張錦文的歷史定位

鄭兒玉撰 「紀念台灣醫療管理開路先鋒 張錦文的歷史定位」《台灣教會公報》 3176 期 2013 年1月7-13日 p. 25 

張錦文生平略歷

1934年3月4日，出生於台灣嘉義縣布袋鎮。

1960年，擔任馬偕醫院羅慧夫院長秘書。

1966年，任馬偕醫院副院長，前後服務14年。

1970年，創設馬偕護校，擔任首任校長。

1979年，受外交部和衛生署專案委託，擔任中沙醫療團團長，開創醫療外交，並獲沙烏地阿拉伯王國頒發醫療貢獻獎。

1984年，獲菲律賓醫院協會頒發醫院管理貢獻獎。

1999年，獲第1屆國家公益獎。

2009年，獲第19屆醫療奉獻獎。

2012年11月12日，蒙主恩召。

生長背景佮環境

本人佇228起義後第2年，就是佇1949年白色恐怖抵才開始ê氣氛中，受台灣基督長老教會嘉義中會由東港派往布袋沿海一帶傳福音。60外年前，此个所在iáu是相當未開墾ê貧困邊界，自然環境iáu-kú荒廢、環境衛生無理想，koh日常生活亦真無方便。總是12年中間，佇基督ê名所形成ê牧者佮羊群之間ê交誼，到第3代iáu-kú teh繼續。

在羊群中，錦文兄是特別傑出ê青年之一。他有典型ê海口人性格，就是人情味濃厚、開口就大聲無詭譎ê開放性格、熱情追求真理佮公義。不但如此，他真早就佇故鄉教會立志做耶穌ê門徒，建立生涯ê方向，就是：「人生是意義，不是享受。」

布袋囡仔佇台北

故人佇沿海庄腳生長，koh 佇教會培養基礎價值觀，咱會當對下面ê故事來知影、了解他ê做人。有一次，錦文兄佮 1位女子約會，佇約束ê地點遠遠看見這位小姐正裝相當貴氣，正式化妝、高貴服裝、黑目鏡、日傘，koh穿高屐，就閃開m̄ 敢倚近。照這位海口青年講，經過一段時間後因為掛心，koh再一次去原地偷看，那位查某囡仔猶原站佇 hia teh等候。錦文兄雖然感覺艱苦心，iáu-kú無法度克服這位女子ê服裝所發射ê貴氣氣氛。

後來，錦文兄對牧師夫婦吐露，他對該女子所期待ê是穿學生平常ê樸素牛仔褲運動鞋裝，作伙去ná食牛肉麵ná開講。對女子當日ê服裝，錦文兄感覺有一種hō͘他無法度親近之感ê壓力。對這予人知影，這位青年ê人生價值觀m̄ 是娶媠某趁大錢，以外不管ê腳數（kha-siàu）。

人生ê契機

在故人ê生涯中，可說佇初期已經有3位人士對他決定性ê啟蒙。照上述，前2位是故鄉ê牧師佮牧師娘。In影響錦文兄人生做人ê態度以及價值觀。

後來ê 1位是前馬偕醫院院長羅慧夫（Samuel Noordhoff）醫師，他是由美國改革宗教會派來台灣ê宣教醫師。羅慧夫醫師感覺這位海口青年不但可靠，也發現他ê潛能，就鼓舞他去美國留學並推薦他到自己母校密西根大學深造。

德國現代歷史科學ê創倡人蘭克（Leopold von Ranke）講，逐時代攏直接面對上帝ê拯救佮審判。對平面ê歷史觀來講，故人佇他ê人生中khì遇著啥人，kiám-chhái是偶然ê，總是豈無可能想講，這無定tio̍h是上主ê安排？

馬偕醫院時代

1.現代病院管理ê開路先鋒

錦文兄對美國留學返台了後，羅院長佇1966年聘他做副院長。對此時起，故人就開始他40外年無停ê專業職務。

副院長當然tio̍h擔當院長欲現代化馬偕ê副手。這位青年實在真幸運，佇美國受病院管理學ê理論佮實踐教育了後，koh 佇馬偕繼續受羅院長ê指導，執行科學性合理化ê管理。其結晶是佇 1972年提出董事會ê發展研究「馬偕紀念醫院之展望」。

當時，正是國民黨中華民國在聯合國席位被否決ê隔轉年。這使人聯想先知耶利米佇巴比倫帝國侵滅南猶大王國ê前夕，用復國ê向望購買「可能成為荒廢國土ê」田園ê故事。錦文兄以超越「國家」存亡，並透視上帝佇台灣所設立ê大馬偕未來。這予人感覺具有一點點仔先知味、先知味。

2.進步佮傳統

人類佇建立文化歷史上，到現今所面對無法解決ê問題之一，就是「進步kap傳統」ê選擇。就是陷落佇「已形成文化ê保守價值」對抗「新建立中ê進步價值」，不斷反覆進退兩難，致到永遠翶翶纏（kô-kô-tîⁿ）ê辯論；其中，長老教會所屬ê馬偕醫院亦無例外。

1972年11月，由張副院長提出董事會ê研究藍圖，若照歷史學徒ê本人看起來，因為步調甚緊（siuⁿ-kín），結局董事會無法度接納。照舊約聖經ê時間觀念講：世間凡事有伊ê時、有伊ê期。照看，雙方需要一段再研究koh理解，並把握時機ê成熟。

佇馬偕頭尾服務14年ê錦文兄，因為理念無受肯定，佇 2年後1974年佇失意中留落他ê「馬偕將來發展藍圖」，依依不捨離開馬偕，並接納王永慶先生邀請去建設林口長庚醫院。佇此中間，故人常常對牧師夫婦吐露心內ê艱苦：就是對培養他ê馬偕，報答iáu無夠額。

上主備辦koh較大ê舞台

1.舞台超越台灣到國際間

總是，看起來上帝對錦文兄有另外ê計畫。當他留落「發展藍圖」佇馬偕了後，上帝安排他起初佇王永慶領軍病院管理ê企業陣營，後來廣擴到全台灣，甚至到國際。有企業銳利眼光ê王董事長，可說是供給錦文兄發揮才能之地ê第2人。

受王先生ê引導進入koh較大ê活動舞台了後，照故人ê傳記《望醫心切》所講，他ê活動場地親像無限繼續進展，不但台灣全島bē少ê大大小小病院bat受過他ê教導，他ê指導圈亦擴及到他國，佇病院管理界成做台灣之光。

2.Tī權力中ê錦文兄

故人佇病院界領導管理各種決策佮執行ê中間，自然被附帶持有管理金錢佮人事ê某種權力，當時他不但無腐敗、無激派頭，顛倒做人好親近。這些代誌可能原來就有上記因由，就是佇故鄉布袋時代所建立ê人性觀佮價值觀。對此點可評論：他有實行主耶穌所交代，作「世間ê光、地上ê鹽」。

做人軟弱常跋倒ê錦文兄

回想故人亦是人，當然也會有做人所有ê喜怒哀樂ê感情。當他私下陷落佇做人弱點ê嚴肅爭執，面對親像使徒保羅所告白ê：「我所意愛ê好，我無去做，無意愛ê歹顛倒去做。苦矣！我ê做人」（羅馬書7章19、24節）ê時，數次找鄭牧師娘，佇懺悔中哮、流目屎吐露內心ê矛盾爭執，不知欲如何是好？ 聖經記載，此款佇上主面前虛心懺悔ê心，正正是救主耶穌佇憐憫中溫柔所接受ê。親像大衛王佇詩篇51篇所懺悔àn-ni：「上帝所愛ê，就是憂傷痛悔ê心神。」對彼時起，錦文兄就勇敢面對現實，佇主面前採取他所做ê一切責任。

生涯ê定位評價

故人是不是學者？這个問題ê存在，是在佇學者ê定義是甚麼？ 19世紀德國現代社會科學ê鼻祖講一句名言：「學者只有用各種ê方法說明世界事物nā-tiāⁿ，總是重點是beh改革ê。」

若照上述定義，學者ê專長傳統上只是說明理論nā-tiāⁿ；當然錦文兄不是這種因習傳統ê所謂學者（conventional scholar）。故人不斷將所學習靜態ê理論，成做他病院管理ê動態執行方針。因此，本人欲將張錦文定位做：

現代病院管理 方向盤發動機