施寬宏(施坦)記 「故潘長老小傳」《台灣教會公報》574號1933年1月, p. 26
(潘)馬六長老是潘金聲牧師的令先父，享壽74歲。佇(1932年)12月5號別世，11號下晡3點舉行葬式。 會葬者，對(從)近鄰4位教會來的，共有500外名。 弔竹40外支，弔電40外通，花環5組。 葬式頭到尾不止嚴肅；聽伊的履歷不止有感動人的心，今舉幾項佇下底：
1. 奉事國家。
(1) 明治33年(1900年)，日本領台無偌久，無論佇平洋，抑佇內山，猶有擾亂的事真濟。 其中埔里山內的地方，是不止紛亂，為著按呢，有鎮靜的必要。其中馬六長老為著善良民的性命。 伊歡喜聽官令，放下某囝，冒險出門援助鎮靜罪徒的作亂，到成功時，有得著賞勳局總裁的褒狀kap賞金。
(2) 明治40年(1907年)，帝國建設義勇艦隊hit時陣對各方面募集金項，伊也是贊成，寄附的一人。 後來得著帝國海事協會的褒狀kap謝狀。
2. 奉事社會。
(a) 明治 37年(1904年)到39年(1906年)，是埔里出入的道路真艱難時期，從前是熨對魚池方面出入，國家連鞭設法開龜仔頭到埔里間的道路，募集金項kap工夫，隨時著手，經過幾若年久chiah成功。 對按呢，chiah有今仔日交通的利便，這號致蔭也通講馬六翁kap當時的人的犧牲，這个路成功以後，有得著南投廳長的褒狀kap賞物。
(b) 明治39年(1906年)，埔里管內有種種的機關，猶是開墾的時代，真關係教育學校，施設猶末週至。 所以馬六翁等，共同創設烏牛欄公學校，致蔭代代的兒童到今仔日，這个恩情毋是小可，通講伊是烏牛欄公學校的恩人啦。
3. 奉事教會。
(1) 伊12歲kap in老父，故潘阿敦聽著道理，27歲甘牧師(甘為霖．Rev.William Campbell)的手入聖會，31歲設立做長老，連續當16年久。 祈禱會抑是禮拜日罕得欠席，伊是篤信家，閣是誠實熱心的基督徒，伊kap人談話，大部分是用聖經做標準，厝邊鄰右，男婦老幼，不止愛kap伊交陪，聽著伊過身，濟濟人毋甘。
(2) 佇家庭，伊是不止好的指導者，家庭雖然是散赤，猶久用信仰來栽培囝兒。 伊的囝攏有讀冊，有的去台北，有的去台南讀冊，伊本身感覺疼上帝的疼痛無夠額，真歡喜獻伊的囝佇教會做牧師的工，到伊欲臨終的一兩禮拜前，也吩咐伊的囝著出去設法教會的工到清楚，chiah轉(返)來。
(3) 佇教會凡若有利益的事，伊無勼狹。 伊當職中，是教會不止重要的時期，有甘牧師，梅牧師，巴牧師，廉牧師相接續入來埔里相kap辦代誌。 Soa3建議請頭一回的牧師。 又閣伊當職是明治24年(1891年)，Hit陣交通非常的不便，有生番愛刣人，賊的危險，聽伊講，伊對烏牛欄(愛蘭)欲去台南赴中會，無火車通坐，也著kiah8銃保護出入， 著行幾禮拜chiah會到，抑是步輦無嫌艱苦；也有一擺，伊的婦人生產中，猶久為著教會犧牲冒險去台南赴中會，伊chiah熱心，chiah犧牲，實在真感心，通做好模範啦！
4. 守禮拜。
對我赴任(施坦 1933年4月受派來烏牛欄)以來，每禮拜伊都來禮拜，伊若無來禮拜，我去探伊，就是伊teh破病。 佇病中，伊常常若親像眠夢看見榮光燦爛的神國臨到，聖使出現伊交陪，真滿足，真歡喜，伊有講予teh看護伊的親人，聽伊真愛緊轉去見咱的天父，大家替伊鬥歡喜，後來安然睏去。 佇葬式，是照基督教典禮的順序，極嚴肅的葬式：對午後3－4點chiah出殯到冢地，5點解散。
