數念楊致祥長老 (1900-1965)

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

呂春長撰 「故楊致祥長老 伊的做人」 《台灣教會公報》976號 1966年2月15 日P.8-9; 977號1966年3月1日 P.15-16、20 。原文是白話字。
按:楊致祥長老,1900年2月13日出生於台南縣仁德鄉,父親楊大綿,而是楊雲龍長老之小弟;國語學校畢業,1925年1月17日和王那寶(王接傳醫生四女)結婚,1965年12月2日去世,享年66歲。夫婦育1男2女,即楊東岳、楊玉兒(適洪伯揚)、楊英兒(8歲去世)。 

現在我用沉重的心佮數念的情,來寫淡薄咱所敬疼,值得人數念佮效法的故楊致祥長老的履歷,以及伊的做人。
故致祥長老,享年66歲。伊佇民國前12年(1900年) 2月13日出世佇台南縣仁德鄉。自幼賦性良練,聰明,孝順母親,尊敬兄哥。
國校5年的時,就考上師範學校(當時稱做國語學校)。在學中敬大疼細,幫贊同學掛蠓罩佮折被, 這個事予伊的老同學朱萬成先生(省議員) 佇伊的追思禮拜中iáu teh大大數念。因為伊的品學兼優,畢業後就受派佇治台南市附屬小學服務,是一個循循善誘, 以身作則的好教員 (老師)。
總是故楊長老少年的時,心懷大志,所以一年後伊就東渡日本,準備報考醫學院。 M̄-kú,因為義務職教的期間未滿,紲被召回台灣,改派佇車路墘國校做教務主任兼代校長。
到民國14年(1925年)1月17日,就佮中部社頭的望族,也是主內的姊妹王那寶女士結婚。 民國 15年就辭教育界的職,準備再度上京(東京留學深造。無拍算,忽然間tio̍h重病,不省人事,袂講話,佳哉佇旗後靜養,有挽回性命,總是日本之行就紲罷論。
以後就到彰化經商,一面做生理,一面傳道理,熱心服務教會,為主做工。兩年後遷回台南,經營「信成商店」,顧名思義,信而成知,有信才會成功,乃故楊長老畢生一貫的信念。伊的信是純真的,伊的成是成全上帝的旨意。
佇台南市經商的年間,(1936年) 宋尚節博士來台奮興,信徒大受感動,就紛紛組織佈道隊,鼓舞十字架三角旗,到處為主做見證,每禮拜至少一擺,風雨無阻,出外為��傳福音。彼時太平境教會佈道隊幾十, 隊員幾百,是當時全省佈道隊最壯旺,最活動的教會。 故楊長老任總隊長,凡事率先垂範,任勞任怨,深得教會的器重佮大家的敬重。伊有做教會的長執佮青年���間的橋梁,使上下合作無間,得著濟濟(很多)人歸主。伊不但做太平境���會佈道隊總隊長,伊也做主日學教員,(1935年5月任)執事,以後(1939年7月) 任長老濟濟年,對教會的貢獻不少。
抵抵照伊的名致祥,和氣至上。伊不但家己和平,伊也會幫贊人和平。筆者彼時猶原是太平境教會的佈道隊員,是楊長老所統轄的部下,受伊的人格感化真正大。會記得有一個拜四暗,是應該著出去野外佈道的日。總是彼暗天寒地冷,趕狗 m̄出門。所以濟濟青年主張臨時中止,總是也有人高調, "sui出洋風湧oh tu,著進前是主吩咐。"議論結果,分做兩旁,予人笑是戇忠派的就祈禱,出發去鹽埕佈道,無拍算彼暗成績 boē bái。感謝上帝,就洋洋得意捯轉來教會,遐的自稱做識時務的,怹無參加佈道,紲廄踮主日學教室迌洋牌。彼暗施牧師(施鯤鵬)佮長執感心阮的勇敢,毋驚寒,出門為主做工,就為著阮準備燒閣芳,真好食的糜 (點心) beh 慰勞阮,阮真歡喜,感覺為主做工無落空。總是到beh食點心的時,遐的佇厝內teh 奕牌仔的逃兵,也真大面神提碗箸 beh參加,阮遮的屬血氣的青年,就擋 boē tiâu,樂樂念講:"無做工閣敢食。" 佳哉楊長老苦勸阮毋thang 小氣,伊講出去佈道的著食,佇室內teh代禱的也著食,事實上遐的人那有teh祈禱?總是故楊長老做人和平,凡事必求善解。伊不時拚命做工,但是毋捌誇耀家己,批評別人,這款性質非常難得。
故楊長老不但能說能行,伊的特色,就是不說而實行。伊不論佇家庭,佇教會, 佇社會,是一個無瑕可擊的人;莫怪濟濟人稱伊做聖人。伊雖然無讀神學院,總是伊早年就獻身予主,伊雖然經商,總是伊無想發財。伊超然物欲,萬事知足,只有掠傳福音,搶救人的靈魂做家己的責任。伊費盡精神,肯盡全力,為主拚命。伊毋驚生理無趁,毋驚損害健康,毋驚日本警憲無理的壓迫。捌一擺,因為佈道隊的標語寫一句聖經講:人若得著全世界來喪失伊的性命有甚麼利益? 日本警憲為著這句起疑心,講是基督教teh譏刺大東亞戰爭。就召故楊長老去問,彼時伊得著聖神幫贊,勇敢無驚,徛(站)佇作威作福的官府面前,解釋聖經真理,佳哉後來無代誌。雖然傳福音不得時,但是伊無失志,孜孜求上帝的國佮上帝的義。伊是一個不怕窮,不怕苦,只怕人生無耶穌;不求名,不求利,只求耶穌在一起的聖徒。伊佇太平境任職工作是到第二次世界大戰,政府命令百姓疏散為止。
大戰中故楊長老的全家疏開去故鄉中洲。佇彼時伊的老母別世,伊的老母是一個敬虔的女徒,真疼主,閣真疼囝孫。 故楊長老是一個侍母至孝的人,一生毋捌予母受氣煩惱;照朱萬成議員的干證,講怹佇國語學校teh讀冊的時,bat一擺致祥長老佮同學約某時beh去某所在𨑨迌,若是到時,無看著伊來,大家真奇怪,因為伊將來毋捌無守約。到後來才知影,就是彼日伊的老母頭殼疼,伊佇厝裡照顧伊的老母,可見伊怎樣孝順序大人。所以伊對老母的別世非常哀悼,閣疏散前佇台南伊有一個真伶俐閣可愛的千金名英兒,8歲離開世間,如今所敬愛的老母伊有別世,這些事予故楊長老愈看破世間的空虛,也愈看透天家的可愛,對按呢,予伊愈疼主。所以佇光復後,雖然得著桑梓的父老敦請伊出來做中洲國校的校長兩年;若是投機取巧勢利之徒,大大有升官發財的機會。總是致祥長老卻是「人醉生 我獨醒,人馬虎 我獨認真」,治學極其嚴謹,甚至積勞成疾,就辭去校長的職,轉去台南養病。
身體恢復健康,就去鶯歌做豐源煤炭公司的會計主任,因為伊是股東,時間不止自由。所以佇鶯歌約10年久的中間,伊不分日夜為教會擔憂辛苦。對無求到有,對稅(租)厝做講義所到成立教會起聖殿,伊的出力,伊的鼓舞,彼的功勞永遠不能磨滅。今仔日鶯歌教會的信徒佮捌佇遐做工的傳道人無m̄大大teh 數念。
了後故楊長老有結束北部的事業,接受聘請到埔里基督教診療所對患者傳道。另外一面,伊有獻工佇無牧的牛睏山教會。伊親像巴拿巴是好人,予聖神充滿, gâu安慰病人,閣用刻苦耐勞的精神協助軟弱無牧的牛睏山教會。 這間山間的教會離埔里街仔不止遠,總是伊呣甘坐三輪車,乃是以歩代車,用所節儉的錢來奉獻教會,soà減輕教會的負擔,你看伊疼主,疼教會到怎樣?不幸佇埔里工作的時,發見著身體有嚴重的病症,就轉去台南靜養治療。但是伊為主決斷boē-thang恬恬坐teh,佇台南南門教會猶原是當主日學教員,閣教會無論大小聚會,伊攏奮勇參加, chhoā人祈禱,主理查經,幫贊牧者,造就感化濟濟信徒。佇南門教會,伊早早當選長老,總是為著身體的緣故,驚了辜負所託,呣敢就任。總是伊逐項事工照做無差。到舊年,無法度推辭才就任做長老, 濟濟少年人講:這呣chiah是真正的長老。試想,故楊長老怎樣不顧身體衰弱,拖病為主服務?就是因為伊感覺人生短促,機會不再的緣故;若無及時做工,驚了無機會。
故楊長老所致的病, 常人只可活一年半載,總是伊竟然活8年外,包括初期iáu未發見,可能10年以上,這是對伊的令兄賢姪,以及某囝 gâu照顧佮伊倚靠信心來活的大神蹟。佇台南養病中, 故楊長老也捌到中部山間的峰谷轉地療養,佇遮有一間對霧峰母會來新設的教會。伊佇遐每主日主持講道, chhoā信徒研究聖經,予遐的信徒得著濟濟靈性上的幫贊;到今 iáu teh 數念無soah。怹聽著楊長老別世的消息,真濟人提到流目屎。
林宗要牧師回顧伊早年做神學生,捌受派去鶯歌教會做工,對致祥長老的印象講:"楊長老款待我親像伊家己的囝兒。" 楊長老為著教會著磨,圖謀無khah su一個專任的傳教者,楊長老的疼心佮做人予我得著真濟的學習,我一生數念楊長老,聽著伊的死,予我的心真苦悶。相信不只林牧師一人按呢想,有真濟識致祥長老的傳道人也攏是按呢感覺。
今故楊長老的做人佮工作的原動力是對 tá落來?就是伊佇隱密中靈修,對主所支取的,伊佇厝內經常手真罕得離聖經,伊逐日真早就起來靈修,為人代禱,伊的妻兒 對這項的印象極深,就用一句話來結論伊。伊完全是一個信仰的人。
到民國 54年(1965年)9月底, 故楊長老有去台北台大附屬醫院通院治療, 這時也bat 轉來台中查某囝的所在。 這時iáu-kú念念不忘台南的工作佮家己做長老的責任,伊迫切希望會 thang趕回台南參加長執的就任典禮。
總是不幸這時佇台中犯了惡性的感冒,就佇 (1965年) 11月6日再度入台大醫院。雖然經過真濟的名醫細心診治,以及妻子,兒女,兄哥,兄嫂周到的看護,親朋同道同心迫切的祈禱;若是上主的旨意已經定著,結局無法度thang挽回伊肉體有限的性命,到了12月2日清早就對長老娘講:"我boē- thang 過今仔日啦 ,免閣為著我祈禱啦,這是上帝的旨意,愛我khah早轉去。"就佇當日10點半安然辭世, soah了世間的著磨,凱旋來安歇佇恩主的懷抱,對咱真呣甘,對伊心所願。 故楊長老身後有留長老娘,閣有長男楊東岳君,成功大學畢業,現時任職佇信中製藥廠,佮雯瑜(?)女士結婚,已經有兩男一女, 囝孫真有孝。長女楊玉兒高女畢業,匹配成大畢業的洪伯揚君, 現任台中公路局保養場長,也是忠孝路教會一個真忠實可取的執事,已經有兩男兩女,家庭美滿,有好見證。
故楊長老的內外孫個個聰明, 乖巧,攏是長老所心愛的,相信chiah-的囝孫攏會thang跟隨先人美好信心的腳跡,來安慰序大人在天之靈。親像約翰三書 4節講:"我聽見我的囝兒佇真理teh行,我的歡喜無khah大佇這個。"
我知故楊長老對佇囝孫的期望: 第一,就是著敬畏上帝。第二,就是著孝順父母。第三,就是兄弟姊妹愛(要)相疼。因為這三項是伊家己以身作則所行的路。 楊長老怎樣敬畏上帝,怎樣有孝老母,這已經講了,伊怎樣對待兄弟,伊的胞兄楊雲龍先生佇數念小弟的時陣,聲淚俱下,使會葬者大受感激。伊講, "伊的小弟致祥尊敬伊親像序大人,66年久做兄弟毋捌忤逆伊一擺,也毋捌毋捌加話一擺,每事都佮伊參詳,伊對兄哥的牽成佮栽培時時數念。" 怹兄弟實在thang做人的好模樣。
故楊長老不但尊敬兄哥兄嫂,伊也真疼兄哥的囝兒(姪仔), 濟濟姪女流目屎數念好的阿叔。有的 (楊瓊姿女士) 對美國寫批來安慰阿嬸。 批內怎樣數念阿叔,講阿叔是好的阿叔,有信仰佮疼心的阿叔,笑容溫柔的阿叔,是好的阿叔, gâu 教主日學,感化影響伊的阿叔, iáu活佇伊心中的阿叔,相信現在佇上帝身邊的阿叔。對 chiah-的動人的情辭 thang知影楊長老的做人。
故楊長老不但敬畏上帝,孝順父母,尊敬兄哥,愛惜敵人;伊對人人攏真好,伊言行一致, 毋捌口是心非,所以人人由心欽仰。 佇告別的追思禮拜,南門教會坐滿了會葬者, chiah的人佮普通一般人情世事, 禮尚往來的siong應付無相(同)款,所以彼的會場的空氣也無相(同)款。 彼日遐的人攏是對人格的感召,真正為著數念致祥長老而來的。因為是數念這個實在的人,所以彼日人teh 呵咾楊長老也攏講實在的話。有時咱呵咾人(包括死人)良心無平安,因為彼的人無影遐好。 閣有時咱teh 呵咾人(包括死人)邊仔的人teh bih-嘴,心內teh冷笑,因為彼人並無遐呢好,甚至色德其反。獨獨彼日人teh 呵咾楊長老,人人點頭表示同感, thang知伊的做人。故人講:以銅為鏡,可以正衣冠。以古為鏡, 可以知興衰。以人為鏡,可以明得失。咱若以故楊長老為鏡,就thang省察咱的信仰佮做人。
最後我佇主的名對楊長老的遺族講幾項:
1)著感謝上帝,予恁有chiah好的序大人。箴言20: 7 "照正直來行的義人,伊的後裔有福氣。" 著知恁是有福氣的囝孫。
2)著追隨先人的腳步,來效法伊行代誌佮做人的美點。
3)著親像先人敬畏上帝,熱心服務佇主的教會。
4)老父已經無佇世間,所以著加倍孝順老母,來承接上帝的賜福。
5)兄弟姊妹愛(要)更加相疼來實現老父的願望。
故楊長老已經爭戰好的爭戰,盡跑走的路站,守所信的道理;今安然過世去對主領受公義永活的冕旒,咱著為著伊的得勝來感謝主, 向望無久佮伊相見佇天家。

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述