228消失的執事:李瑞漢律師

 

 首頁/  English / Japanese Entries/ 本土信徒 / 史話 / 家論述 / 宣教師 / 外國神父修女 / 原住民 日人列傳 / 賴永祥著作 馬偕周邊 / PCT/  劉家雜錄

張德麟撰 《新使者雜誌》161期 2017 年 8月 10日 p.67-68 台灣教會史 ê 台文筆記 4。 李瑞漢律師,苗栗縣竹南鎮人,906年7月20日生。伊會成做基督徒,是受太太邱己妹( 1909-2008)ê影響,1941年4月27日就任台北大稻埕教會執事,1947年3月10日受掠…. 

佇白話字《教會公報》ê時代,辯護士(律師)刊廣告 -ê,人數無濟。我印象khah深--ê有安里積千代、顏春和、李瑞漢kap戰後ê張英傑(張俊雄ê老父)。這幾個律師背後攏有in ê故事。咱今仔日來論李瑞漢。
李瑞漢律師ê一生,許雪姬教授總策劃ê《台灣歷史辭典》,李瑞漢ê部分(李筱峰教授撰)是一種典型ê寫法:「1926年台中中學畢業後,赴日本。進中央大學法科,在學中即通過『辨理士』(相當今日的專利申請專業人)考試。1929畢業後,留校研究法律年餘。1930通過司法科高考,返台在台北市永樂町執業律師。二次大戰戰後,當選台北市律師公會會長。1947年二二八事件爆發,曾於3月初召集台北市律師公會開會,對陳儀政府提出改革意見,此外無激烈行為。然於3月10日與同樣執業律師的胞弟李瑞峰……及其友人林連宗……,一同於家中被軍警拘捕,一去不回。」
這是一段真簡潔ê記載,咱對其他ê冊,可比講,《二二八消失的台灣菁英》,mā看著「留日、律師、228受害者」這幾項要素綜合起來ê李瑞漢。按呢寫,無m̄著。M̄-ku「基督徒李瑞漢」佇這款ê文字內,soah看未著。下面,筆者就淡薄--á補一寡「基督徒李瑞漢」ê史料,予咱khah完整了解李瑞漢kap伊ê家族。
一、李瑞漢會成做基督徒,是受伊ê太太邱己妹ê影響。邱己妹,新竹人。伊ê親族iáu真濟佇新竹市的長老教會teh禮拜。邱己妹ê老母張月妹是基督徒,是新竹市張松家族ê人。邱己妹公學校畢業了,去讀淡水女學。佇淡水女學,伊kap陳信貞(鋼琴家)、陳碧雲(吳天命牧師娘)是仝班同學。邱己妹淡水女學畢業後,去日本針灸專門學校讀冊。佇欲去日本ê船頂,邱己妹看著一個無錢通買船票ê台灣人,匿佇船--ni̍h,予人查--著。船公司欲kā伊送轉去台灣。這時,邱己妹發現一個大學生(李瑞漢),kā帽仔liù--起-來,péng--過-來,做奉獻袋,為這個台灣人募款買船票。邱己妹真欣賞李瑞漢ê愛心,就按呢,兩人交陪、戀愛。受邱己妹影響。李瑞漢佇日本青山基督教會受洗,成做基督徒。
二、李瑞漢畢業後,轉來台灣結婚、開業。Kā李鐘聲(生)先生租一間厝做律師事務所。這個事務所佇永樂町,李瑞漢全家就佇附近ê大稻埕教會禮拜。亦因為這個緣故,李瑞漢兒女ê主日學印象,攏佇大稻埕教會。
李瑞漢bat予人選做執事。《大稻埕設教120週年特刊》第21頁,1941/4/27條記:「二木八重子(連任)執事、李蔚然、柯潤澤、二木文三、李瑞漢(新任)執事、郭江氏心及謝火爐因故擇期就任。」1947年3月初10,李瑞漢受掠,無法度擔任執事ê職務。《大稻埕設教140週年特刊》可能因為按呢,伊執事ê任期做到叨一日,《特刊》無記。佇遮,欲kā大稻埕教會講,李瑞漢ê任期咱現在ê記錄方式真好,會使予後輩一直問,這人是按怎無記任期到叨一日?若是欲記,筆者佇遮建議,記1947年3月初10。
佇遮愛擱記,邱己妹mā擔任過大稻埕教會ê執事,任期tùi 1953/7/5到1959/10/9,伊mā做過教會附設純心幼稚園ê園長。
三、我相連續寫白話字《教會公報》ê廣告。李瑞漢律師bat刊過一年ê廣告,時間tùi 1940年8月到1941年7月。廣告文按呢寫「辨理士辯護士 李瑞漢 台北市永樂町三ノ五九九六番」。
四、佇李筱峰教授彼本《二二八消失的台灣菁英(1)》中,有記「李瑞漢曾經幫長老基督教會與日本官方的財務糾紛打官司」。為著這句話,筆者特別請教李瑞漢ê大子李榮昌先生。伊kā我講,這項代誌伊有印象。有一工,厝--ni̍h來真濟日本警察,伊會記得in老父有提起「馬偕病院」這個名。
五、李月美姐是李瑞漢ê查某子。In老父予人掠去ê時伊chiah 10歲。佇彼段時陣,伊攏tòe老母tòe牢牢。有一暗,半暝睏起來,揣無老母。伊驚一tiô,緊peh--起-來。看tio̍h老母佇眠床頭迫切teh祈禱。月美姐就去跪佇老母ê身軀邊,kap老母相佮祈禱。M̄-ku,實在傷愛睏,iáu未祈禱
soah,伊就睏kah m̄知人矣。
月美姐講伊kap老母真親,佇老母ê身軀邊tòe前tòe後,所以一寡仔細節伊攏會記得。伊講,魷魚是李鐘聲ê太太送--ê,是三尾,m̄是兩尾。In老母切絲煮魷魚糜。伊koh強調,真濟記in厝ê文章,攏寫in兩間日本厝相連。伊講,按呢記嘛m̄-tio̍h,兩間厝是獨立ê。目前,這兩間厝kap建商合作起大樓。樓腳sòe「摩斯漢堡」。
佇這篇文章,筆者補充一寡仔「基督徒李瑞漢」ê資料,向望幫贊咱擱khah了解李瑞漢。
註腳:
李瑞漢救一個無買船票ê台灣人,是佇台灣去日本ê船頂,抑是日本欲來台灣ê船頂?有無仝ê講法。筆者佇遮ê描寫是照李月美姐提供ê資料。  

 首頁Home/ 本土信徒總檔 / 教會史話總 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述