潘打眉先生 (1894-1927)

潘勝輝撰 「故潘打眉先生」《台南府城教會報》510卷 1927年9月 p.14

潘先生出世佇1894 年。細漢的時父母立志beh將伊獻hōu上帝做主的工。所以公學校卒業後就入台南長老教中學校。後來卒業了koh入(台南)神學校，畢業是 tú 22歲的時。

佇1916年4 月1 號受派tiàm山豹（澄山）教會約3 年久。後來轉任去草屯、埔里、大湳、牛睏山chiah的教會。頭尾為主做工著磨約8年久。後來為著家庭的都合，辭任倒來伺候父母。不幸佇(1927年) 8月1號受主揀召接納上天，享壽34歲。會內的兄姊宛然hōu 烏雲jia 密，無m̄為著伊痛切啼哭。初二佇伊的本厝舉行葬式，會眾者約400名，thang 講極其盛況。

論伊的一生做人：

1. 仁愛。先生的性情極其溫柔、謙遜，不止ài和平。Tiàm教會m̄ bat聽見kap會友有口角，kap厝邊朋友也真好來去。無論老幼伊不止好親近，所以bat kap伊交陪的人無m̄數念伊的好做人。

2. 信上帝。對細漢的時不止敬畏耶和華。所以論敬神真熱誠。Bat 1擺，伊的後生破病傷重的時，跪落求講：「父ah！求你可憐，救我這個細子。求你莫tit為著做工不足來責罰我。若是父的旨意，別日我歡喜將這個細子 hōu你，來補我為著你所做無夠的工。」這號熱切求叫的聲音親像芳香chhèng到上帝的面前。果然細子的病得著好。

3. 獻工。對辭傳道師倒來本教會，就擔當執事的職份。為著教會的財政不止出力料理。也前年bat做主日學校長來鼓舞主日學。教會的事不止關心，歡喜獻工。

對起病到別世才有兩禮拜久nā-tiāⁿ，雖然入院治療，總是上主的旨意hōu人bē gâu--tit。今仔日先生kap主同企起佇安樂國，m̄免koh tiàm 罪惡的苦海；總是伊所留的幼lám弱女kap遺族，暝日為著伊teh 啼哭流目屎。願列位看報的兄姊佇祈禱中數念伊的家族，學伊的敬虔kap信仰。(勝輝)