「故李達莊博士」《台灣教會公報》967號 1965年 10月 p.19 [原文是白話字]

故李長老達莊博士，佇A. D. 1889年2月20日，出世佇屏東縣東港鎮， 故李懷伯的令長男。李長老的天資聰明，和氣。佇東港國校成績優良，第1名畢業，就考tiau5台北醫專 (現時的台大醫學院)。畢業後，受聘做淡水馬偕病院的醫師，在任中幫贊宋雅各醫生(Dr. James Y. Ferguson, 1876-1965)來台北建設馬偕病院。在任兩年，然後倒去故鄉東港， 開業「達莊醫院」20 外年。開業中有發出10000 張的施療券， 施療宋鄉患者，大家真o-lo2伊的醫德高明 kap慈心。患者日日濟，na2 華陀再世，內外風評真好。

李長老佇東港教會，擔任主日學的校長佮長老20 外年久。幫贊牧長興起教會，出工，出錢，信德可嘉，全家熱心敬畏上帝。伊也做大，中會的代議長老真久，忠誠盡職，協助大，中會，興起聖國， 功績真大。

李長老開業中，熱心研究醫學，受杜聰明博士的指導下，佇1943年得著醫學博士的學位。感謝主，照俗語所講：「天幫贊家己幫贊的人。」

李博士佇1945年光復初初受北部大會的委託，極力 對日軍接收破壞的馬偕病院。受北大聘任做馬偕病院院長， 前後幾若任做院長兼樂山園 thai2-ko病院院長。在任中，歡喜獻錢起一間癩病患者的宿舍，獻hou7病院。伊一生為馬偕病院佮樂山園病院，盡心，盡力，奉獻金錢佮心神來經營。實在伊的貢獻真偉大。伊在任中，對患者親切，對症下藥。 對同工和睦，對社會有信用， koh好名聲。對國家服務，對大，中會協助，所以內外和平真好。

伊勇退後，佇關仔嶺，熱心研究聖經兼醫療傳道，真少開業醫 tè伊會著。後來倒來台北市三張犁家己的厝，開設三張犁教會(就是大安教會)，後來做東門教會的支會。做醫生來設教會，也是真少人te3會著。總講：伊是一個敬畏上帝兼疼世人的模範者。

李博士，佇1960年，身體欠安，入台大病院治療。然後倒去三張犁轉地療養，共5年久。無拍算，佇1965年6月21日，中午12點25分受主揀召歸天，享壽76歲。 伊歸天的時，李長老娘佮家族大細攏佇伊的身邊，祈禱吟詩。李長老無煩無惱，面笑容，安然歸天府。大家流呣甘的目屎，送這位上帝偉大的忠僕，辭塵歸帝鄉，離世升天堂（辭塵歸帝鄉，離世升天堂）。

李博士的入墓禮拜，佇6月22日下晡5點舉行，遺族李夫人麗珠女士，佮兩男 7 女， 女婿，內外孫， 孫女，kap 親友，會友等，圍纍佇身邊，隆重舉行。

李博士的告別式禮拜，佇6月28日下晡兩點起，佇雙連禮拜堂舉行，到時總會，北大， 星中，北中，馬偕病院等的代表， 佮各教會，機關團體的牧長，兄姐，來賓，共有300 外人出席。儀式隆重 舉行。 吳天寶教師司儀， 周慶淵先生奏樂。 張逢昌牧師讀詩篇116篇，林寶祥牧師祈禱，許水露牧師講故人略歷。 陳溪圳牧師用「寶貴的死」做題講道。然後總會代表黃總幹事武東牧師，北大議長黃六點牧師，星中議長兼馬偕病院的董事長 許鴻謨牧師，北中議長 陳惠昌牧師，高雄醫學院院長杜聰明博士，佮馬偕病院羅總務主任等 代表總會， 大會，中會，學院，病院來講悼詞。 褒獎李長老達莊博士的信德，忠誠盡職佮 gâu做人，真濟好事，thang做咱的模樣佮安慰遺族。為著時間的制限， iáu有真濟來賓佮親友soà無時間thang講悼詞，真遺憾。許斌碩牧師讀悼電，後來馬偕病院，雙連教會，中正教會等的聖歌隊的悼歌，然後會眾起立默禱兩分鐘追念李長老。許水露牧師代表遺族講謝辭，最後請89 歲葉金木牧師祝禱閉會。隨時護送靈柩到台北縣的觀音山 公塚安葬。

李長老達莊博士，遺下 3 男 7 女， 7 女婿佮 46名的內外孫佮 ka-ná-孫。 伊得主的賜福，多壽，多才， 多子孫。

李長老的大公子故啟輝君，畢業東京日本大學法科。次男德輝君，畢業日本京都工業大學，服務順天堂製藥廠。三男東輝君，畢業東京日本大學經濟科，經營汽車補習班（中英汽車補習班）。令嬡錦蘭桑，菊芬桑，彩微桑，攏畢業省立台南一高女， 玉珊桑，畢業日本昭和女子 藥專， 素珊桑，琬珊桑，佩珊桑等，畢業淡江女中高中部。

李長老達莊博士的七個女婿， 逐個都 to大專畢業。大女婿 吳來成法學士，畢業日本中央大學法科，奉職佇彰化銀行做經理。第2 女婿林再興醫學士，畢業台大學院，佇楠梓開業，佇楠梓教會做長老， 林長老娘菊芬桑，也是楠梓教會的長老，真熱心，歡喜獻工，獻錢。第三女婿 洪金怜醫學士，畢業台大醫學院，佇萬興開業，洪太太彩微桑做萬興教會的執事，夫婦攏熱心，歡喜獻工佮 獻錢。大女婿 吳來成經理佮太太攏真熱心信主，對教會歡喜獻工佮獻錢。

(第五)女婿劉克昭醫學士，畢業台大醫學院，家己開業佇台北，夫婦攏熱心信主，服務教會。(第四)女婿 林識時，畢業東京農業大學(農學院)，現任 糧食局稽正。(第六)女婿 張劍鋒先生，畢業參謀大學，現任中佐（中校），團管區的課長。 女婿陳清風先生畢業高商， 自己營商 (做生理)。

李長老的內外孫，攏共46名，其中三個佇台大醫學院，其他佇大專， 高中，初中，國校在學中。願主施恩賜福遺族身，心，靈得健康。