蘇育才牧師小傳

安貧生（郭朝成牧師）撰 《台灣教會公報》655號，1939年10月 p.14-15

蘇育才牧師，乳名生，1883年7月20日生，1939年7月16日去世，享年57歲。

1908年和台南黃悅（參見蘇牧師娘黃悅長老）結婚，育1男（蘇振輝）及 5女。

蘇育才牧師，乳名生，土名本庄e5人叫伊酷e3。明治16年(1883年)7月20日，出世ti7彰化市e5東爿，約phou3-ji7路e5 快官。父母早過世，伊e5兄蘇參(Sam是真老實e5農夫。In兄弟e5性情舉動，有天差地e5 cheng差。

蘇君為著無序大人e5約束，生成是勇敢好戰e5性質。到15、6歲e5時，一大群e5青年，蘇君就做黨首，喝扑就扑。庄中e5人驚伊若驚虎，人就講：「酷e3若無扑死人，穩當會hou7人扑死。」

Hia有熱心e5信徒本兄kap 彬兄，聽著人teh議論伊，Koh看著伊o5舉重，為著伊深深煩惱。就盡做基督徒e5本分，極力勉勵伊著聽道理，將來正有好結果。Hit年蘇君tu2 17歲，歡喜kap in去禮拜、學白話字，無久聖經會曉讀。這擺提聖經去店仔讀，一群人走來看：「he2,酷e3真gau5,會曉讀豆菜芽」，讀到一句「阿爸父ah！」一人應講： 「Oe5-e7。」蘇君一時發性起手扑一下，hit人倒ti7地裡。

可惜伊聽道理無偌久，為著環境e5關係， hou7朋友招去出外謀生活，亦bat去ti7輕鐵會社奉職。這時伊也是做黨首，花柳e5事伊無興，相扑有趣味。冷心續m7 bat禮拜，舊性koh發生，後來koh轉去本鄉。本兄極力勉勵伊，著koh行天路較有福氣，伊也承認拜上帝e5生活上好。決心koh行天路，這時態度大變成做新e5人，亦想將來ai3做主e5工。到20歲e5時，聽著茄苳坑口教會有設小學，就khoan2行李來hia讀小學。Hit時黃獻章先生ti7 hia做傳道兼教小學。蘇君真出力勉強，學算術、讀漢文，到舊曆e5年底，soaN3學，官廳m7准，小學新年be7 thang koh��。蘇君就去chhoe7梅牧師、蘭醫生、(林)學恭先生，講伊ai3入大學���ai3做主e5工， in大家歡喜推薦。得著教士會應允，就入大學讀冊。Hit時新入生真濟，蘇君上無實���。原來伊是有才調e5人，koh勉強、試驗(考試)e5成績真好，常常贏過有經由中學e5朋友。

明治41年(1908年)新曆正月，tui3神學校卒業，亦隨時kap台南市黃氏悅女士結婚。黃女士是有學歷、有才調、熱心、骨力，對內、對外攏圓滿，性情溫純，蘇君ti7教界e5成功，實在得著賢內助。

伊所toa3 e5教會，就是鯉魚潭、大社、豐原、大肚、屏東、鹿港、清水、彰化、麻豆。大正9年(1920年)，受彰化本教會極力聘請做牧師，3年任滿就辭職，去toa3麻豆教會一年久。大正13年(1924年)，屏東堂會聘請伊做屏東堂會e5牧師，共toa3 12年久。因為有相當e5人物許有才君， thang接伊e5任，伊就讓賢辭職。

昭和11年(1936年)任高中(高雄中會)名譽牧師。到今(1939)年身體衰弱，就辭名譽牧師e5職，向望ti7家庭靜養， hou7身體較勇健，無扑算戰馬無跑顛倒m7好。

本(1939)年7月16日，午後11點15分，安然kap世間煞，去天父兜，享壽57歲。福氣ah！留蘇牧師娘、令郎蘇振輝君(1907年12月31日生)、kap 5個千金，kan ta siong7煞尾e5查某子boe7出嫁，內外孫成群，伊e5人事已經盡lah！

記幾項來數念伊。

1. 伊是雄辯家。伊讀冊經由正有5年久，論學問是平常，總是伊e5口才真優秀。佈道聽眾無論幾百人，伊一下講，大家靜靜teh聽。Ti7拜堂e5說教，話真重，感動真大，會hou7人流目屎、驚惶、反悔。kap會外e5人討論宗教e5問題，伊亦是企ti7優勝e5地位，是南部傳教者一流e5雄辯家。

2. 伊是有常識勇敢e5。未信主e5以前，伊是勇敢扑人，信主e5以後，是勇敢保護教會、勇敢做主e5工，別人驚惶m7敢做，伊是進前去做。伊e5常識真豐富，認識真透。教會事、家庭事、財產事、冤家事、親事，若有費氣e5所在，請伊到，聽雙方e5話了後，斧頭舉起phoa3落去，萬事to解決。「Be7來，chhoe7蘇育才」，實在無錯。伊幾若回做南部中會e5議長，做高中e5議長，辦事真敏捷，條條有段， hou7議場安靜，伊是有統制e5條件。

3. 伊是盡忠e5工人。伊做主e5工33年久，有領謝金、抑無領謝金，伊是一貫盡忠，無論寒熱、風雨、遠近、平崎、日暝、勇健、抑lam2身命，伊是無推辭進前teh做。伊e5身體hiah lam2 帶幾若項病，亦拖病teh做工， kaN2是ai3學保羅e5款，盡忠到死。大向望伊e5子女，會繼續老父e5信仰，盡力援助教會。

伊有遺族ai3火葬，7月24日，下晡3點，ti7彰化拜堂舉行嚴肅e5告別式，逐方面e5人to有來會葬，大間e5拜堂坐到無位，真盛況。