|
|||||||
|
|
回顧過去19年，主揀召我所行的路站，實在感慨無量。 對上帝極大的疼佮攝理，1946年5月，平安對受掠的地海外轉來，身軀營養失調，閣看見家庭囝兒破病煞死去；一時心亂亂，險險行短路。總是感謝主，有差李林樹先生(五峰國校校長)引導我接受耶穌基督做救主，對彼時到這陣若眠夢，已經經過19年啦。 這19年的困難毋是一個平常的，受同族的迫害，親族的反對，地上各機關的迫害等，經過chiah 的苦戰來建立今仔日五峰鄉傳道理的門。我起頭是對泰雅爾族傳福音，其實我毋是這個族，是賽夏族的一個，又閣是beh做怹的頭目的身份，也是beh做怹的大祭司的身份。因為信耶穌基督的緣故，佇族長佮有力者的會議受除名。我真同感保羅先生所講：「上帝佇猶未創造天地的以前就揀選我」這句話。我佇遮beh 發表的見證可能真濟人oh得信，因為毋是用肉眼看見的。總是天頂的父上帝所差來的聖神beh踮佇人的心，beh清氣人的心，安慰人的心。太陽發散伊的光，所以咱會通看見伊的面貌。總是咱無法度通看出伊所發的熱，毋過地面上所有的生物的活命對這个得著生存。冬天的早起時真寒冷，總是猶原有熱的存在，若無，拍算毋若kan-ta人而已，所有的生物攏無法度通存在。同一樣，上帝是用咱人的目睭無法度通看，總是不時踮佇信的人的心中安慰，引導咱。因為上帝是活的上帝，顯出伊特別的神蹟，疼佮恩惠佇伊所用的器具。我感謝上帝予我一世人無袂記得的事，就是到永遠的歡喜，我信這是無一個人有法度通對我搶奪去的寶貝佮恩賜。兩年前受選拔參加佇新竹長老教會聖經書院的山地教師訓練班。佇遐佮幾若位的同學相佮生活，受訓練，相佮談論，對將來的教會的抱負。 人生的逆境 快樂的訓練生活若眠夢經過，閣賰兩個月就beh結束啦。佇彼的時一家所teh倚靠的囝接著國家的召集令，所賰的是軟弱的查某人佮細漢的囡仔，也無粒積，也無跤手通做工，9个家族對今仔日起的生活beh 按怎？ Chiah 的問題成做我煩惱的原因。佇這個時，魔鬼就展起伊的誘惑，不時佇我的耳仔有一個聲，「毋通閣繼續訓練，母囝予伊餓死好是無？」一月的中間佮魔鬼的誘惑攪吵交戰，致使頭殼心起疼。身軀過頭的厭倦，閣袂睏得，總是較苦也著吞忍，一面讀冊，一面每禮拜六下晡轉去教會主持禮拜。 較主的約束 頭殼的疼佮普通無各樣，總是全身若親像失去力的款。彼日佮信徒相佮做禮拜。一日經過到暗時，家族的的人攏睏去，聽見大家睏 ka-chē 的聲，想起明仔載beh 閣轉去學校讀冊，心內就趒跳。時鐘已經摃12點，總是猶未入眠。彼時忽然頭殼閣起疼，若親像去予電電著，規个神經攏麻去，忍袂tiâu，想 beh peh起來，煞意識不明倒落去，是肉體佮靈魂分離，看異象，抑是眠夢？12點到 3點，我予天使chhoā去到一位真燦爛的所在，這個所在是佇媠的圖畫, á是世界出名的公園也無法度通看的所在。佇遐有一條真直，白的路，路的兩爿有種真濟媠的花，ná親像teh歡迎旅行者的款。佇這條路的路中有兩位的監視所，經過遮入去真媠的街市。這个街市內有真濟真懸的建築物。照天使講：遮的厝有12色,看正手（右）爿彼的12色的光成做一條光teh 照彼所在; 倒手（左）旁有真濟的人拍拚teh起共款設計的厝。後來天使chhoā我到主的面前，主佮我約束，彼的約束就是拄chiah看見未完成的厝。主問我， 「你想拄chiah看見彼間未完成的厝��款？」我彼時毋知beh按怎kā伊應答，總是我有kā回答講：「設計���真媠。」主閣kā我講：「這間就是 你起的厝。」我聽著這句話的時，愈想愈袂曉。怎樣呢? 因為我毋是一个建築師,是一个散鄉的傳教者。主閣kā我講：「這間厝就是我所teh負責的厝，你佇地上teh做的，佇遮也teh做，地面上的建設若好，這个街市也beh完成。」 這个時有聽見我的婦仁人teh叫的聲音，感覺有人teh kā我櫓身軀，我回復意識啦，頭殼猶原猶疼，一下用手摸頭殼，才發見有流血，後來才知是約有成寸的傷跡，這个傷是beh peh起來的時跋倒去摃著的。周圍有家族親晟徛teh注意看我，我連鞭閣失了意識去。當我醒起來的時，我已經佇病院的病房內。我的血壓夯起來到180 度，致使予醫生佮朋友想講拍算無法度，若會好，也無法度通完全。我的婦仁人也非常煩惱，總是我有將我佮主講話的代誌講予伊聽，後來相佮跪落去祈禱感謝。兩日後就退院，到這陣主予我有勇健的身軀teh為伊做工，予我確信主猶需要我的做工。 續接去拄著悲慘 舊年年頭落真濟的霜，致使一寡（些）農作物攏凍死，續接閣拄著炕旱，生活發生困難的時，9月9日閣受葛樂禮颱風來訪問本縣. 一連幾若日的大雨，將本縣真濟的財產佮人命搶奪去。我猶原也佇彼的苦境的一个，對佇19年來無受外來的經濟援助，自給傳道來的我，是一个真大的打擊。幸á是不幸，我家族的性命根的水田1甲2分7厘佮其餘的副產物攏予水流--去。對今仔日起beh食啥物？生活的來源受切斷去的苦痛！Beh按怎來繼續主的聖工。一時感覺茫茫渺渺，毋知beh怎樣？當佇失望，悲哀的時，閣聽見四界teh喝鬥幫贊，無麵包的聲音，精神giōng-giōng beh亂去。 隔日是禮拜日，透早起來teh祈禱的時，聽見佇隔壁查某囝teh吟詩的聲。彼的聲音佮我祈禱的聲調和起來，變做ná親像天使的聲，感覺天使 beh飛落來的款。我彼時一直祈禱，「上帝矣,你將我所有的水田攏kā我討轉去，是毋是這是我對主最後奉侍的機會？」無意識的中間，我的祈禱紲變做大聲哮的聲音。家族的人攏真煩惱，想講我是起神經病。 生活革命的原動力 佇這个若親像烏暗的人生，一條光明照落來。我感謝上帝，當我軟弱，失志的時，憐憫我，安慰我。當我彼暗beh睏的時，起頭攏袂睏得， 翻來翻去。忽然間聽見主的聲kā我講：「恁的心莫得peh腹，恁著信上帝，亦著信我」(約翰14: 1)。隨時起來，掀開這 chām 的聖經讀幾若擺，ná讀ná知beh解決我的疑問的鎖匙是佇遮。我隨時佇主的面前懺悔我的重罪。對按呢我的悲哀，僥疑得主的憐憫，變成歡喜佮感謝啦。 隔日，雨猶真大，山猶一直teh崩，總是我無忍neh，行路幾若點鐘去訪問桃山村損害最大的所在。大ah! 水的威力，約60戶的厝攏予流去。拄著遐的人予大水流所有的財產去的人起頭無半句話通講：只有流目屎。徛佇舊拜堂的跡的時，予我閣較心痛苦。總是我來的目的，是beh安慰chiah-的人。我kā 怹講：「主無beh放拺恁，著將一切交代主，用信仰較贏一切的試煉。」 感謝上帝，予我這个卑微的人來做這个為難的工程：安慰災民，救濟佮服務的工作。我隨時佮本鄉各教會連絡設立復舊工作委員會，佮各救濟機關連絡，後來有得著怹大的同情佮協助，供給真濟的物質佮金錢。回想彼時，若毋是主佮我相佮佇teh, thái有法度來做這个工. 會通袂記得家族的某囝，為著遐的受害的人的生活復興，田園復興無暝無日奔走，這陣家己想，感覺真奇妙，彼陣thái有彼的元氣。 我經驗著對烏暗一切受tháu放。我的人生成做明朗。苦痛怨慼的人生成做感謝。我相信所經過刺帔的路，是上帝beh chhoā我到平安安歇的所在，經過烏暗的山谷，是beh chhoā我到光明的所在，上帝的旨意。這的確信予我充滿向望佮歡喜，予我勇敢向這个不休的大事業，復興五峰鄉來跑走。 我雖然行過死蔭的山谷，亦毋驚災害;因為你佮我佇teh;你的槌，你的枴,安慰我(詩篇23: 4)。 歡喜的風湧 上帝為著beh訓練咱,予咱有真濟天災，逆境，總是這个苦痛佮一生的長來相比的時，á是對永遠來看的時，是短短的一時陣.信靠上帝，順趁伊的旨意的人，伊beh紲接賞賜咱想袂出的大歡喜。伊極大豐富的恩惠，只有感謝佮呵咾。「無掛慮屬世的悲哀，心內充滿永遠的快樂。天頂有聽見奇妙和諧的歌聲，我 beh和聲來吟。」 |
||||||
