廖得撰 摘自《68回憶錄》 載於《活命e5米糧》36期 1957年5月 p.31-37。原文用白話字，改為漢羅台文如下。

我做苦力監督

我18歲e5時，有hou7西螺埔心e5苦力頭，chhoa7去竹山起（建）公學校。暗時我去探一家姓許e5兄弟，伊請我主理家庭禮拜。Hit家是茄冬仔（西螺）會友，樹仔腳人；tui3搬去了，才引chhoa7人kap設教會。Hit時tu2好in翁某（夫妻）久久無講話；禮拜煞，不睦e5鎖鍊thau2放！通家大歡喜！！天國臨到！！！

主日早起，我ti7工場煮食飽，就趕緊去招會友禮拜；聚會煞轉去，日人監督問我，「Thai2無做工？」我講：「去禮拜！」伊問講：「你是耶穌人mah？我講：「著（是）！」有一日teh做工e5時，郵便提我e5老母寄e5批到，我在場拆開讀，是用捲紙寫e5,幾若尺長，tui3斗六去e5日人bauh8頭看著是寫外國字e5,問我講：「你bat mah？」我講：「bat！」伊著一驚！！！

有一暗兩個日人監督叫我去請，一個開井監督，hiahN伊e5衫仔褲hou7我，叫我替伊做監督。我講：「你大人都管無法，我是囡仔thai2管有法？」Hit個厝頂監督講：「我逐日看你盡力做工！m7 bat親像別人不時偷chhiau5時鐘！！！」以前hou7苦力頭抽了，一工趁二角四；hit tiap8起到完工止，一日趁5角，免hou7苦力頭抽。 

老實好做本

後來去斗六珠丹灣，陳長老請我主理in暗時e5家庭禮拜；禮拜煞，in翁某e5不和，攏好去！續聽陳長老講赴南部中會，e昏時teh睏e5時，所聽e5信仰美談：有一個姓李e5廈門囡仔，來台北beh kap人toa3店。頭家問伊e5條件。伊講：「禮拜日hou7我禮拜！錢濟少無要緊！！！」頭家主日就hou7伊去禮拜。這個囡仔，暝時暗暗睏，早起時早早起。真骨力！逐日接待人客真親切！！Kap人買賣是貨真價實：「童叟無欺！！！」Tui3 an2-ne hit間店，日日人氣那好，年尾結帳大趁錢。別間店知影，就疊過倩去；舊底hit間e5主顧，也濟濟toe3伊過去新toa3 e5所在買賣：年尾結帳，新倩伊hit間也大趁錢。新年別間猶原koh疊過倩去：hit間倩了teh掛慮新年kaN2會koh hou7別間chhiaN5去；所以就kap伊約束，年尾趁錢beh hou7伊抽分。後來有幾隻洋船來！Beh賣，beh買，chhoe7無信用e5人thang交託。真勞煩！！Teh四界調查e5時，有人ka7伊講：「入教李e5,蓋有信用！！！」Hiah e5船e5買賣，自an2-ne託伊代辦：免本錢做大頭路！！！

阮得聖神充滿

Ti7我18歲e5秋天時，有一個主日，kap斗六一個姓廖，未婚慕道友青年；以及油車港後姓李，結婚了入教會6年久，32歲e5中年人；做陣去水尾禮拜，阮頂下晡續ti7 hia主理禮拜：因為hit時hia無先生。

Hit間拜堂是塗結蓋草e5,熱（夏）天暝時，常常有人ti7拜堂椅條睏；阮3人hit暝toa3水尾隔暝，續ti7拜堂內睏椅條。倒teh boe7睏e5時，大家teh會教會內濟濟項e5事；會了就爬起來跪teh祈禱；祈禱了，就koh倒teh會；會了，就koh爬起來祈禱。那會，那祈禱，心那熱；祈禱到約半暝過；忽然感覺厝振動，聽見厝內有聲，看見厝頂有光；3人同齊目屎流出，感覺家己e5罪上重！

1.Boe7信e5人teh沈淪，無去報伊！2、冷心無禮拜e5會友，無去招伊！3、犯罪e5信徒，無去救伊！Che（1）無體貼父e5疼心！不孝！（2）無同情主十架e5苦心！不忠！（3）無協力保惠師e5慈心！不義！ 

Hit時3人就立志，beh到台灣逐庄逐社，趁食kap傳道：親像保羅瑟。無論死活，有食無食，或是穿布袋，睏林投腳，攏無問題。歸暝無睏，天光目睭腫腫；總是心肝真清！心神真平安！tui3 chit tiap8起，時時刻刻chhoe7機會傳道。

救人就是救家己

早年印度e5撒夫孫大（Sundar Singh, 1889-1929?  孫大信）先生，去西藏傳道。有一日teh落雪山e5時， tu2著有人寒倒ti7路nih,伊beh ka7伊救；總是aiN7無法tit！Tu2好有一人，tui3山頂teh走落來。孫大先生，就招伊講：「朋友ah！來鬥腳手teh！」Hit個人講：「家己顧命，都顧be7離ah！續會顧別人？！」做伊走去。孫大先生就出力拚命，將hit個人拖起來揹ti7 ka-chiah-phiaN，搖搖擺擺落山。行無偌遠，看見一人寒倒ti7頭前e5路邊；斟酌ka7伊看，to是tu2仔hit個beh救家己e5生命e5,續失落生命！也孫大先生為著beh救人，續舞到一身重汗。救人續救著家己！

出錢起廟，耶穌m7歡喜

3人獻身後，斗六敝堂e5,為著老父e5生活，著koh準備；姓李e5,為著牛羊kap田園交代人經營了，人koh辭行，tui3 an2-ne 3人著隨人行。

Hit時油車衙門臨時叫我去鬥腳手。

Tu2著麥寮beh起廟，講有tui3總督府許可了，麥寮區長就toa3一擔麥仔酒來衙門拜託。日人處堤就答應館內5保beh拾錢hou7伊；就臨時開保甲會議。Tu2好水尾有2甲e5會友，也保正鐘德喜，甲長李老王，2人是基督徒，m7肯答應。處堤問in an2-chaN2 m7答應。In講：「出錢起廟，耶穌m7歡喜！」處堤講：「An2-ne lin入基督教續有迷信！今2人e5保正甲長，攏著免職換別人！」到有一暝昏，這個處堤，就請通譯來伊e5宿舍。叫我去問講：「Lin水尾教會，做甲長保正e5人，ti7保甲會議e5時，講出錢起廟，耶穌m7歡喜！An2-choaN2 hiah迷信？！！！」我應講：「基督教e5人是想無siang7教，是親像無siang7國。今仔日若有別國e5人，beh tui3咱te5錢去起（建）衙門，抑是兵營，咱的確m7；因為咱若有錢thang出，家己e5國家較濟都有欠！設使人若提錢hou7別國起衙門，抑是兵營，我想國家若知，的確m7歡喜！」阮基督教起禮拜堂、請先生，攏是信徒家己出，無tui3別教e5人te5；阮若有錢，教會較濟都有欠用！所以阮無ai3出錢去起廟，是kap人民出錢hou7別國起政府相像心理！處堤 e5丈姆是熱心e5佛教徒，聽了講：「An2-ne有理！」處堤e5 ok-sang3（奥様，太太）聽了，也真歡歡喜！處堤講：「An2-ne真好！ m7著講理氣，一句也講：「耶穌m7歡喜」2句也「耶穌m7歡喜！！」「An2-ne都變做迷信去ah！」

處堤以外kho問3項：1、薰（煙）酒an2-choaN2 m7-thang食？食了， an2-choaN2有罪？我應：「基督教講：無利益e5物攏m7 thang食！若食無利益，有害e5物，攏是罪！」

2、Lin信基督教，是向望beh得著赦罪mah？我應：「是！M7知kap做be7到e5,才會赦tit！若是知， kap做會到e5, be7赦tit！」伊講：「著（是）！國家e5律法：m7知kap做be7到e5,叫做『過失！』這款罪會減輕，抑是赦免！若是知kap做會到e5,這叫做『明知故犯！』這款e5罪刑罰較重，有時是『死刑！』或是『無期徒刑，』kap關較久。」

3、Lin基督教徒an2-choaN2無孝祖先？我應：「是！基督教是教誠實！在生著絕對有孝奉用：親像基督ti7十字架頂beh臨終e5時，有將伊e5老母瑪莉亞交代伊所疼e5學生約翰負責奉養，到60歲12年久別世了後，約翰才出外傳道。」若論死後，基督教徒是想祭祀名「祭祖」，其實是「孝家己e5腹肚。」這款假做，基督教是看做大罪；所以是ai3（要）誠實照父母祖公在生所ai3,所教示來實行，thang榮顯 前代，kap興旺後裔。

處堤講：「你已經研究到an2-ne,著koh去學習做傳道！」我應講：「無的確！親像人民應該bat法律，m7是bat法律，就著去做警察！」處堤講：「有影！總是若無人傳，你thai2有thang聽著！」

後來我22歲teh讀神學e5時，伊有寫批叫我若欠學費e5時著ka7伊講：伊beh寄hou7我；我kap某子逐擺去到伊e5所在，全家老嫩歡喜歡迎：那像「天poah8落月！」幾十年久，kap朋友閒談e5時，tauh8-tauh8 teh言起我e5代誌！Ti7這個23年久，我e5『自由傳道！』也是主用這個壓迫基督徒e5處堤，是ti7澎湖kap美國加州做和尚e5 e5丈人e5島田巡查，ka7我鬥腳手所費e5！