葉金木「李德文長老小傳」 《台灣教會公報》607卷，1935年10月

李德文長老於1935年8月8日去世。長子李天賜，次子李春生。

李德文是金包里 e5人，對少年e5 時陣是耕農、做生理，一生勤儉樸素，kap人真好交陪。Ti7 25 年前劉忠堅牧師（Rev. Duncan MacLeod）有kap葉塗火傳道以及我去金包里佈道，hit tiap8李德文有聽著道理，心到極歡喜。就招兩位e5先生到伊e5厝，講道理hou7伊e5老母kap伊e5長老娘聽。Hit tiap8了後，伊e5老母kap家內e5人也同心kap伊信道理。伊本身招伊e5朋友對傳道局請設講議所ti7金包里，傳道局有准伊所請。Hit tiap8有派楊漳去傳道；伊就出力鬥幫贊伊，對an2-ni教會日日進步。後來有hou7教會揀伊做長老，伊真出力幫贊教會。伊是勤儉e5人，對教會逐項e5 ian5項，伊真克己來獻， gau5好款待人。Ai3 kap人談論道理。

I au2-be7信道理以前，伊e5長老娘所生產e5攏be7活，到信道理後，就生產1位查甫子名天賜，有去內地留學轉來，現時ti7基隆市役所做獸醫。今年有組織中央市場，現時有做社長，對教會猶原不止關心。後來有得著1位e5查甫子名春生，現時去內地留學。伊ti7昭和7年（1932年）就起1間拜堂廳ti7金包里來獻，會友就起1間宿舍。到拜堂落成後，伊就kap伊e5子做陣去toa3 ti7板橋，總是伊猶原掛慮金包里教會，逐年猶原題ian5做hit教會e5經費。真可惜，ti7舊年就起病，身軀經過濟濟艱苦。 

伊tu2著艱苦e5時，家己致意祈禱。也叫伊家內e5人祈禱。Beh離別世間以前，伊e5子、媳婦、長老有kap伊禮拜，伊逐擺講著替伊認罪。伊e5媳婦講：「阿爸你對教會有chiah熱心，m7免掛意。」伊講：「M7 thang an2-ni誇口，著認罪。」到（1935年）8月8日hit e晡2點安然歸天。M7到8月16 日i7本堂做告別式。這日有對本堂kap附近kap幾若位教會牧師、傳道、長執、會友kap偉牧師（偉彼得，Rev. J.D.Wilkie）、偕先生（偕叡廉）以及基隆市市尹代理， kap濟濟位e5官員，kap地方e5有力者，也有濟濟花環、弔旗、弔電、弔詞，實在是真盛會，這是顯明伊做人e5結果。Beh離開世間以前，有交帶伊e5子著獻淡薄e5錢，來做基隆金包里教會e5紀念獻金。實在是真thang數念e5長老，有好模樣thang hou7人學。求主幫贊伊e5子兒，會接續伊e5腳步。

 首頁Home/ 本土信徒總檔 / 教會史話總檔 / 宣教師人物總檔 / 外國神父修女列傳 / 日人列傳總檔 / 原住民信徒 /  諸家論述