簡要koh khah接近希臘ê原文。

做chiah-ê決定ê時，阮有注意tio̍h，任何天主教kap新教ê會友，tī聚會中讀經節ê時tio̍h慎重選擇伊ài按怎讀。起初阮想boeh用括弧加註新教或天主教ê原來用詞，後來感覺án-ne會混亂，讀起來bē順。

阮非常了解台語不時會改變，tī台灣koh會受華語ê影響。自阮第一pái來到台灣ê 1952年起，阮發見台語有真濟變化。因此，暫且mài管chit本翻譯已經有改進真濟所在，這無jōa久就會過時，tī 1982年以前，短短ê十年內，tioh需要koh修正。台語ê轉變kah-ná to̍h是hiah-ni̍h快速。

同時咱需要翻譯ē-tàng對今日台灣ê現代少年人講ê聖經，thang用in ê語言來傳佈上主ê信息kap伊對人類無限ê愛。

願chit-ê新教kap天主教ê謙卑努力合作，ē-tàng消除hiah-ê非基督徒ê流言，in講阮互相m̄是兄弟姊妹，卻是對敵，chhōe機會來互相攻擊。

願chit-ê新教kap天主教ê聯合翻譯新約全書，hō·咱kap咱ê主天父相結連，tú親像伊tī約翰17：21~22中ê祈禱：

「我祈禱thang hō· in成做一體。父親à（**ah），親像你tī我ê內面，我也tī你ê內面，求你hō· in在咱ê內面成做一體，thang hō·世間人相信我是你差派來ê。²² 你賞賜hō·我ê榮耀，我也賞賜hō· in，thang hō· in成做一體，親像咱是一體ê。」

感謝：

阮tioh感謝天主教kap新教兩方參與工作ê濟濟人，無法度tī chia一一列舉；但對下面兩個人，阮tio̍h特別感謝：

Ko Chek Hòan 高積煥先生 Tân Pang Tìn 陳邦鎮先生

透過chit兩位學者ê耐心、堅持kap無暝無日ê努力，克服無數ê艱難，chit本翻譯才ē-tàng完成。Chit本翻譯ē-sái叫做：高陳台灣白話聖經譯本或簡寫做K.T.V. 用台語傳播好消息ê聖經譯本

希臘語 “KERYGMA” ê意思是宣布，初代教會是指宣布拯救ê好消息──福音。