潘道榮撰 《台灣教會公報》 673 期 1941年4月 p. 17-19 原文是白話字。

若欲達成新體制的目的，毋是kan-ta有外部tek 的機構佮手段；第一要緊是國民逐人的靈魂著tiàm佇基督做新創造--ê；所以現代宗教界的責任是真重大。基督教應該chek應新體制，成做新體制的教會。甚物是新體制 的教會？

1. 恢復預言者的精神。

舊約的宗教有兩个潮流，就是祭司的的宗教kap預言者的宗教。前者，是對重形式；後者，是要緊內容。因為當時選民只有用外皮teh拜上帝；所以先知阿摩司就警告in講，「恁雖然獻燒祭，我無歡喜；獻肥的精牲 ，我無欲鑒納」(阿摩司5：22-24)。

基督教是實踐 的宗教。主耶穌有講，恁的義無贏過經學士佮法利賽人的義，決斷袂得入天國 (馬太5：20)。 リンドバーグ（Charles Augustus Lindbergh, 1902 - 1974）大佐所發表「袂來的大海湧」彼篇論文有一chām按呢講：「美國in本身自信是正義的國，美國對世界的主張是絕對；人若反對，就是魔鬼。這有tú-tú著無？聖經所記彼个好額青年，對主耶穌問講，我著怎樣做，才通承接永活？基督應講，你有有孝無？你有疼厝邊無？」你有敬上帝無？青年應講。有。最後基督共伊講。你猶欠一項，著去賣你凡所有--ê，來予散鄉人，閣來綴我。彼个青年失色，憂悶就去。這个故事著深想--伊。美國自信in有出力佇世界的平和；決斷對世界無有做啥毋拄好佇teh。總是著知，基督也欲最後按呢對美國講，你猶欠一項。所欠這項，是現代災禍的源頭。」

鄙人引伊的話，愛咱現代教會著家己反省。驚了咱無teh實行誡命的真chhoé，就是疼厝邊親像家己。

2. 高調基督教個有 的精神：

是甚物？就是真的活命基督講，我是活命。這个活命是應時代的要求。基督教佇羅馬國300年久，受迫害，有打破羅馬帝國主義，建設真的教會。基督講，天國親像酵，親像芥菜籽；因為有改造佮發展的活命力佇teh。基督教是活命的宗教。無有基督的神--ê(活命)，毋是基督的教會(羅馬8：9)。換話來講，毋是新體制 的教會。

3. 刷新日曜學校 （主日學）的教育。

用國語來替白話字的教授，這是應時代的要求。總是著知，日曜學校的教育，就是用上帝國做目標，上帝的疼的教育。換話來講，就是福音主義的宗教教育。予逐个學生將來成做好的基督徒，好的國民。日曜學校的成功，是在佇有拄好的教員。有人講，再來的教員欠熱心佮興味。向望現代的教員家己反省，紲不時gâu佮學生交陪，予in成做信仰新體制 的基督徒；才無辜負上帝的交託。

此去所欲成立的國民學校的教育根本方針就是除去再來siāng一款機械tek 的教育，閣建設義屬教育的精神。彼个目的，就是皇民的煉成。Che通做咱真大的參考。

4. 完成基督的理想。

基督所理想的教會，是新體制 的教會。啥款？請看雅歌6：10有講，著現親像早起時的光；媠親像月；清潔親像日；威儀親像kia̍h大旗的軍隊--ê。總講，就是有聖冊的的信仰；有疼；有聖潔；閣有一致團結勇敢佇teh。

5. 追求新體制 的真精神。

滅私奉公，這是今仔日咱帝國所強調--ê。總是基督佇兩千年前已經教示了lah。基督有講，恁著求上帝的國佮伊的義。毋是求安逸，明理榮達做第一，就是建設世界新秩序平和的王國做第一。基督徒偌濟甘願將伊的財產10分一獻予上帝ah？著掠教會做第一，教會著完全自給。

6. 發揮教會的中心使命。

對內：(1)執守聖禮典(洗禮佮晚餐)；(2)敬拜天父；(3)訓練會友。

對外：(1)傳福音；(2)建設慈善的事業(耶穌四界行，做好事)為著國家社會圖謀幸福--ê，才通加添人生的幸福。

7. 抱持講壇的權威。

主耶穌對講壇落來的時，眾人奇怪伊的教示。因為伊教示人有權能佇teh。彼个權能(有力通感動人)，就是伊30年久準備的期間所得著的能力。

學者講。夏天teh哮的蟬á，伊佇土內的生活著9年抑12年久，才會通按呢。今仔日的傳教者4年抑5年的準備，就一生涯teh傳道，莫怪伊所徛彼个講台無權威佇teh。

保羅先生逐時徛佇講壇to有權威。啥事按呢？伊講，我毋敢違逆對天所顯現--ê。

無異象，就oh得保持講壇的權威。

8. 毋是講拜堂大間，會友濟上帝就歡喜。人看重量，上帝看重質。主耶穌講，設使恁中間兩人佇地裡無論求甚物，若是同心，就我佇天裡的父欲共in做成。