|
我讀冊,做店員,做小使.......,我堯疑聖經 |
|
首頁/ English / Japanese Entries/ 本土信徒 / 史話 / 諸家論述 / 宣教師 / 外國神父修女 / 原住民 / 日人列傳 / 賴永祥著作/ 馬偕周邊 / PCT/ 劉家雜錄 |
|
廖得撰 摘自《68回憶錄》 載於《活命e5米糧》35期 1957年4月 p.41-45。 原文用白話字,改為漢羅台文如下。[讀了,請讀 廖得:做苦力監督....] 我讀冊kap拾麥屑 我15歲e5時,大學koh派一個讀3年了e5學生,叫做盧燦(盧慶耀)先生,去水尾教小學。Hit年e5學生較濟;我koh行舊路,khaiN鋤頭籃仔拾蕃薯,kap別物種子;閒e5時,去讀冊。 我做店員 15歲年尾,油車區長倩我kap伊toa3生理店,主日hou7我去水尾禮拜,食伊一月日箍半銀。透早起來掃地擔水,日時出庄扑粟kap顧店,半暝關店門睏。有時陣頭手e5店員無ti7-teh,著提替身白虎kap金香紙燭賣人,真m7慣勢;到一擺ti7車頂teh拖粟包e5時,hou7牛chhoah摔ti7埕nih,ka-chiah骨ham7-chham3,就辭頭路。Hit時hit間店,鴨卵一箍銀ka7人割96粒;也小賣是一角銀10粒:che叫做生理法。 我貪心 有一日去崙背買菜,有一個熟悉e5福州人,ka落一角銀ti7菜架仔腳,我無ka7伊講;到伊無ti7 hia e5時,我就ka7伊拾來。另日張傳道娘,託我koh去崙背,ka7伊買菜。買了,hit個te2拾個一角銀e5銀袋仔kap箍外銀,攏無去! 我做小使 我16歲e5時,hou7敝親戚引進去油車派出所做小使(雜工)kap煮食。主日hou7我去水尾禮拜;每月2箍銀,有飯thang食,無菜thang配。起頭配滾水,後來種有韭(kun2)菜e5時,逐頓配韭菜湯;致到舊底e5下消症koh起:「枵呻飽懶,食飽叫艱難!(Iau chhan pa2 lan2, chiah8 pa2 kio3 kan-lan5)」tioh8著「大食病。」 我poah8-kiau2 Ti7正月初一,為著衙門無閒,beh去水尾赴青社會siuN晏續無去;就ti7庄中thit tho3。Tu2好我e5舊頭家(區長),teh做輪(lian2)寶hou7人teh;代先我看be7曉,後來那看續bat,kiN3-ioh kiN3-tioh8,就提錢ka7伊teh,直直贏箍外銀;到尾;直直輸,連衙門過年所賞e5,也輸了了!銀袋仔無chhun半chiam。 我火燒厝 逐月日ti7衙門所領2箍銀e5月給,攏提hou7我e5老母積聚thang hou7我讀中學。無打算一個e晝,我e5草寮仔hou7火燒--去,也我e5 10月日e5月給20箍銀票,也變做紙灰。我8歲e5時, ti7二崙仔做大水,倒瓦厝;我14歲,ti7油車做大水,倒草厝;今17歲,ti7水尾koh火燒寮。前2擺e5水災,爛無了、摃破無了e5;這擺e5火燒,攏了!連幾條蕃薯仔,也pu5到熟熟!會外e5人,看著我,就講:「今tioh8上帝tioh8!」會內e5人講阮會背教!我兩個大姊,一個嫁hou7做保正e5做媳婦,一個嫁hou7做壯丁e5做兄嫂;兩位攏是大作田e5人。Chit-e7火燒厝,兩位攏tu2著家庭不和;兩個大姊攏轉(返)來鬥食hiah e5火燒蕃薯。 Hit時tu2好有幾若位早典人e5祖公業,來beh贊契尾(盡);阮向望會得著淡薄錢,thang koh創一個巢(siu7)。無打算借錢去刻印仔,到tng3了e5時;族親請酒問老大,看人來找契尾e5錢,阮會分tit be7?老大食煞,就講,阮去入教be7分tit,好tit in母仔子;若無,就公媽攏著仆(phak)狗屎!Tui3 an2-ne,我e5族親就提2箍銀,beh貼我e5老母做刻印仔kap點心錢。 Hit時阮就ka7人借4箍銀,來買2間破厝桶仔:「雨落珍咚鼓,日出好扑虎!」 阮脫離死蔭山谷 Ti7 hit個衙門內e5人,閒e5時,見講攏是淫詞。代先我m7慣勢,聽著就走;聽久,「慣勢成自然。」路尾聽了續會心適!Tui3 ti7水尾火燒厝了,倒轉toa3油車,tui3 an2-e主日就較無機會thang去水尾禮拜; koh見若家己teh讀聖經,抑是teh祈禱e5時,人就teh叫。我e5心神漸漸衰lam2!肉慾直直縱狂(chhiong-kiong5)!外誘日日增強!Hit時續teh想,新曆過年有閒e5時,beh kap hiah e5內面teh放蕩e5人,去牛灶(gu5-chau3) thit-tho3。Ti7這個危險萬分e5時!主全能拯救e5聖手臨到!該死e5我,就脫離萬能魔手,kap hit個滅無e5火坑! 我sak鐵支 後來kap人去斗南sak鐵支,扛(kng)無法,sak be7行;出力扛,勉強sak,嘴礁沿路食田水;sak到虎尾,趁4角銀。轉到油車,病3日be7落眠床腳;外腎(sin)歹一爿。 我堯疑聖經 Hit時讀著一本聖冊真實e5冊,teh證明聖經是上帝啟示,m7是人做e5;內面所講e5,濟濟項kap人做e5無相像。我ti7斗六牛挑灣teh ka7人割草,逐日家己teh做工e5時,也心內teh想,人kiam2 be7 tiau5- ti寫hou7伊無相像? 逐日一面堯疑;也一面祈禱講:「求主將確實e5證據hou7我。」經過真久,ti7一暝眠夢2個夢:
天光teh想起我14歲,我e5老母去禮拜了後,teh ka7我講,伊oe7拜上帝e5時,見若眠夢著鬼,是驚到醒,心肝鼓phok8-phok8-chheg3,流汗,著叫身邊睏e5人醒thang講話;tui3禮拜了,見若眠夢著鬼,就ti7眠夢中祈禱講:「主ah!救我!」也鬼就走去,平安好睏無醒!今本身也經驗著!假e5 kiam2會an2-ni? Koh佈道無錢趁,無人o-lo2! An2-choaN2傳道會歡喜?人做e5 kiam2會an2-ne? Tui3 an2-ni,我e5 堯疑就解消! 我Hou7寮teh著 我kap一個二水人,ti7斗六北爿e5溪底,teh種蕃薯。Ti7下晡時狂風大作,阮teh bih雨e5草寮,續倒落去;別人走離,我hou7伊teh ti7內面昏去。後來我精神出聲,同伴拆厝頂,ka7我拖出。我就aN3-aN3跛到斗六街5里路,tui3王醫生買一角銀擦藥,紮傷跡;tui3 an2-ne,新傷引舊傷,前ka-chiah摔ham7-chham3 e5位,續好去。 我奉獻 我隔日koh到hou7寮teh著hit區園種蕃薯,我就跪落祈禱講:「天父ah!我beh完全奉獻hou7你!求你ka7我安排頭前e5路!」
首頁Home/ 本土信徒總檔 / 教會史話總檔 / 宣教師人物總檔 / 外國神父修女列傳 / 日人列傳總檔 / 原住民信徒 / 諸家論述
|