多田惠致李瑪珍函述。多田惠曾做東京台灣教會主日學台語白話字班教師，『台文通訊Bong報』日本聯絡人，台灣獨立建國聯盟中央委員。有在農村神學院教書  

李孟哲牧師欲來東京台灣教會牧會彼當時，我咧參加青年團契。聽著伊是台南神學院副院長，有一個查某子咧讀日文系，所以較無語言問題。後來in查某子參加青年團契。李瑪珍牧師娘是音樂系ê老師。對留學生來講，不但是信仰上ê先生，嘛親像真正ê老父。李牧師有科學精神，討論代誌攏真客觀，不時咧吸收新ê知識及會友分享，嘛有幽默互大家欣賞。若有表演活動會看著伊咧歕薩克斯風。嘛聽著伊本來咧讀化學工程，逐牧師娘逐及做牧師啊。時常會看著翁某相疼。伊是一位開明ê爸爸互青年人足及意，嘛是少年老父所學習ê理想。 　

伊其實是一位愛國者，是日本基督教團及台灣基督長老教會ê橋梁，互日本基督教界了解台灣人的意志。伊是在日台灣同鄉會所聘請ê理事，伊嘛佇東京積極參加所謂台派團體所舉辦ê聚會。用行動表示支持。 　

伊嘛真重視母語。佇日本ê台灣教會通常會抵著所謂二世ê語言問題。嘛有日本人參加禮拜。李牧師採用螢幕頂頭拍出字幕ê方式互會眾同心禮拜。逐禮拜攏有本週金句，乾單拍出白話字導大家念，互大家複習抑是學習台語、看白話字看慣勢。大家就有信心濟聲吟詩以及參與禮拜程序。台語是台灣人ê橋梁嘛是財產。乾單堅持母語已經足好ê，罕得看著像李牧師按呢惦惦對母語教育付出ê姿勢。伊即馬無佇咧，咱是不是會當分擔上帝交互伊ê事工？