（潘）王伯是鹹水港廳頭社e5教會竹宅庄e5人。伊算是頭社教會起基e5人。有頭社e5教會伊就得著道理，差不多ti7
40歲e5時陣。也tui3設教後就hou7人揀伊當職做執事，到頭社設做堂會了後就升做長老，到伊73歲就無當職；眾會友koh留職，伊tui3牧師直直辭講：伊老lah耳空臭聾，
ti7大會e5時beh
kap人議論教會e5事，攏無聽見。所以牧師體貼伊年老當職也真久hou7伊辭，才請會友koh揀別人。Tui3伊無當職猶原是盡忠ti7教會無退。論王伯一生信主e5好模樣ai3排列幾若項：
1.
王伯e5盡忠。
Tui3王伯當職有歷過起三幫e5禮拜堂。頭一幫是草厝chhak8竹e5,是王伯本身kap伊家己厝內e5人起e5,攏無開教會e5錢。Koh禮拜堂內e5眠床、竹bih-lou7就是傳道所用e5粗ke-si攏是王伯本身e5工創
e5,猶原也無開教會e5錢。後來教會較進步草厝siuN7隘，就koh鑿三間蓋瓦e5,會容允tit成百人聚集。今起這te3瓦e5,猶原是伊家己e5工，起頭有幾若e5兄弟鬥幫贊。到後來兄弟做了sian7直直溜，就續chhun王伯一人teh做，伊攏無想sian7,也hit時是夏天時日當熱。本庄e5世俗人就恥笑講：「HaiN7
ah！王伯你chiah
nih老lah，也日頭當熱，攏無人迫你，你an2-choaN3
hiah憨，逐日toa3
chia teh khok8-khok8」。王伯吐氣就講：「Ai3
ah Lin chiah e5人m7-bat上帝e5恩。」
也hit時真久無落雨，本庄世俗人就講：「王伯ah，你e5禮拜堂著緊蓋，因為lin
e5上帝看你boe7
kham3續m7落雨。」到王伯禮拜堂tu2
kham3了就落大雨。M7-ku2本庄e5人無醒悟果然m7-bat上帝e5恩。今這幫是第二擺e5。也第三幫koh起是我ti7頭社e5時。主1906年e5時陣就koh起一間新拜堂e5聚集兩百外人。起這間是hou7師父包做，小工是逐伙灶
e5兄弟硬腳經輪流；王伯雖然hia老70外歲lah，伊也輪流kap人做小工頭toe3到尾。這真正是王伯e5盡忠lah！
2.
王伯e5克己。
伊來聽道理e5時陣是艱苦攏無田業，到聽道理了後上帝就漸漸賞賜到hou7伊有田業。總是伊攏無生子thang得伊e5田業；所以伊boe7死e5時陣，就將伊hiah
e5田業分做4份hou7伊e5親族，一人一張khau書，攏be7
sai3賣tit。也每份每年著納5箍hou7教會做傳道薪金e5路用，王伯無beh
tui3 in來抽做家己e5路用到ti7百歲年老。這是伊e5克己。總是王伯身軀邊有100箍e5現銀，m7-ku2伊也無beh留做家己e5路用；伊有tui3教會講明，頭社e5教會若koh起新禮拜堂，伊beh將hit百箍做起拜堂e5所費。所以ti7
1906年koh起新禮拜堂，伊就提獻hou7教會。
Koh一項田業分hou7伊e5親族，也hit百箍講明beh獻hou教會了後；伊就家己koh再扑拚，開山掘坪種蕃薯、芋仔、薑、李仔、粟仔，an2-ni收an2-ni食，m7免靠別人；雖然hiah老m7-ku2身體真勇健，真gau5拖磨。也伊所食e5日食就是蕃薯簽配豆醬真儉；我若去探伊，看伊食蕃薯簽配豆醬，就ka7伊講：「王伯你chiah
nih老lah，m7
thang專食蕃薯簽著chham較濟米，亦著買淡薄較好e5物來配。」伊就應講：「這號日食我都iau2食會落去。」若伊e5查某孫看伊身體淡薄破病，蕃薯簽chham較kau7米，伊就嫌伊，叫伊較儉，米粟真貴。今伊e5勤儉所積聚e5錢獻hou7上帝做教會e5路用，親像傳道薪金，本堂e5雜費或是贊別位，年年攏做頭代先來交。今這e5是王伯克己ti7教會。
3.
王伯e5仁愛。
Tui3王伯聽道理了後起頭到路尾真gau5招呼人來信主。也真gau5疼痛人體貼散hiong人。所以有濟濟人tui3看王伯e5仁愛疼人受感激來信主。若hit號散hiong艱苦e5人ka7伊借錢，伊無推辭，也無算in
e5利息。論伊kap人交接往來心肝真開闊，雖然hou7人較phiN
伊無ai3
kap人計較，真gau5吞忍。若教會內或是教會外e5人到伊e5家不止虔意好禮款待人。論傳道e5人伊koh較加倍e5敬重款待。這是王伯e5仁愛。
今論王伯服事上帝e5熱心kap伊e5好品行執守聖道幫贊教會盡心盡力m7免攏總講。M7若教會內e5人大o-lo2尊敬伊，就教會外e5人常常講：「別人m7知，看到王伯e5好品行穩當上天堂。」
今就是ti7今年1909年4月2號（閏2：12）就安然返去父兜，享受78歲。實在真恭喜，王伯今已經脫離世間一生e5艱苦，享受天堂永遠e5大福氣。Hit日送葬e5人有200外，算是真濟人；可見王伯做人真會hou7人敬重tit。今寫幾字請看報e5人會取伊e5好模樣來效法。
